Khmer
English
Chinese
Frence
Vietnamese
Thai
ក្រោយរលកយក្សស៊ូណាមិ អ្នកទេសចរជប៉ុនមកកាន់ខេត្ដសៀមរាបថយចុះ
ដោយ ៖ ជា ស្រស់ ថ្ងៃទី 18 មីនា 2011ម៉ោង 15:55:48
ខេត្ដសៀមរាប៖ មន្ដ្រីជាន់ខ្ពស់ខេត្ដសៀមរាប និងទីភ្នាក់ងារទេសចរណ៍បានឱ្យដឹងថា ភ្ញៀវទេសចរជនជាតិជប៉ុនមួយចំនួនបានលុបចោលដំណើរកំសាន្ដរបស់ពួកគេនៅខេត្ដនេះ។ បន្ទាប់ពីមានវិបត្ដិគ្រោះរញ្ជួយដី និងរលកយក្សស៊ូណាមិ បានវាយលុកប្រទេសជប៉ុនកាលពីថ្ងៃទី១១ ខែមីនា នេះ។
ថ្លែងប្រាប់អ្នកកាសែតនៅឯពិធីបើកការដ្ឋានសាងសង់ផ្លូវក្រាលកៅស៊ូមួយ ខ្សែជាជំនួយរបស់សាធារណរដ្ឋកូរ៉េ កាលពីថ្ងៃទី១៧ មីនា អភិបាលខេត្ដ សៀមរាបលោក ស៊ូ ភិរិន្ទ មានប្រសាសន៍ ថា ភ្ញៀវទេសចរជប៉ុនបានលុបចោល ការធ្វើដំណើរមកកាន់ខេត្ដសៀមរាបស្ទើរ តែទាំងស្រុង។ បន្ទាប់ពីប្រទេសមហា អំណាចសេដ្ឋកិច្ចមួយនេះជួបវិបត្ដិ គ្រោះធម្មជាតិ ។ លោកបានបន្ដថា ដោយសារតែបញ្ហាភ្ញៀវទេសចរជប៉ុន មានការថយចុះបែបនេះ នៅតាមសណ្ឋាគារ មួយចំនួនក្នុងក្រុងសៀមរាប បានបញ្ចុះ តម្លៃសេវាកម្មរបស់ខ្លួនមកដល់កម្រិតទាប ស្ទើរតែស្មើនឹងតម្លៃផ្ទះសំណាក់ ដើម្បីយិតយោងស្ថានភាពភ្ញៀវទេសចរ ដែលកំពុងមានការធ្លាក់ចុះនេះ ។
ជាមួយនឹងការលើឡើងរបស់អភិបាល ខេត្ដនេះ ប្រធានសមាគមទីភ្នាក់ងារ ទេសចរណ៍កម្ពុជា (កាតារ៍ ) លោកអាង គឹមអៀង បានទទួលស្គាល់ថា ភ្ញៀវ ទេសចរជប៉ុនប្រមាណជាង១០ភាគរយ បានលុបកម្មវិធីដើរកំសាន្ដរបស់ពួកគេមកកាន់ខេត្ដសៀមរាប។ លោកបន្ដថា ការដែលអ្នកដើរលេងជប៉ុនលុបចោល ការមកទស្សនាខេត្ដសៀមរាបនេះដោយសារតែប្រទេសជប៉ុនរបស់ពួកគេជួប នូវវិបត្ដិគ្រោះរញ្ជួយដី និងរលកយក្ស ស៊ូណាមិដ៏ធ្ងន់ធ្ងរ កាលពីថ្ងៃសុក្រសបា្ដហ៍ ទីពីរនៃខែមីនាកន្លងទៅនេះ ។
