បារមីប្រាសាទព្រះវិហារ

ដោយ​ ៖ ទិល ចាន់លីន ថ្ងៃទី 09 មីនា 2011ម៉ោង 11:05:31

                                    (បទកាកគតិ)

-ឆ្លងរាល់សម័យ         កាត់វិនិច្ឆ័យ               ពីកិច្ចលោកា

ឈររាប់សម័យ           លើបព្វតា                 ដងរែករដ្ឋា

                             រន្ធឺល្បាញល្បី ។

-ថ្មត្រួតលើគ្នា             ក្បូរក្បាច់សោភា         ឆើយឆាយប្រិមប្រិយ

ដុះស្លែរុំប្រាណ           អាប់ពណ៌ថ្មខ្ចី            ឈរលើទឹកដី

                             ខ្មែរក្លាយសួគ៌ា ។

-អំពើឈ្លានពាន         សៀមបោះជំហាន       ដាក់កងយោធា

ឈ្លានពានទឹកដី         និងប្រាង្គវិហារ            សៀម-ខ្មែរបាញ់គ្នា

                             រងគ្រោះប្រាង្គប្រា ។

-សៀមបាញ់រយគ្រាប់   បាញ់ច្រើនសន្ធាប់       ដំណំក្រៃណា

តែប្រាង្គនៅឈរ          មាំមួនអស្ចារ្យ             បារមីចេស្ដា

                             ប្រាសាទក្លាខ្លាំង ។

-ខ្មែរសូមបារមី            ប្រាសាទបូរី               ជួយជាកម្លាំង

ឫទ្ធីចេស្ដា                 ឱ្យខ្មែរតតាំង              ឈ្នះក្នុងចម្បាំង

                             សៀមល្មើសលោកា៕

                                         (សិស្សសមាគមអ្នកនិពន្ធខ្មែរ)