សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធមកពីក្លិបស្តេច Real Madrid បានបន្តឈរលើគេក្នុងចំណោមកីឡាករទាំង១០នាក់ ដែលរត់លឿនជាងគេក្នុងវិស័យបាល់ទាត់។ កីឡាករសញ្ជាតិវែលរូបនេះហាក់មិនសូវបាន ចូលលេងជាជម្រើស១១នាក់ដំបូងរបស់ស្តេចស Real Madridទេ ដោយសាររូបគេមានរបូស រ៉ាំរ៉ៃជាញឹកញាប់។ ប៉ុន្តែ Bale នៅតែជាកីឡាករដែលមានល្បឿនលឿនគឺរយៈចម្ងាយនៃការ រត់របស់គេមានល្បឿន ៣៩,៩គីឡូម៉ែត្រក្នុង១ម៉ោង។
ចំណែកខ្សែបម្រើសញ្ជាតិអេក្វាឌ័រ Antonio Valencia របស់ក្រុមបិសាចក្រហមបានធ្លាក់ទៅ លេខរៀងទី៤ ជាកីឡាករដែលមានល្បឿនលឿន ដែលកាលពីឆ្នាំ២០១៦ កីឡាកររូបនេះ បានឈរលេខ២ បន្ទាប់ពី Gareth Bale ។ ចំណាត់ថ្នាក់លេខ២ជំនួស Antonio Valencia បច្ចុប្បន្នគឺធ្លាក់ទៅលើកីឡាករ Orlando Berrio សញ្ជាតិកូឡុំប៊ី មានល្បឿន៣៦គីឡូម៉ែត្រក្នុង១ ម៉ោង ។
ខាងក្រោមនេះគឺជាឈ្មោះកីឡាករទាំង១០រូបដែលមានល្បឿនលឿនជាងគេ៖
១-Gareth Bale ល្បឿន ៣៦,៩ គីឡូម៉ែត្រ / ម៉ោង
នៅលើពិភពលោកនេះ មិនទាន់មានកីឡាករណារត់លឿនជាង កីឡាករវ័យ ២៨ឆ្នាំ របស់អធិរាជស Real Madrid ទេ។ កីឡាករកម្ពស់ ១,៨៥ ម៉ែត្រ ទម្ងន់៨២គីឡូក្រាម និងមានល្បឿនលឿនបំផុតអាចនិយាយថា នៅលើលោកនេះពិបាករកខ្សែការពារណាមកទប់ Gareth Bale ណាស់។
២-Orlando Berrio ល្បឿន ៣៦ គីឡូម៉ែត្រ / ម៉ោង
ខ្សែប្រយុទ្ធសញ្ជាតិកូឡុំប៊ីរូបនេះមិនសូវល្បីទេ ប៉ុន្តែកីឡាកររូបនេះមានល្បឿនលឿនជាង កំពូលកីឡាករ Messi ដល់ទៅជាង៣គីឡូម៉ែត្រក្នុង១ម៉ោង។
៣-Jurgen Damm ល្បឿន ៣៥,២ គីឡូម៉ែត្រ / ម៉ោង
ខ្សែបម្រើសញ្ជាតិម៉ិចស៊ីកូ Jurgen Damm វ័យ២៤ឆ្នាំ មានល្បឿនមិនធម្មតា តែរដូវកាលកន្លងទៅ លោកមិនសូវរកគ្រាប់បាល់បាន ឬ បញ្ជូនបាល់មិនសូវបានល្អឲ្យមិត្តរួមក្រុមទេ។
៤-Antonio Valencia ល្បឿន ៣៥,១ គីឡូម៉ែត្រ / ម៉ោង
តំណែងរបស់ Antonio Valencia នៅក្រុមបិសាចក្រហម លេងជាខ្សែការពារស្លាបផង និង ខ្សែបម្រើស្លាបផង ដោយសារការអំណោយផលទាំងល្បឿន និងកម្លាំងរបស់កីឡាករសញ្ជាតិអេក្វាឌ័រ។
