សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ ៖ ការគិតប្លែកៗខ្វះការគិតពិចារណា ក្លាយទៅជាលំនាំគុំកួន ធ្វើឱ្យយុវជនម្នាក់ហ៊ានលើកដៃបាញ់សម្លាប់ សាច់ញាតិរបស់ខ្លួនទាំងពីរនាក់ប្ដីប្រពន្ធចោល ដែលកើតឡើងដោយគំនុំមួយឆាវ ក្លាយជាឃាតក អាចជាប់ពន្ធនាគារអស់មួយជីវិត។
បើយោងតាមសេចក្តីរាយការណ៍បឋមឱ្យដឹងថា : មានជនដៃដល់ម្នាក់ជាប់ពាក់ព័ន្ធនឹងអំពើឃាតកម្មដ៏សាហាវ ដែលត្រូវជាក្មួយបានកែច្នៃអាវុធចំនួន២ដើមយកទៅបាញ់ប្រហារជីវិតឪពុកមានិងម្តាយមីងស្លាប់យ៉ាងអាណោចអាធ័ម ដោយសារមានគំនុំសង្ស័យថាជនរងគ្រោះចេះធ្វើអំពើអាបធ្មប់ ។
ជនសង្ស័យជាឃាតកហាក់ដូចមិនខ្លាច ភ័យព្រួយរឿងគុកច្រវាក់ បុណ្យបាប បន្ទាប់ពីសមត្ថកិច្ចឃាត់ខ្លួន។
តែទោះជាយ៉ាងណាក្តី ជនដៃដល់ជាឃាតកត្រូវបានលោកឧត្តមសេនីយ៍ទោស្នងការនគរបាលខេត្តព្រះវិហារបញ្ជាទៅលោកឧត្តមសេនីយ៍ត្រីស្នងការរងទទួលផែនការងារនគរបាលព្រហ្មទណ្ឌឱ្យដឹកនាំកម្លាំងចុះទៅសហការជាមួយលោកអធិការស្រុកសែនជ័យ និងប៉ុស្តិ៍នគរបាលមូលដ្ឋាន ធ្វើការឃាត់ខ្លួនជនសង្ស័យភ្លាមៗផងដែរ ។
សមត្ថកិច្ចបានបញ្ជាក់ថា : ជនដៃដល់ឈ្មោះ អាំ ឡាម ភេទប្រុស អាយុ២៩ឆ្នាំ មុខរបរមិនពិតប្រាកដ ដែលត្រូវជាក្មួយជនរងគ្រោះឈ្មោះ រស់ គឿ ភេទប្រុស អាយុ៦៧ឆ្នាំ (ត្រូវជាឪពុកមា បានបាត់បង់ជីវិត) និងឈ្មោះ មាស រី ភេទស្រី អាយុ៥៩ឆ្នាំ (ត្រូវជាម្តាយមីងបានបាត់បង់ជីវិត) ។ ជនរងគ្រោះទាំងពីរនាក់ជាប្តីប្រពន្ធ មានមុខរបរជាកសិករ រស់នៅភូមិធ្មា ឃុំធ្មា ស្រុកជ័យសែន ខេត្តព្រះវិហារ ។
សេចក្តីរាយការណ៍បានឱ្យដឹងទៀតថា : កាលពីវេលាម៉ោង៣និង៣០នាទីថ្ងៃទី២៧ ខែវិច្ឆិកា ឆ្នាំ២០២៣ កន្លងទៅ មានករណីអំពើឃាតកម្មគិតទុកជាមុនមួយ បានកើតឡើងនៅចំណុចបុស្សល្ហុង ជាចម្ការរបស់ជនរងគ្រោះ ស្ថិតនៅភូមិធ្មា ឃុំធ្មា ស្រុកជ័យសែន ខេត្តព្រះវិហារ ដែលបង្កដោយជនសង្ស័យត្រូវជាក្មួយ បានប្រើប្រាស់អាវុធកែច្នៃចំនួន២ដើម យកទៅបាញ់ប្រហារជីវិតជនរងគ្រោះជាឪពុកមា ត្រូវចំចង្កេះខាងស្តាំធ្លាយទៅខាងឆ្វេង បណ្តាលឱ្យស្លាប់នៅនឹងកន្លែងកើតហេតុ ។ បន្ទាប់មកជនសង្ស័យបានស្ទុះទៅដេញតាមបាញ់ប្រហារជីវិតម្តាយមីងម្នាក់ទៀត ត្រូវចំដើមដោះខាងស្តាំធ្លាយទៅក្រោយ បណ្តាលឱ្យស្លាប់ក្នុងចម្ការទាំងពីរនាក់ប្តីប្រពន្ធ ។ មូលហេតុ ដោយសារជនដៃដល់មានគំនុំថាជនរងគ្រោះចេះអំពើធ្មប់ ។
ក្រោយឃាត់ខ្លួន ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ។
សូមបញ្ជាក់ថា : ការប្រព្រឹត្តបទល្មើស មជ្ឈិម ឧក្រិដ្ឋខ្លះកើតឡើងដោយការគិតខ្លី ខ្វះការពិចារណា ឬប្រើប្រាស់សារធាតុញៀនធ្វើឱ្យជនដៃដល់ហ៊ានប្រព្រឹត្ត ។ ជាក់ស្ដែងដូចជាករណីនេះ ឃាតកមិនគួរណាហ៊ានលើកដៃយកកាំភ្លើងកែច្នៃរហូតដល់ពីរដើម បាញ់សម្លាប់ឪពុកមា និងម្ដាយមីងឱ្យស្លាប់ក្នុងថ្លុកឈាមគួរឱ្យរន្ធត់បំផុត។ ជនសង្ស័យអាចប្រឈមនឹងជាប់ពន្ធនាគារអស់១ជីវិត ព្រោះជាអំពើឃាតកម្មគិតទុកជាមុន៕
ដោយ ៖ សហការី
