Harry Kaneនៅមានសង្ឃឹមប្រជែងយកស្បែកជើងមាសពីMohamed Salah

ខ្សែប្រយុទ្ធ Harry Kane របស់ក្រុមមាន់ខ្នាយមាសនៅមានសង្ឃឹម ប្រជែងយកស្បែកជើងមាសពីខ្សែប្រយុទ្ធក្លិបហង្សក្រហម Liverpool គឺMohamed Salah។

កីឡាករសញ្ជាតិអង់គ្លេសវ័យ២៤ឆ្នាំ Harry Kane ធ្លាប់បានទទួលពានរង្វាន់ ស្បែកជើងមាស សម្រាប់ការរកគ្រាប់បាល់ច្រើនជាងគេនៅក្នុងក្របខ័ណ្ឌកំពូលអង់គ្លេស រយៈពេល២ឆ្នាំជាប់ៗគ្នា ហើយគាត់នៅតែមានសង្ឃឹមថា នឹងអាចទទួលបានជាលើកទី៣ នៅក្នុងរដូវកាលនេះ។ ប៉ុន្តែ Harry Kane ត្រូវបានតាមពីក្រោយគ្រាប់បាល់របស់កីឡាករ Mohamed Salahរហូតដល់ទៅ៥គ្រាប់ ខណៈការប្រកួតនៅសល់តែ៦ប្រកួតទៀតប៉ុណ្ណោះ។

Harry Kane ដែលរកបាន២៤គ្រាប់ហើយក្នុងរដូវកាលនេះ បានប្រាប់សារព័ត៌មាន អង់គ្លេសថា “ខ្ញុំនៅតែជឿថាខ្ញុំអាចធ្វើបាន។ នៅមានការប្រកួតច្រើនទៀត។ ជាការពិតណាស់ក្នុងនាមជាកីឡាករម្នាក់ តែងតែចង់ស៊ុតបាល់បញ្ចូលបានច្រើនហើយ ឈ្នះពានរង្វាន់ស្បែកជើងមាស” ។

នៅពេលជាមួយគ្នានេះTottenham Hotspur បាន​ប្ដឹង​ឧទ្ធរណ៍​ទៅ​គណៈកម្មការ​រៀប​ចំ​ការ​ប្រកួត​លីក​កំពូល​អង់គ្លេស​ រឿង​គ្រាប់​បាល់​របស់​ខ្សែ​ប្រយុទ្ធ​ Harry Kane។​មាន់​ខ្នាយ​មាស​បាន​យក​ឈ្នះ​ Stoke City ២​ទល់​នឹង​១​ កាល​ពី​សប្ដាហ៍​មុន​ស៊ុត​បញ្ចូល​ទី​ដោយ​ Christian Eriksen និង​ Harry Kane។ យ៉ាង​ណា​គ្រាប់​ទី​ពីរ​ត្រូវ​ Premier League ផ្ដល់​ឲ្យ​ Eriksen វិញ​ដោយ​សារ​ខ្សែ​ប្រយុទ្ធ​រូប​នេះ​ជា​អ្នក​លើក​បាល់​ Free Kick ចូល​ទី​ហើយ​មិន​ច្បាស់​ថា​បាន​ប៉ះ​ក្បាល​របស់​ Kane ឬ​ក៏​អត់​នោះ​ទេ។​

បណ្ដឹង​របស់​ Spurs ធ្វើ​ឲ្យ​ Premier League ពិនិត្យ​គ្រាប់​ទី​ពីរ​នោះ​ម្ដង​ទៀត​ ហើយ​បើ​គេ​ផ្ដល់​ឲ្យ​ទៅ​ Harry Kane មាន​ន័យ​ថា​ខ្សែ​ប្រយុទ្ធ​សញ្ជាតិ​អង់គ្លេស​នឹង​កើន​ចំនួន​គ្រាប់​បាល់បញ្ចូល​ទី​ដល់​២៥គ្រាប់​ ចាញ់​ Mohamed Salah ដែល​នាំ​មុខ​ក្នុង​តារាង​ស្បែក​ជើង​មាស​ចំនួន​៤​គ្រាប់។

ខាងក្រោមនេះគឺជាតារាងរបស់កីឡាករដែលស៊ុតបាល់បានច្រើនជាងគេនៅអង់គ្លេស Premier League គិតត្រឹមប្រកួតទី៣២៖