សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងពិធីស្រោចស្រពព្រះសុគន្ធវារី «ប្រគេនសម្តេច និងព្រះមន្ត្រីសង្ឃជាន់ខ្ពស់នៃគណៈមហានិកាយ នៅព្រះរាជា ណាចក្រកម្ពុជា» នាព្រឹកថ្ងៃទី១៧ ខែវិច្ឆិកា ឆ្នាំ២០២៣នេះ បានលើកឡើងថា ប្រជាពលរដ្ឋកម្ពុជាមានសិទ្ធិសេរីភាពពេញលេញក្នុងការគោរពសាសនាតាមជំនឿរបស់ខ្លួន។
សម្ដេចធិបតី ថា គ្រប់សាសនាទាំងអស់ សុទ្ធតែមានគោល បំណងដូចគ្នា គឺការអប់រំមនុស្ស និងអ្នកប្រតិបត្តិឱ្យប្រព្រឹត្តអំពើល្អ និងគោរពគ្នាទៅវិញទៅមក។
សម្ដេចធិបតី បានថ្លែងបញ្ជាក់ថា គ្រប់សាសនាទាំងអស់ មិនថា សាសនាព្រះពុទ្ធ, សាសនាឥស្លាម, គ្រិស្តសាសនា និងសាសនាផ្សេងទៀត សុទ្ធតែមានគោលបំណងដូចគ្នា គឺការអប់រំមនុស្ស និងអ្នកប្រតិបត្តិឲ្យមានផ្នត់គំនិត ស្មារតី សុចរិតភាព ប្រព្រឹត្តអំពើល្អ និងគោរពគ្នាទៅវិញទៅមក។
សម្តេចធិបតី ថ្លែងថា នៅកម្ពុជា មិនមានជម្លោះសាសនាទេ។ សម្ដេច ថា ការជ្រុលនិយម ទាំងនយោបាយ និងសាសនា ត្រូវតែលុបបំបាត់។
សម្ដេចធិបតី ថ្លែងបន្តថា «ដែលនេះជាមូលដ្ឋាន សម្រាប់ការរស់នៅប្រកបដោយសីលធម៌ គុណធម៌ និងការគោរពគ្នា និងសុខដុមរមនា ការកំណត់តម្លៃនៅក្នុងខ្លួន គឺជាកិច្ចការសំខាន់ ហើយជាពិសេសនៅក្នុងសម័យទំនើប នៅក្នុងសម័យដែលយើងមានជម្រើសច្រើន ជាពិសេសសម្រាប់យុវជន-យុវនារី សម្រាប់កុមារដែលនឹងក្លាយទៅជាអនាគតរបស់ប្រទេសជាតិយើង ដែលទាមទារចាំបាច់ នៅក្នុងការកំណត់នៃតម្លៃនៅក្នុងខ្លួន ឱ្យបានច្បាស់លាស់»។
សម្ដេចធិបតី ថ្លែងថា ព្រះពុទ្ធសាសនាបានចូលរួមចំណែកនៅក្នុងការរក្សាសុខសន្តិភាព និង ការអភិវឌ្ឍប្រកបដោយបរិយាបន្ន។
សម្ដេចធិបតី ថ្លែងថា បច្ចុប្បន្នកម្ពុជា មានអារាមព្រះពុទ្ធសាសនាចំនួន ៥១៣៣ វត្ត និងមាន ព្រះសង្ឃចំនួន ៦៨៩៦៧ អង្គ។
សម្ដេចធិបតី ថ្លែងថា យើងគួរមានមោទកភាព ដែលកម្ពុជាមិនមានជម្លោះសាសនា ហើយ ដែលបានធ្វើឱ្យពលរដ្ឋនៅទូទាំងប្រទេសរស់នៅដោយភាពសុខដុមជាមួយគ្នា។
សម្ដេចធិបតី ថ្លែងថា ការបញ្ចប់សង្គ្រាមតាមរយៈការអនុវត្តនយោបាយឈ្នះ ឈ្នះ របស់ សម្ដេចតេជោ ហ៊ុន សែន បានធ្វើឱ្យគ្រប់សាសនាទាំងអស់រួចពីសេចក្ដីស្លាប់។
សម្ដេចធិបតី ថ្លែងអំពាវនាវឱ្យរួមគ្នាលុបបំបាត់ឱ្យអស់ចំពោះទស្សនៈ និងគោលការណ៍ជ្រុ លនិយម ដើម្បីរក្សាការពារសុខសន្តិភាព សេរីភាព និងការរីកចម្រើននៅកម្ពុជា។
សម្ដេចធិបតី អំពាវនាវដល់ពុទ្ធបរិស័ទ និងជនរួមជាតិទាំងអស់ចូលរួមសាទររីករាយ ព្រះរាជពិធីបុណ្យអុំទូក បណ្ដែតប្រទីប និងអកអំបុកសំពះព្រះខែ ដែលនឹងចូលមកដល់នាពេលឆាប់ៗខាងមុខ នេះ។
សម្ដេចធិបតី ស្នើដល់ព្រះសង្ឃគ្រប់អង្គ ប្រតិបត្តិធម្មវិន័យឱ្យបានត្រឹមត្រូវ ដើម្បីជាគំរូ ល្អក្នុងសង្គម។
សម្ដេចធិបតីនាយករដ្ឋមន្ត្រី ស្នើដល់ព្រះសង្ឃគ្រប់អង្គ ជួយដល់សង្គមជាតិ តាមរយៈការចូលរួមអប់រំ លើកកម្ពស់គុណធម៌ សីលធម៌ និងសុជីវធម៌ ដើម្បីសង្គមកម្ពុជាជៀសផុតពីអំពើមិនល្អ និងអបាយមុខ ផ្សេងៗ។
ជាមួយគ្នានេះ សម្ដេចធិបតី បានលើកឡើងថា នៅពេលដែលប្រទេសកម្ពុជាជួបការលំបាក និងចេញពីរបបខ្មែរក្រហម គឺជម្រើស និងលទ្ធភាពនៅក្នុងការទទួលបាននូវការអប់រំ ឬព័ត៌មាន ឬមួយការទទួលនូវលទ្ធភាពតាមបែបផែនសម្ភារៈនិយម មិនទាន់មានច្រើន។ ដូច្នេះ ជម្រើសនៃការអប់រំនាពេលនោះ គឺផ្តោតខ្លាំងទៅលើការរៀនសូត្រ ទៅលើការបំពេញតួនាទីជាកូនល្អ និងជាសិស្សល្អ៕
ដោយ៖សហការី
