សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ នគរបាលស្រុកស្វាយចេកបានឃាត់ខ្លួនមុខសញ្ញាជួញដូរនិងប្រើប្រាស់គ្រឿងញៀនប្រុសស្រី៥នាក់ជាបន្តបន្ទាប់នៅថ្ងៃទី២០ ខែមីនាឆ្នាំ២០២៤។
សមត្ថកិច្ចប្រាប់ថាៈ កម្លាំងជំនាញនៃអធិការដ្ឋាននិងកម្លាំងប៉ុស្តិ៍នគរបាលតាបែនបានចេញល្បាតដឹកនាំដោយ១- លោកវរសេនីយ៍ទោ រឿន សាយកន ឋានៈ អធិការរង, ២-លោកវរសេនីយ៍ត្រី ស៊ុន គឿត ឋានៈ អធិការរងបានចេញល្បាតនៅចំណុចស្ពានឆ្លងស្ទឹងខាងលិចភូមិគោករកា ឃុំតាបែន ស្រុកស្វាយចេក ចម្ងាយប្រហែល៤០០ម៉ែត្រ(ចំណុចស្មុគស្មាញ)បានជួបមនុស្ស០២នាក់ស្រី០១នាក់ជិះម៉ូតូ០១ គ្រឿង ។
នគរបាលស្រុកស្វាយចេកបានឱ្យដឹងទៀតថា ជនសង្ស័យដែលសមត្ថកិច្ចឃាត់ខ្លួនបានឈ្មោះ រិត សីហា (ហៅកែប)ជាមុខសញ្ញាសង្ស័យជួញដូរនិងប្រើប្រាស់គ្រឿងញៀន) ភេទប្រុស អាយុ ១៧ឆ្នាំ នៅភូមិគោកខ្វាវ ឃុំរលួស ស្រុកស្វាយចេក និងឈ្មោះ ផ្លាង ផាក់ប៊ុង ភេទស្រី អាយុ១៧ឆ្នាំនៅភូមិបត់ត្រង់ ឃុំបត់ត្រង់ ស្រុកមង្គលបុរី ខេត្តបន្ទាយមានជ័យ ។
នគរបាលបានបន្តថា: នៅពេលសមត្ថកិច្ចធ្វើការត្រួតពិនិត្យស្រាប់តែឈ្មោះ រិត សីហា បានលូកដៃឆ្វេងចូលហោប៉ៅខោខាងក្រោយផ្នែកខាងឆ្វេងបម្រុងទម្លាក់អ្វីចោលក៏ត្រូវសមត្ថកិច្ចយើងចាប់ដៃជាប់ និងរកឃើញម្សៅក្រាមពណ៌សថ្លា០១កូនថង់ និង០២ដុំទៀតមានចំនួន០៨ថង់ ឃើញនៅនឹងដីក្បែរជើងឈ្មោះ សីហាតែម្តង។
នគរបាលបញ្ជក់ទៀតថា នៅថ្ងៃខែឆ្នាំដដែលវេលាម៉ោង២៣៖៥០នាទី មានឈ្មោះ ហ៊ូ ពិដោរ (ហៅតឿ) ភេទប្រុស អាយុ២៨ឆ្នាំ នៅភូមិទ្រាស ឃុំទ្រាស ស្រុកស្វាយចេក បានទូរស័ព្ទមកកុម្មង់ទិញថ្នាំញៀនពីឈ្មោះ សីហា ក្នុងតម្លៃ ១៥.០០០ រៀល យើងក៏បានធ្វើការឃាត់ខ្លួនឈ្មោះខាងលើនៅចំណុចខ្លោងទ្វារវត្តស្លក្រាម ភូមិគោកតាឯក ឃុំតាបែន ។
យោងតាមចម្លើយសារភាពរបស់ឈ្មោះ រិត សីហា (ហៅកែប) បានឆ្លើយសារភាពថា ថ្នាំញៀន០៩កូនថង់ខាងលើគឺឈ្មោះ យ៉ុន ទីណូ ភេទប្រុស អាយុ ៣៤ឆ្នាំ នៅភូមិគោកខ្វាវ ឃុំស្វាយចេកបានអោយខ្លួនទៅយកថ្នាំញៀននៅចំណុចដីឡូត៍ថ្មីខាងលិចឃុំតាបែន ស្រុកស្វាយចេកចម្ងាយប្រហែល១០គីឡូម៉ែត្រដើម្បីយកមកលក់បន្ត។
ដោយមានបទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តនិងមានការសម្របសម្រួលពីលោកព្រះរាជាអាជ្ញាអមសាលាដំបូងខេត្ត នៅថ្ងៃទី ២១ ខែមីនា ឆ្នាំ២០២៤ វេលាម៉ោង ០៧ និង ០០ នាទី យើងក៏បានបន្តទៅឃាត់ខ្លួន ១-ឈ្មោះ យ៉ុន ទីណូ នៅភូមិឃុំខាងលើ ដោយមានវត្ថុតាង ម្សៅក្រាមពណ៌សថ្លា១៥កូនចង់ ជញ្ជីងសម្រាប់ថ្លឹងថ្នាំញៀន០១គឿង, ២-ឈ្មោះ សុភាព ភេទប្រុស អាយុ១៩ឆ្នាំ នៅភូមិរលួស ឃុំរលួស ស្រុកស្វាយចេក ។
បច្ចុប្បន្នជនសង្ស័យនិងវត្ថុតាងកម្លាំងជំនាញកំពុងរៀបចំសំណុំរឿងដើម្បីអនុវត្តតាមនីតិវិធី៕
ដោយ៖ វណ្ណា
