សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យចំនួន៣នាក់ សុទ្ធតែមានការងារល្អធ្វើហើយ ប្រហែលជា លុយចាយមិនគ្រប់ បាននាំគ្នា ជិះម៉ូតូ ឌុបគ្នា ទៅកាច់ ក ម៉ូតូ គេ ចតនៅមុខហាងកាហ្វេ បានហើយ តែត្រូវម្ចាស់គេឃើញទាន់ ស្រែកឆោឡោ រត់គេចខ្លួនបាន២ថ្ងៃ ត្រូវសមត្ថកិច្ចឃាត់ខ្លួន។
លោក ហ៊ាង ថារ៉េត អធិការខណ្ឌឫស្សីកែវ បានអោយដឹងថា ជនរងគ្រោះឈ្មោះ ម៉ក់ ប្រុសពេជ្រអាយុ២៧ឆ្នាំ មុខរបរយោធា ស្នាក់នៅផ្ទះលេខ៤៩៣A ផ្លូវលេខ៥ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ។ ចំណែកជនសង្ស័យទាំង០៣នាក់ មានឈ្មោះតុង សុខកាង ហៅក្រៅទី អាយុ២៦ឆ្នាំ មុខរបរកម្មករ ទីលំនៅភូមិលូ សង្កាត់ស្វាយប៉ាក ខណ្ឌឫស្សីកែវ ទី២. ឈ្មោះសុខ សាន អាយុ១៧ឆ្នាំ មុខរបរជាងឡាន ទីលំនៅភូមិក សង្កាត់ច្រាំងចំរេះទី២ ខណ្ឌឫស្សីកែវ និង ឈ្មោះ ឆន ដាណាក់ អាយុ១៧ឆ្នាំ ទីលំនៅភូមិលូ សង្កាត់ស្វាយប៉ាក ខណ្ឌឫស្សីកែវ។
លោក ហ៊ាង ថារ៉េត អធិការខណ្ឌឫស្សីកែវ បន្តថា ៖ មុនពេលកើតហេតុ ជនសង្ស័យ ៣នាក់ បបួលគ្នាជិះម៉ូតូដើរលួចម៉ូតូគេ លុះជិះម៉ូតូដល់កន្លែងកើតហេតុ ចំណុចមុខហាងការហ្វេ zone ក្រុមទី២ ភូមិលូ សង្កាត់ស្វាយប៉ាក ខណ្ឌឬស្សីកែវ ជនសង្ស័យឃើញម៉ូតូម៉ាកZusuki nex ពណ៌ផ្កាឈូក ស្លាកលេខភ្នំពេញ 1IA-1697 ជារបស់ជនរងគ្រោះ ចតមុខហាងកាហ្វេ ដោយឃើញមានសភាពស្ងប់ស្ងាត់ ឪកាសល្អ ជនសង្ស័យម្នាក់ យកដែកសម្រាប់កាច់កម៉ូតូបុកកាច់បំបែកគ្រាប់សោ ម៉ូតូផ្ដាច់បានសម្រេច បន្ទាប់មកបក្ខពួកម្នាក់ទៀត ជាអ្នកដើរចូលអូសម៉ូតូចេញ ហើយម្នាក់ទៀតជាអ្នកមើលផ្លូវ ស្រាប់តែពេលអូសម៉ូតូចេញបានបន្តិច ជនរងគ្រោះដើរចេញមកឃើញទាន់ស្រែកចោរចោរស្ទុះរត់ដេញតាម។ ភ្លាមៗនោះជនសង្ស័យទាំងបីនាក់បានផ្ដួលម៉ូតូជនរងគ្រោះចោលហើយឡើងជិះម៉ូតូរបស់បក្ខពួកគេចខ្លួនបាត់តែម្ដង។
ក្រោយកើតហេតុរួចជនរងគ្រោះបានឡើងមកដាក់ពាក្យបណ្ដឹងនៅប៉ុស្តិ៍ ក្រោយពីសមត្ថកិច្ចយើងទទួលពាក្យបណ្ដឹជនរងគ្រោះ កម្លាំងជំនាញ បានចុះឆែកកាំមេរ៉ាសុវត្ថិភាព ឈានដល់កំណត់មុខសញ្ញាជនសង្ស័យបានរហូតដល់ថ្ងៃទី១២ ខែធ្នូ ឆ្នាំ២០២៤ ឃាត់ខ្លួនជនសង្ស័យទាំងបីនាក់បាននៅចំណុចផ្លូវលេខ៥ ភូមិឡកំបោរ សង្កាត់ស្វាយប៉ាក ហើយក៏នាំយកមកប៉ុស្តិ៍តែម្ដង។
បច្ចុប្បន្នជនសង្ស័យខាងលើកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីអនុវត្តន៍តាមនីតិវិធីច្បាប់៕
ដោយ៖ ជ្រោយពេជ្រ
