Khmer
English
Chinese
Frence
Vietnamese
Thai
បើកពិព័រណ៍ទេសចរណ៍អាស៊ាន
ដោយ ៖ វឌ្ឍនា ថ្ងៃទី 20 មករា 2011ម៉ោង 06:48:58
ភ្នំពេញ ពិព័រណ៍ទេសចរណ៍អាស៊ានបានចាប់ផ្ដើមពីថ្ងៃទី១៩ ដល់ថ្ងៃទី២១ ខែមករា ឆ្នាំ២០១១ ក្រោមអធិបតីដ៏ ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងលោកជំទាវបណ្ឌិតកាលពីរាត្រីថ្ងៃទី១៨ ខែមករា ឆ្នាំ២០១១។
លោក ថោង ខុន រដ្ឋមន្ដ្រីក្រសួងទេសចរណ៍ថ្លែងថា ពិព័រណ៍ទេសចរណ៍អាស៊ាននេះ គឺជាការជួបជុំគ្នាដ៏ធំបំផុត រវាងប្រតិបត្ដការទេសចរណ៍ ក្នុងនោះមានអ្នកលក់ប្រមាណជាង១ពាន់នាក់ស្មើនឹង៥១១ស្ដង់ មកពីផ្នែកសណ្ឋាគារ ក្រុមហ៊ុនអាកាសចរណ៍ ប្រតិបត្ដិការទេសចរណ៍ និងទីភ្នាក់ងារទេសចរណ៍នៃប្រទេសជាសមាជិកអាស៊ាន។ អ្នកទិញចំនួន៤៦៦នាក់ មកពីតំបន់អាស៊ាន អាស៊ី អឺរ៉ុប អាមេរិក និងក្រុមបណ្ដាញសារព័ត៌មានជាតិ និងអន្ដរជាតិជាច្រើនរូបទៀត។
ក្នុងថ្ងៃដំបូងបើកពិព័រណ៍អាស៊ានម្សិលម្ង៉ៃ ទទួលបានភ្ញៀវជាតិនិងអន្ដរជាតិចូលរួមទស្សនាយ៉ាងច្រើនកុះករ។ ច្រកចូលដែលរចនាជាខ្លោងទ្វារប្រាសាទបាយ័នដ៏ធំ មានការចាប់អារម្មណ៍ខ្ពស់ ដែលធ្វើឱ្យភ្ញៀវរំភើបប្រៀបបាននឹងការចូលទស្សនាប្រាសាទផ្ទាល់ ហើយរឹតតែបង្កើនអារម្មណ៍អ្នកទស្សនាចង់ទស្សនាផ្ទាល់នូវទស្សនីយភាពពិតជាក់ស្ដែងបន្ថែមទៀត។ ស្ដង់បង្ហាញផលិតផល សេវាកម្មដ៏ច្រើនសន្ធឹកសន្ធាប់ កំពុងរៀបចំប្រកបដោយសណ្ដាប់ធ្នាប់ ប៉ុន្ដែអ្វីដែលធ្វើឱ្យអ្នកទស្សនាមិនជិនណាយ គឺស្ដង់ពិព័រណ៍របស់កម្ពុជាដែលបានដាក់តាំងលម្អនូវរូបរាងប្រាសាទបន្ទាយស្រី ប្រកបដោយក្បូរក្បាច់រចនាល្អវិចិត្រ។
លោក ទិត ចន្ថា អគ្គនាយកទេសចរណ៍ នៃក្រសួងទេសចរណ៍ប្រាប់ថា ការរៀបចំទទួលនិងបង្ហាញទាំងអស់ គឺទទួលបានការកោតសរសើរខ្ពស់ពីគ្រប់មជ្ឈដ្ឋាន ហើយជាមោទនភាពសម្រាប់ជាតិខ្មែរផងដែរ។ ការតាំងពិព័រណ៍នេះ នឹងបន្ដចូលរួមផ្សព្វផ្សាយឱ្យមានកាន់តែមានកំណើនភ្ញៀវបន្ថែមទៀតមកកម្ពុជា។ លោកបញ្ជាក់ថា ឆ្នាំ២០១០ កម្ពុជាទទួលបានភ្ញៀវទេសចរ២,៥នាក់ ហើយតាមគម្រោងកម្ពុជានឹងរំពឹងទទួលបានភ្ញៀវទេសចរកើនដល់ពី៤-៥លាននាក់ នៅឆ្នាំ២០១៥ និង៧លាននាក់ នៅឆ្នាំ២០២០។
លោកប្រាប់ថា កម្ពុជារកចំណូលជាតិបានប្រមាណ១,៥០០លានដុល្លារក្នុងឆ្នាំ ២០០៩ និង១៧០០លានដុល្លារក្នុង ឆ្នាំ២០១០ និងអាចឈានដល់២៥០០ លានដុល្លារនៅពេលខាងមុខ។ លោកបញ្ជាក់ថា ពេលនេះកម្ពុជាមានមាស៣គឺមាសស គឺអង្ករ មាសខ្មៅ គឺប្រេង និងមាសបៃតង គឺវិស័យទេសចរណ៍នេះឯង៕
.jpg)
