សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានបេីកម៉ូតូសណ្ដោងរ៉ឺម៉កដឹកចេកជាន់ហ្វ្រ័ងមិនទាន់ជ្រុលទៅបុកពីក្រោយម៉ូតូសណ្ដោងរុឺម៉កដឹកក្ដារកុងផ្លាកេពេញទំហឹងបណ្ដាលឱ្យអ្នកបើកបរទាំងសងខាងរងរបួស (ម្នាក់បាក់ដៃ ម្នាក់បាក់ជេីង) កាលពីវេលាម៉ោង ១១និង៤០នាទីព្រឹកថ្ងៃទី០៨ ខែមករា ឆ្នាំ២០២៤ ស្ថិតនៅតាមផ្លូវលេខ២១៧ ភូមិបារគូ សង្កាត់ដង្កោ ខណ្ឌដង្កោ។
បេីតាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេបានឃើញបុរសម្នាក់វ័យចំណាស់ បានបើកម៉ូតូសណ្ដោងរ៉ឺម៉កដឹកចេកពេញធ្វើដំណើរតាមបណ្ដោយផ្លូវលេខ២១៧ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ក៏មានម៉ូតូសណ្ដោងរុឺម៉កដឹកក្ដារកុងផ្លាកេមួយគ្រឿងទៀតបើកបរដោយបុរសម្នាក់ធ្វើដំណើរស្របទិសគ្នាមកពីក្រោយបានបើកវ៉ាជែងរុឺម៉កដឹកចេក តែដោយសភាពផ្លូវជំរាលផ្អៀងក៏រេចង្កូតទៅខាងស្ដាំចូលគន្លងផ្លូវរុឺម៉កដឹកចេក ពេលនោះបុរសវ័យចំណាស់បេីកម៉ូតូសណ្ដោងរ៉ឺម៉កដឹកចេកជាន់ហ្វ្រ័ងមិនទាន់ជ្រុលទៅបុកពីក្រោយគាបជាប់គ្នាបណ្ដាលឱ្យបុរសវ័យចំណាស់ខាងរុឺម៉កដឹកចេករបួសបាក់ជើងខាងឆ្វេង និងបុរសបើករុឺម៉កដឹកក្ដារកុងផ្លាកេបាក់ដៃខាងស្ដាំត្រូវបានរថយន្តមន្ទីរពេទ្យបង្អែកដង្កោដឹកទៅជួយសង្រ្គោះនៅមន្ទីរពេទ្យរុស្សី។
ក្រោយកើតហេតុ សមត្ថកិច្ចមូលដ្ឋានសហការជាមួយជំនាញចរាចរណ៍ខណ្ឌដង្កោ បានចុះទៅធ្វេីការវាស់វែងយកម៉ូតូសណ្ដោងរុឺម៉កទាំង២គ្រឿងទៅរក្សាទុកនៅការិយាល័យចរាចរណ៍ខណ្ឌដង្កោ រង់ចាំដោះស្រាយនៅពេលក្រោយ៕
ដោយ ៖ ភារ៉ា ដង្កោ
