🔥រន្ធត់ចិត្ត!ស្លាប់ក្មេងស្រីតូចៗ២នាក់ ខណៈឆេះរោងចំបើងក្នុងស្រុកកំពង់រោទិ៍

ចែករំលែក៖

ខេត្តស្វាយរៀង ៖ យ៉ាងហោចណាស់មានក្មេងស្រីតូចៗ២នាក់ បានស្លាប់ ខណៈឆេះរោងចំបើង បន្ទាប់ពីជីដូន ធ្វេសប្រហែស ដោយបាន យកសំរាមនិងលាមកសត្វស្ថួតៗ ដុតពពក់ភ្លើងគោក្របីនៅស្រុកកំពង់រោទិ៍។

យោងតាមសមត្ថកិច្ចនគរបាលបានអោយដឹងនៅព្រឹកថ្ងៃទី១៥ខែមិថុនាឆ្នាំ២០២៤នេះថា ក្មេងរងគ្រោះមានឈ្មោះវីន បរមី អាយុ២ឆ្នាំភេទស្រី និងឈ្មោះ ផល រិនចេនណា ភេទស្រីអាយុ ២ឆ្នាំមានទីលំនៅភូមិឬស្សីដោច ឃុំរាជមន្ទីរ ស្រុកកំពង់រោទិ៍។

ប្រភពបន្តថាហេតុការណ៍នេះបានកើតឡើងកាលពី វេលាម៉ោង០៦និង០០នាទីល្ងាចថ្ងៃទី១៤មិថុនា២០២៤ ស្ថិតនៅភូមិឬស្សីដោច ឃុំរាជមន្ទីរ ស្រុកកំពង់រោទិ៍។

បើតាមសមត្ថកិច្ចបានឲ្យដឹងទៀតថា កុមារីរងគ្រោះទាំងពីរត្រូវម្តាយឪពុក យកមកផ្ញើរនៅផ្ទះជីដូន ដោយឪពុកម្តាយទៅធ្វើការរោងចក្រ (ហើយក្មេងទាំងពីរនាក់នេះជាបងប្អូនជីដូន១បង្កើតនិងគ្នា)គឺព្រឹកឡើងឪពុកម្តាយទាំង២គ្រួសារ តែងតែយកកូនមកផ្ញើរនិងម្តាយឲ្យជួយមើលថែ លុះពេលល្ងាចម៉ោង៦និង៣០នាទីយប់មកទទួលយកកូនៗនៅផ្ទះវិញ។

ប្រភពបន្តទៀតថា មុនពេលកើតហេតុជីដូនទុកចៅទាំងពីរឲ្យនៅក្រោមផ្ទះ ហើយក៏ទៅប្រមូលសំរាមនិងលាមកសត្វស្ថួតៗ ដុតពពក់ភ្លើងគោក្របី ខណៈនោះចៅទាំងពីរមិននៅស្ងៀមក្រោមផ្ទះទេ ក្មេងរពឹស នាំគ្នារត់លេងក្បែរជីដូនភ្លេចខ្លួនបន្តិចស្រាប់តែឃើញ អណ្តាតភ្លើងឆេះរោងដាក់ចំបើង ក៏រត់មកស្រែកហៅឲ្យគេជួយនិងរត់រកចៅទាំងពីរតែមិនឃើញ (សូមបញ្ជាក់រោងដាក់ចំបើងនោះធ្វើរានខ្ពស់ផុតពីដី និងមានជង្រុកស្រូវក្បែរគ្នាដែរ)មិននឹកស្មានទល់តែសោះថា ចៅស្រីទាំងពីរនាក់បងប្អូនបានលូនចូលក្រោមរោងចំបើង ឆេះស្លាប់ទាំងពីរអ្នកបងប្អូនបែបនេះសោះ។

ហើយពេលអ្នកស្រុកជិតខាងរត់មកដល់ខ្លះក៏ទូរស័ព្ទហៅរថយន្តពន្លត់អគ្គិភ័យអធិការដ្ឋាននគបាលស្រុកកំពង់រោទ៌ិ៍មកជួយអន្តរាគមន៍ពន្លត់ភ្លើងដែរ ក៏ប៉ុន្តែទំរាំមកដល់គឺភ្លើងចំបើងឆេះពេញក្រមុំទៅហើយបាញ់ពន្លត់២០នាទីទើបគ្រប់គ្រងបានគឺភ្លើងឆេះរោងចំបើងហើយរាលទៅឆេះជង្រុកស្រូវទៀត ពន្លត់ភ្លើងបានតែចៅៗនៅក្រោមរោងចំបើងក៏ត្រូវភ្លើងឆេះស្លាប់អស់ដែរ។

បើតាមសមត្ថកិច្ចធ្វើការសន្និដ្ឋានថា ៖

ទី១. អាចកំទេចភ្លើងប៉ើងចេញពីភ្នក់ភ្លើង មកធ្លាក់ចំរោងចំបើងបណ្តាលឲ្យឆេះ ។

ទី២. សង្ស័យថា ក្មេងៗ វារពឹសពេលជីដូនកំពុងដើរប្រមូលសំរាមនិងអុសមកដុតបំពក់នោះចៅៗនាំគ្នាអុសភ្លើងយកទៅលេងក្រោមរោងចំបើងបណ្តាលឲ្យឆេះចំបើង ហើយក្មេងៗគាត់លូនចូលលេងខាងក្រោមរោងចំបើងពេលភ្លើងឆេះក៏ឈ្លក់រកផ្លូវចេញមិនរួចក៏បណ្តាលឲ្យភ្លើងឆេះស្លាប់តែម្តង ៕