Khmer
English
Chinese
Frence
Vietnamese
Thaiត្រកូលកំណាញ់
ដោយ ៖ |ថ្ងៃទី 12 កុម្ភះ 2011 ម៉ោង 17:02:38
មានតាកំណាញ់ម្នាក់មានកូនប្រសាប្រុសពីរនាក់ ក៏ជាអ្នកម៉ៅស្វិតដូច គាត់ដែរ ។ ជាធម្មតា តាមទំនៀមទម្លាប់ក្នុងថ្ងៃបុណ្យចូលឆ្នាំថ្មី កូនៗត្រូវយក ជំនូនមកជូនឪពុកម្ដាយរបស់ខ្លួន និងឪពុកម្ដាយក្មេក ។ កូនប្រសាទាំងពីរនាក់ នេះ ទោះជាកំណាញ់យ៉ាងណាក៏មិនអាចបំភ្លេចប្រពៃណីនេះបានដែរ តែគេ ម្នាក់ៗខិតខំរិះគិតធ្វើយ៉ាងណាឱ្យអស់ប្រាក់យ៉ាងតិចបំផុត ។
កូនប្រសាច្បងរកទិញបានគំនូរពណ៌ដ៏វិចិត្រមួយផ្ទាំង ពោលគឺមានរូបគោ ជ្រូក មាន់ ទា ផ្លែឈើ ស្រា ។ល។ រួចនាំប្រពន្ធខ្លួនទៅកាន់ផ្ទះឪពុកក្មេក ។ ពេល កូនប្រសាច្បងមកដល់ផ្ទះឪពុកក្មេក កូនប្រសាប្អូនក៏មកដល់ល្មម ដោយមាន លាក់វត្ថុអ្វីមួយក្នុងអាវផង។ តាកំណាញ់អង្គុយលើក្ដារងឿយ៉ាងសមរម្យ ដើម្បី រង់ចាំទទួលជំនូនរបស់កូនប្រសាទាំងពីរ ។
គាត់និយាយទៅកាន់កូនប្រសាច្បង៖
- កូនបានអ្វីមកជូនពុក ?
កូនប្រសាច្បងឆ្លើយ៖
- ឆ្នាំនេះ កូនក្រណាស់ពុកអើយ ! កូនមានតែគោបួននឹម ជ្រូកមួយគូ មាន់ ទា ផ្លែឈើ និងស្រាតែប៉ុណ្ណោះទេយកមកជូនពុក ដូច្នេះសូមពុកមេត្ដាទទួលយក ជំនូនដ៏សាមញ្ញទាំងនេះ ព្រមទាំងឱ្យពរសព្ទសាធុការយ៉ាងកក់ក្ដៅពីសន្ដានចិត្ដ កូន នៅឱកាសចូលឆ្នាំថ្មីនេះផងចុះ !
និយាយចប់ នាយក៏យកផ្ទាំងគំនូរពីក្នុងហោប៉ៅចេញមក ហើយទ្រដោយដៃ ទាំងពីរ លើកទៅជូនឪពុកក្មេក ។
តាកំណាញ់ទទួលយកហើយនិយាយទាំងក្ដីរំភើបថា៖
-ប្រសើរណាស់ ពុកត្រេកអរណាស់ ។ ប៉ុន្ដែពុកសូមរំលឹកកូនបន្ដិច ដ្បិតកូន ក្រយ៉ាងហ្នឹងហើយនៅតែខំទិញរបស់របរច្រើនម្លឹងៗមកជូនពុក តាមគំនិតពុក គឺកូនមិនទាន់ចេះសន្សំសំចៃ រួចគាត់ក៏បែរមករកកូនប្រសាប្អូន៖
-ចំណែកកូនខាងនេះ តើបានអ្វីជូនពុកដែរ ?
ពេលនោះកូនប្រសាប្អូនក៏រំកិលខ្លួនចូលជិតឪពុកក្មេករួចលូកយកមែកឈើ មួយកំណាត់ ដែលនាយខំលាក់ក្នុងអាវចេញមកគូសវាសយ៉ាងរហ័សលើផ្ទៃដី នូវរូបសត្វផ្សេងៗ និងផ្លែឈើនានាដែលមានមាឌធំៗជាងគំនូររបស់កូនប្រសា ច្បងទៅទៀត ។
- នេះពុក ទាំងអស់នេះគឺជារបស់របរដែលកូនសូមជូនពុក ព្រមទាំងសព្ទ សាធុការពររបស់កូនក្នុងឱកាសចូលឆ្នាំថ្មីនេះ ។ សូមពុកអភ័យទោសឱ្យកូនផង ដោយមកពីទីធ្លាផ្ទះពុកតូចពេកកុំអីកូនយកគោ ជ្រូក មាន់ ទាធាត់លើសនេះ ទៀតមកជូនពុក ។
-ប្រពៃណាស់ (ឪពុកក្មេកនិយាយ) ឯងពិតជាមានគំនិតជឿនលឿនជាងបងឯង ច្រើនណាស់ ។ ប៉ុន្ដែពុកឃើញថា កូនក៏នៅតែមិនទាន់ចេះសន្សំសំចៃដែរ ។ ចំណែកពុកដើម្បីតបទៅនឹងកតញ្ញូតារបស់កូនៗ ពុកសូមអញ្ជើញកូនសំឡាញ់ ទាំងអស់ផឹកស្រាមួយកែវម្នាក់ជាមួយពុកណា !
ពោលចប់ គាត់ធ្វើកាយវិការដូចជាចាក់ស្រាដាក់កែវរូចលើកឡើងផឹកមួយ ក្អឹកយ៉ាងឆ្ងាញ់ ។ កូនប្រសាទាំងពីរក៏ឧទានតិចៗថា តានេះសមជាឪពុកក្មេកខ្លួន មែន ពោលគឺមហាកំណាញ់ផុតលេខតែម្ដង ៕