បើទោះបីជាភ្ញៀវទេសចរជប៉ុនបានលុបកម្មវិធីដើរកំសាន្ដខ្លះមកកាន់ ប្រទេសកម្ពុជាក៏ដោយ លោកអាង គឹម អៀង បានថ្លែងបញ្ជាក់ថា កត្ដាទាំងនេះ វាមិនទាក់ទងនឹងនយោបាយទេសចរណ៍ជាតិនោះទេ។ តែវាបណ្ដាលមកពីគ្រោះ មហន្ដរាយដែលបានវាយប្រហារនៅ ប្រទេសមហាអំណាចសេដ្ឋកិច្ចអាស៊ី មួយនេះ និងស្របពេលដែលរដូវកាល ភ្ញៀវខ្ពស់ជិតរំកិលផុតទៅ ។
នាយកគ្រប់គ្រងក្រុមហ៊ុនទេសចរណ៍អេប៉ិចបំរើសេវាកម្មភ្ញៀវទេសចរជប៉ុន ខេត្ដសៀមរាប លោកមយូរ៉ា គីរីវុធ បានប្រាប់អ្នកកាសែតតាមទូរស័ព្ទថា ភ្ញៀវទេសចរជប៉ុនពិតជាមានកាថយចុះមែនតែមិនច្រើននោះទេ។ បើយើង ប្រៀបធៀបទៅនឹងឆ្នាំកន្លងទៅក្នុងរយៈពេលដូចគ្នាឃើញថា មានការធ្លាក់ចុះ ប្រមាណជាង១០ភាគរយប៉ុណ្ណោះ។
លោកនាយកគ្រប់គ្រងរូបនេះបាន បញ្ជាក់ថា ភ្ញៀវទេសចរជប៉ុនដែលផ្អាក ធ្វើដំណើរមកកាន់ប្រទេសកម្ពុជាភាគ ច្រើនប្រជាជនជប៉ុនដែលរស់នៅតំបន់ ខាងកើតឆៀងខាងជើងនៃប្រទេស ជា តំបន់ដែលទទួលរងគ្រោះធម្មជាតិរលក យក្សស៊ូណាមិនេះ ។ លោកបានបន្ដថា ជាពិសេសប្រជាជនរស់នៅទីក្រុងតូក្យូ តែម្ដងដែលភាគច្រើនបានលុបកម្ម វិធីដីរកំសាន្ដ ដោយសារតែពេលនេះ ពួកគេកំពុងតែចូលរួមរំលែកទុក្ខព្រួយ ចំពោះប្រជាជនរបស់គេដែលស្លាប់ ដោយសារតែគ្រោះធម្មជាតិនេះ ។
ពាក់ព័ន្ធនឹងចំនួនភ្ញៀវទេសចរជប៉ុន ប្រធានមន្ទីរទេសចរណ៍ខេត្ដសៀមរាប លោកង៉ូវ សេងកាក់ បានឱ្យដឹងថា លោកបានចាត់ឱ្យមន្ដ្រីចុះស្រង់ទិន្នន័យ តាមក្រុមហ៊ុនទេសចរណ៍ហើយដើម្បី រាយការណ៍ជូនក្រសួង ។ លោកបានបន្ដ ថា នៅខេត្ដសៀមរាបមានក្រុមហ៊ុន ទេសចរចំនួន៨ ដែលបំរើសេវាកម្ម ជាមួយអ្នកទេសចរជនជាតិជប៉ុន ។
គួររំលឹកថា កាលពីថ្ងៃសុក្រសបា្ដហ៍ ទីពីរ នៃខែមីនាកន្លងទៅនេះ គ្រោះធម្ម ជាតិរលកយក្ស ស៊ូណាមិ បានវាយ ប្រហារទៅលើតំបន់ឦសានរបស់ប្រទេស មហាសេដ្ឋកិច្ចអាស៊ី (ជប៉ុន ) បណ្ដាលឱ្យ ទីក្រុងមួយចំនួននៃប្រទេសនេះ ទទួលរង ខ្ទេចខ្ទាំយ៉ាងធ្ងន់ធ្ងរ និងផ្ដាច់ជីវិតមនុស្ស ដែលគេប៉ានប្រមាណថាមានរហូតដល់ ទៅជាងមួយម៉ឺននាក់ ព្រមទាំងបាត់ខ្លួន យ៉ាងច្រើនសន្ធឹកសន្ធាប់ផងដែរ ៕
.jpg)