៥-Pierre-Emerick Aubameyang ល្បឿន ៣៤,៦ គីឡូម៉ែត្រ / ម៉ោង
ខ្សែប្រយុទ្ធសញ្ជាតិហ្គាបុង (ប្រទេសនៅតំបន់អាហ្វ្រិកកណ្តាល) របស់ក្លឹប Borussia Dortmund មានល្បឿនលឿនជាងកំពូលកីឡាករ Messi និង Ronaldo ទៅទៀត។
៦-Aaron Lennon ល្បឿន ៣៣,៨ គីឡូម៉ែត្រ / ម៉ោង
កីឡាករសញ្ជាតិអង់គ្លេសរូបនេះ ត្រូវបានគេប្រៀបទៅនឹងម៉ាស៊ីនជក់ខ្យល់ បានន័យថាកាន់តែរត់កាន់តែលឿន។
៧-Cristiano Ronaldo ល្បឿន ៣៣,៦ គីឡូម៉ែត្រ / ម៉ោង
ម្ចាស់ពាន FIFA’s Best Player វ័យ៣២ឆ្នាំ មិនចូលចិត្តពាក់ស្បែកជើងបាល់ទាត់កវែងពណ៌ខ្មៅទេ ព្រោះលោកយល់ថាពណ៌ខ្មៅមើលទៅយឺត ហើយលោកចង់មានអារម្មណ៍ថារត់លឿន។
៨-Theo Walcott ល្បឿន ៣២,៧ គីឡូម៉ែត្រ / ម៉ោង
Walcott កីឡាករសញ្ជាតិអង់គ្លេស បានចូលលេងក្នុងនាមជាខ្សែបម្រើស្លាបដំបូងឲ្យ Arsenal ក្នុងវ័យ ១៦ ឆ្នាំ កាលពីឆ្នាំ ២០០៦ ហើយបច្ច័យល្អដែលធ្វើឲ្យកីឡាកររូបនេះលេចធ្លោគឺ ល្បឿន។
៩-Lionel Messi ល្បឿន ៣២,៥ គីឡូម៉ែត្រ / ម៉ោង
ម្ចាស់ពានរង្វាន់ Ballon d’Or ៥សម័យកាល គឺជាកីឡាករកំពូលល្បឿនលំដាប់ទី៣នៅអេស្ប៉ាញ និង លេខ៩នៅលើពិភពលោក។
១០-Wayne Rooney ល្បឿន ៣១,២ គីឡូម៉ែត្រ / ម៉ោង
អតីតកីឡាករក្រុមបិសាចក្រហម ធ្លាប់ជាកីឡាករដែលជារឿយៗតែងរកគ្រាប់បាល់ឲ្យក្លឹប និង ធ្លាប់ជាកីឡាករល្បឿនលឿនម្នាក់ បើទោះជាបច្ចុប្បន្នទាំងល្បឿន និង ការស៊ុតបញ្ចូលទីរបស់លោកធ្លាក់ចុះក្តី ។
សូមបញ្ជាក់ថា ល្បឿនរបស់កីឡាករបាល់ទាត់ ខុសពីល្បឿនរត់ប្រណាំង ខុសត្រង់ថា ល្បឿនរបស់កីឡាករសំដៅដល់ ល្បឿននៃការគ្រប់គ្រងបាល់ និងការបញ្ជូន គឺមិនរត់ត្រង់ទៅមុខដូចអត្តពលិកទេ។ តួយ៉ាងកំណត់ត្រារបស់ស្តេចល្បឿន Usain Bolt ធ្វើបានគឺ ៤៤,៧២គីឡូម៉ែត្រ ក្នុង១ម៉ោង ខណៈកីឡាករបាល់ទាត់១០រូបខាងលើនេះ មានម្នាក់រត់លឿនបំផុត ត្រឹមជិត៣៧ គីឡូម៉ែត្រក្នុង១ម៉ោង ប៉ុណ្ណោះ។ អ្វីដែលគួរឲ្យភ្ញាក់ផ្អើលជាងនេះទៅទៀតគឺក្នុងចំណោមកីឡាករកំពូលល្បឿនទាំង១០របស់ពិភពលោក មាន៣នាក់ជាកីឡាកររបស់អង់គ្លេស ៕ ដេវីត
