សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានរងរបួសធ្ងន់បន្ទាប់ពីជិះម៉ូតូចេញពីផ្លូវលំឡើងលើផ្លូវជាតិមិនគោរពសិទ្ធិអាទិភាពត្រូវរថយន្តមួយគ្រឿងមិនស្គាល់ម៉ាកបើកបុកយ៉ាងពេញទំហឹងលាន់សូរដូចរន្ទះបង្កការភ្ញាក់ផ្អើលដល់អ្នកភូមិរាយការណ៍មកសមត្ថកិច្ចទាំងយប់។
ហេតុការណ៏នេះបានកើតឡើងកាលពីវេលាម៉ោង៨និង៤០នាទីយប់ ថ្ងៃទី២៤ ខែធ្នូ ឆ្នាំ២០២០ស្ថិតក្នុងភូមិសង្គម ឃុំគគីរសោម ស្រុកស្វាយទាប ខេត្តស្វាយរៀង ។
សមត្ថកិច្ចនគរបាលស្រុកបានឲ្យដឹងថាបុរសរងគ្រោះមានឈ្មោះម៉ាញ់ អាយុ ៣៤ឆ្នាំ មុខរបរកសិករ រស់នៅភូមិកំពោតទូក ឃុំគគីរសោម ស្រុកស្វាយទាប ខេត្តស្វាយរៀងជិះម៉ូតូម៉ាកហុងដា វ៉េវ ពណ៌ខ្មៅ ពាក់ស្លាកលេខស្វាយរៀង ១J. ៦៧៦៥ខូចខាតទាំងស្រុង។
ចំណែកអ្នកបើកបររថយន្តមិនត្រូវបានស្គាល់ឈ្មោះនោះទេក្រោយពីកើតហេតុបានបើករថយន្តគេចខ្លួនភ្លាមៗទៅទិសខាងលិច។
ប្រភពបន្តទៀតថាមុនពេលកើតហេតុមានបុរសម្នាក់បានជិះម៉ូតូមួយគ្រឿងចេញពីផ្លូវលំឡើងលើផ្លូវជាតិឆ្លងកាត់ថ្នល់ពីជើងទៅត្បូងមិនគោរពសិទ្ធិអាទិភាពស្រាប់តែមានរថយន្តមួយគ្រឿង មិនស្គាល់ម៉ាកបានបើកពីកើតទៅលិចហើយជាន់ហ្វ្រ័ងមិនទាន់ក៏បុកគ្នាយ៉ាងពេញទំហឹងបង្កការភ្ញាក់ផ្អើលដល់អ្នកភូមិទាំងយប់តែម្ដង។
បន្ទាប់ពីកើតហេតុអ្នករងរបួសធ្ងន់ត្រូវបានសមត្ថកិច្ច បញ្ចូនទៅព្យាបាលនៅមន្ទីរពេទ្យខេត្តស្វាយរៀងនិងវាស់វែងអូសយក ម៉ូតូយកមករក្សាទុកនៅប៉ុស្តិ៍រដ្ឋបាលឃុំគគីរសោមដោះស្រាយពេលក្រោយ ។
សមត្ថកិច្ចនគរបាលបញ្ជាក់ថាមូលហេតុដែលបង្កអោយមានករណីគ្រោះថ្នាក់ចរាចរណ៍នេះកើតឡើងដោយសារម៉ូតូចេញពីផ្លូវលំឡើងទៅកាន់ផ្លូវជាតិ(មិនគោរពសិទ្ធិអាទិភាព)៕យឹម សុថាន
