🔥ទុស្សេខ្សែភ្លើង​ ឆេះផ្ទះប្រជាពលរដ្ឋមួយខ្នងនៅស្រុកកំពង់ស្វាយ ខេត្តកំពង់ធំ​ ផ្អើលសមត្ថកិច្ចទាំងយប់

ខេត្តកំពង់ធំ៖ លោកឧត្តមសេនីយ៍ត្រី ហេង សុផល ស្នងការនគរបាលខេត្តកំពង់ធំ​ បានដឹកនាំកងកម្លាំងចុះអន្តរាគមន៍បាញ់ពន្លត់អគ្គិភ័យឆាបឆេះផ្ទះប្រជាពលរដ្ឋមួយខ្នង​ នៅស្រុកកំពង់ស្វាយ ខេត្តកំពង់ធំ​ កាលពីយប់ថ្ងៃទី២៥ ខែសីហា ឆ្នាំ២០២៤ វេលាម៉ោង ២០និង១២នាទី នៅភូមិរូង ឃុំ ត្រពាំងឬស្សី ស្រុកកំពង់ស្វាយ ខេត្តកំពង់ធំ ។

សូមជម្រាបជូនថា​ បន្ទាប់ពីទទួលបានព័ត៌មានខាងលើនេះ ភ្លាមៗនោះលោកឧត្តមសេនីយ៍ត្រី ហេង សុផល ស្នងការនគរបាលខេត្ត បានដឹកនាំកងកម្លាំង និងនាំយករថយន្ត ពន្លត់អគ្គិភ័យចំនួន ០២ គ្រឿង ចុះអន្តរាគមន៍ដល់ប្រជាពលរដ្ឋ ។ ម្ចាស់ផ្ទះឈ្មោះ ជូរ អុិត ភេទ ស្រី អាយុ៦៨ឆ្នាំ (មេម៉ាយ)រស់នៅភូមិកើតហេតុ។

សម្ភារខូចខាត៖ ១.ផ្ទះទំហំ ៦ ម៉ែត្រ គុណនិង​ ១៣ ម៉ែត្រ ដំបូល ប្រក់ក្បឿង ជញ្ជាំងក្តា រៀបឥដ្ឋក្រោម(ខូចខាតគ្រឿងឈើទាំងស្រុង), ២.ខ្សែករមាសទម្ងន់ ០៣ ជីគន្លះ, ៣. ខ្សែដៃផ្លាកទីន ០៥ជី,៤.លុយ ១,០០០,០០០រៀល, ៥.គ្រែប្រអប់ ០២ គ្រឿង, ៦.កង់អាគុយ ០១គ្រឿង, និងសម្ភារ:ប្រើប្រាស់ ក្នុងផ្ទ្ទះមួយចំនួនធំ។​ មូលហេតុ ដែលបណ្ដាលឲ្យមានអគ្គិភ័យកើតមានគឺបណ្ដាលមកពីទុស្សេខ្សែភ្លើង ។

    ក្នុងកិច្ចអន្តរាគមន៍ ករណីខាងលើនេះ កម្លាំងជំនាញអន្តរាគមន៍ខេត្តចំនួន ០៧នាក់ សហការជាមួយស្រុកចំនួន ១៥នាក់ និងប្រើប្រាស់រថយន្តពន្លត់អគ្គិភ័យ ចំនួន ០២គ្រឿង អស់ទឹកចំនួន ០៥ រថយន្ដ ស្មើនិង ៣០ ម៉ែត្រគូបទើបបានរលត់ទាំងស្រុង៕

ដោយ​៖ តារា​