សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានបេីករថយន្តកាមរីបាឡែនមួយគ្រឿងបោះពួយយ៉ាងលឿនមិនប្រយ័ត្នបានរេចង្កូតទៅបុករបាំងថ្មពុះចែកទ្រូងផ្លូវបាក់ចំនួនមួយកង់ តែសំណាងល្អមិនបង្កឱ្យគ្រោះថ្នាក់ដល់មនុស្ស។
ហេតុការណ៍គ្រោះថ្នាក់ចរាចរណ៍ខាងលើនេះបង្កការភ្ញាក់ផ្អើលកាលពីវេលាម៉ោង១:៣០នាទីរំលងអធ្រាត្រឈានចូលថ្ងៃទី២៧ខែមេសាឆ្នាំ២០២៤នៅចំណុចមុខផ្សារដេប៉ូស្ថិតនៅលើផ្លូវលេខ២១៥ សង្កាត់ផ្សារដេប៉ូទី១ ខណ្ឌទួលគោករាជធានីភ្នំពេញ។
ប្រភពពីកន្លែងកើតហេតុបានឱ្យដឹងថា មុនកើតហេតុគេឃើញរថយន្តកាមរីបាឡែនពណ៌សមួយគ្រឿងពាក់ផ្លាកលេខ ភ្នំពេញ2R-0823 បើកបរដោយបុរសម្នាក់ធ្វើដំណើរតាមបណ្ដោយផ្លូវលេខ២១៥ក្នុងទិសដៅពីជើងមកត្បូងក្នុងល្បឿនលឿន ខណៈពេលបើកមកដល់ចំណុចកើតហេតុខាងលើក្បែរនឹងផ្សារដេប៉ូក៏បានរេចង្កូតទៅបុករបាំងថ្មពុះចែកទ្រូងផ្លូវចំពាក់កណ្តាលយ៉ាងពេញទំហឹងបាក់ចំនួនមួយកង់ខ្ទាតចេញពីកន្លែងដើមរងការខូចខាត ចំណែករថយន្តបង្កវិញបានដាច់កង់ខាងឆ្វេងមួយចំហៀងផ្នែកខាងមុខខូចខាតយ៉ាងដំណំ តែសំណាងល្អមិនបង្កឱ្យមានអ្នករងរបួសចំណែកអ្នកបើកបរវិញត្រូវសមត្ថកិច្ចឃាត់ខ្លួនបាននៅកន្លែងកើតហេតុ។
ក្រោយកើតហេតុសមត្ថកិច្ចមូលដ្ឋានបានចុះមកដល់ រួចក៏បានទាក់ទងទៅមន្ត្រីជំនាញចរាចរណ៍ចុះមកវាស់វែងធ្វើកំណត់ហេតុស្ទូចយករថយន្តបង្កទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំម្ចាស់រថយន្តចូលខ្លួនធ្វើការដោះស្រាយនៅពេលក្រោយ៕
ដោយ៖សុខាសែនជ័យ
