Khmer
English
Chinese
Frence
Vietnamese
Thaiបង្ក្រាបថ្នាំញៀន២ករណីនៅខេត្តសៀមរាបឃាត់ខ្លួនមនុស្ស៣នាក់
ដោយ ៖ ជា ស្រស់|ថ្ងៃទី 06 កុម្ភះ 2013 ម៉ោង 15:16:35
ខេត្តសៀមរាប ៖ កម្លាំងនគរបាលនៃការិយាល័យប្រឆាំងការការជួញដូរគ្រឿងញៀន ខេត្តសៀមរាប បានបង្ក្រាបករណីចែកចាយ និងប្រើប្រាស់ថ្នាំញៀន២ករណីផ្សេងគ្នា ដោយឃាត់ខ្លួនមនុស្ស៣នាក់ និងដកហូតវត្ថុតាងបានមួយចំនួន។
នាយការិយាល័យនគរបាលប្រឆាំងការជួញដូរគ្រឿងញៀន លោកវរសេនីយ៍ត្រី អ៊ុំ សាអាត បានឲ្យ នគរវត្តដឹងតាមទូរស័ព្ទនៅថ្ងៃទី៦ ខែកុម្ភៈ ថា កាលពីយប់ថ្ងៃទី០៤ ខែកុម្ភៈ ឆ្នាំ២០១៣ កម្លាំងនគរបាលប៉ុស្តិ៍រដ្ឋបាលសង្កាត់ទឹកវិល ក្រុងសៀមរាប បានចុះត្រួតពិនិត្យអាវុធជាតិផ្ទុះ ក៏បានឃាត់ខ្លួនបុរសម្នាក់ឈ្មោះ ហម បុល អាយុ៥២ឆ្នាំ រស់នៅភូមិគោកចក សង្កាត់គោកចក ក្រុងសៀមរាប ក្រោយពីសមត្ថកិច្ចរកឃើញនៅជាប់ខ្លួនបុរសរូបនេះ មានកញ្ឆាគ្រាមចំនួនកន្លះខាំ ។ លោកបន្តថា បន្ទាប់ពីឃាត់ខ្លួនបានមួយយប់ ព្រឹកថ្ងៃទី០៥ ខាងនគរបាលប៉ុស្តិ៍ទឹកវិល ក៏ប្រគល់បុរស ហម បុល មកការិយាល័យជំនាញដើម្បីចាត់ការបន្ត។
លោក អ៊ុំ សាអាត បន្តថា ក្រោយពីសាកសួរ បុរស ហម បុល បានឆ្លើយថា គាត់បានទិញកញ្ឆានេះពីឈ្មោះ ជឹម សុខា ភេទប្រុស អាយុ៣៧ឆ្នាំ មានទីលំនៅភូមិគោកស្នួល ឃុំខ្នាត ស្រុកពួក ខេត្តសៀមរាប។ ដោយបានចម្លើយយ៉ាងដូច្នេះ នគរបាលក៏បានឃាត់ខ្លួនបុរសឈ្មោះ ជឹម សុខា នេះជាបន្តទៀត។
លោកវរសេនីយ៍ត្រី អ៊ុំ សាអាត បន្តថា ក្រោយពីការសាកសួរ និងដោយមានការអនុញ្ញាតពីតំណាង អយ្យការផងនោះ នគរបាលបានសម្រេចដោះលែងបុរសឈ្មោះ ហម បុល វិញ ដោយគ្រាន់តែអប់រំឲ្យ បញ្ឈប់ការប្រើប្រាស់គ្រឿងញៀន(កញ្ឆា)ទៀត បើឃាត់ខ្លួនបានលើកទី២នឹងកសាងសំណុំរឿងបញ្ជូនទៅតុលាការ។ លោកបន្តថា ដោយឡែកបុរសឈ្មោះ ជឹម សុខា ដែលជាអ្នកលក់កញ្ឆានោះ ត្រូវបាននគរបាល កសាងសំណុំរឿងបញ្ជូនទៅសាលាដំបូង ពីបទចែកចាយ និងរក្សាទុកគ្រឿងញៀនខុសច្បាប់។
ករណីដោយឡែកមួយទៀត បុរសម្នាក់ដែលជាមុខសញ្ញាចែកចាយថ្នាំញៀនដ៏សកម្មនៅក្នុង ក្រុងសៀមរាប ត្រូវបាននគរបាលឃាត់ខ្ឡួន កាលពីថ្ងៃទី០៥ ខែកុម្ភៈ ឆ្នាំ២០១៣ នៅក្នុងភូមិវាល សង្កាត់គោកចក ក្រុងសៀមរាប ហើយកសាងសំណុំរឿងបញ្ជូនទៅតុលាការ។
ជនសង្ស័យម្នាក់ដែលជាមុខសញ្ញាចែកចាយគ្រឿងញៀនដ៏សកម្មនៅក្នុងក្រុងសៀមរាប ដែលត្រូវបានសមត្ថកិច្ចធ្វើការឃាត់ខ្លួនបាននេះមាន ឈ្មោះ រិន រ៉ា ភេទ ប្រុស អាយុ២០ឆ្នាំ មានទីលំនៅក្នុងភូមិ ខាងលើ ។ លោកវរសេនីយ៍ ត្រី អុំ សាអាត ឲ្យដឹងថា ជនសង្ស័យម្នាក់នេះជាមុខសញ្ញាចែកចាយគ្រឿងញៀនដែលសមត្ថកិច្ចធ្វើការតាមដានជាយូរមកហើយ ៕
.jpg)
.jpg)
