Khmer
English
Chinese
Frence
Vietnamese
Thaiមានអ្នករត់ការចង់ដោះលែងឪពុកនិងកូនប្រុសប្រើអាវុធច្នៃខុសច្បាប់
ដោយ ៖ សហការី|ថ្ងៃទី 07 កុម្ភះ 2013 ម៉ោង 08:44:43
ខេត្ដសៀមរាប ៖ តាមប្រភពព័ត៌មាន បានបង្ហើបឱ្យដឹងថា ឪពុកនិងកូនដែល ជាប់ចោទប្រើប្រាស់អាវុធច្នៃខុសច្បាប់ និងកាប់រានព្រៃ មានគេកំពុងរត់ការ ដើម្បីដោះលែងឱ្យនៅក្រៅឃុំ ក៏ប៉ុន្ដែ អ្នករត់ការនៅពុំទាន់សម្រេចបំណងនៅ ឡើយទេ ហើយជនជាប់ចោទឪពុកកូនក៏ កំពុងស្ថិតនៅកន្លែងឃុំឃាំងនៅឡើយ ។
គួររំលឹកថា កាលពីវេលាម៉ោង១០ព្រឹក ថ្ងៃទី២៥ ខែមករា ឆ្នាំ២០១៣ សមត្ថកិច្ច នៃអធិការដ្ឋាននគរបាលស្រុកស្វាយលើ បានឃាត់ខ្លួនឪពុកកូនទាំង២នាក់នេះតាម បញ្ជាលោកព្រះរាជអាជ្ញាអមសាលា ដំបូងខេត្ដសៀមរាប នៅចំណុចវាលត្រញំង ខ្នារស្ថិតក្នុងភូមិត្រញំងខ្នារ ឃុំ-ស្រុក ស្វាយលើ ខេត្ដសៀមរាប ។
ជនសង្ស័យឪពុកឈ្មោះ អ៊ាន ឌន់ អាយុ៥៦ឆ្នាំ និងកូនប្រុសឈ្មោះ ដួង សុកាន អាយុ៣៤ឆ្នាំ ស្នាក់នៅភូមិ គោកមន ឃុំដំដែក ស្រុកសូទ្រនិគម ខេត្ដសៀមរាប ។ ជនសង្ស័យត្រូវបាន ឃាត់ខ្លួន ខណៈបានទៅដណ្ដើមកាន់កាប់ ដីរបស់ប្រជាពលរដ្ឋជាច្រើនគ្រួសារនៅ ចំណុចកើតហេតុខាងលើ ដោយរកឃើញ កាំភ្លើងកែច្នៃ១ដើមព្យួរនៅក្នុងរោង ដែលគេសង្ស័យថា រក្សាទុកដើម្បីគំរាម ដល់ពលរដ្ឋជាម្ចាស់កម្មសិទ្ធិដី ។
ក្រៅពីដកហូតកាំភ្លើងច្នៃសមត្ថកិច្ច រកឃើញរណារយន្ដ១គ្រឿង ព្រមជាមួយ កាំបិតពូថៅបម្រើឱ្យសកម្មភាពបំផ្លិច បំផ្លាញព្រៃនៅតំបន់នោះ ។ ក្រោយពីការឃាត់ខ្លួននិងដកហូតវត្ថុ តាងដូចមានខាងលើ សមត្ថកិច្ចបាន បញ្ជូនខ្លួនជនសង្ស័យទៅតុលាការនាព្រឹក ថ្ងៃទី២៧ ខែមករា ឆ្នាំ២០១៣ ហើយ លោកស្រី ឈួន សុភា ព្រះរាជអាជ្ញារង អមសាលាដំបូងខេត្ដសៀមរាប បាន សម្រេចចោទប្រកាន់ឪពុកនិងកូន២នាក់ នេះ ពីបទប្រើប្រាស់អាវុធខុសច្បាប់និង កាប់រានហ៊ុមព័ទ្ធដីព្រៃដោយខុសច្បាប់ បញ្ជូនឱ្យលោក លី សុខលេង ចៅក្រម ស៊ើបសួរនៃសាលាដំបូងខេត្ដសៀមរាប ទើបចេញដីកាឃុំខ្លួនដាក់ពន្ធនាគារ បណ្ដោះអាសន្ន រង់ចាំថ្ងៃសវនាការមក ដល់ ។
ក្រោយការឃាត់ខ្លួនឪពុកនិងកូនទាំង២នាក់ខាងលើនេះ គេបានដឹងថាមាន មនុស្ស៣-៤នាក់និងមានអតីតប្រធាន ក្រុមប្រឹក្សាឃុំមួយរូបនៅក្នុងស្រុកសូទ្រនិគម បានចេញមុខដ៏សកម្មបំណងរត់ ការឱ្យជនសង្ស័យឪពុកនិងកូនបាននៅក្រៅឃុំ ។
ទាក់ទិននឹងអតីតប្រធានក្រុមប្រឹក្សា ឃុំនៅក្នុងស្រុកសូត្រនិគមស្វះស្វែងរត់ ការដោះលែងជនប្រើប្រាស់អាវុធច្នៃនេះ ដែរ អ្នកយកព័ត៌មាននគរវត្ដនៅរសៀល ថ្ងៃទី៦ ខែកុម្ភៈ ម្សិលមិញនេះ មិនអាច ស្វែងរកការពន្យល់ពីអតីតប្រធានក្រុម ប្រឹក្សាឃុំរូបនេះបានទេ ។ ទោះជាយ៉ាង នេះក្ដី ជនជាប់ចោទឪពុកនិងកូន ពេល នេះ កំពុងស្ថិតនៅក្នុងមន្ទីរឃុំឃាំងនៅ ឡើយ តែយ៉ាងណាគេជឿថា តុលាការ នឹងមិនដោះលែងឪពុកនិងកូនទាំង២នាក់ នេះទេ ព្រោះសមត្ថកិច្ចបានប្រឹងប្រែង បង្ក្រាបអត់បាយអត់ទឹក ហើយរឿងកាប់ រានព្រៃនៅតំបន់ខាងលើ ធ្វើឱ្យប្រជាពល រដ្ឋម្ចាស់កម្មសិទ្ធិដីក៏ដូចជាអាជ្ញាធរឈឺក្បាលមិនតិចនោះដែរ ៕
