សារព័ត៌មាន នគរវត្ត តែងតែនាំមុខគេជានិច្ច
បច្ចុប្បន្ននៅប្រទេសចិន មានករណីឆ្លងវីរុសតែ ១៩នាក់ប៉ុណ្ណោះ ក្នុងថ្ងៃទី៩ខែមីនាក្នុងនោះមាន១៧ករណីនៅទីក្រុងវូហាន គឺជាចំនួនទាបបំផុត។ ជាមួយគ្នានោះក៏មានអ្នកស្លាប់១៧នាក់ផងដែរ ក្នុងថ្ងៃទី៩ខែមីនា ។
ប្រធានាធិបតីចិន លោកស៊ី ជីនពីងបានទៅកាន់ទីក្រុងវូហានដោយផ្ទាល់សួសុខទុក្ខពលរដ្ឋដែលរងគ្រោះដោយសារតែការវាយប្រហារដោយវីរុសផ្លូវដង្ហើមថ្មី COVID-19។ ដំណើរទស្សនកិច្ចរបស់ប្រធានាធិបតីធ្វើឡើង ក្រោយករណីឆ្លងវីរុសនៅទីក្រុងវូហានធ្លាក់ចុះកម្រិតទាប់បំផុត។
សារព័ត៌មាន South China Morning Post បានផ្សាយថា ប្រធានាធិបតី ស៊ី ជីនពីងទៅកាន់វូហាននាព្រឹកថ្ងៃទី ១០ខែមីនា។ ប្រធានាធិបតីបានត្រួតពិនិត្យសកម្មភាពបង្ការ និងការថែទាំងអ្នកជំងឺ។ជាមួយគ្នានេះប្រធានាធិបតីក៏បានសួសុខទុក្ខ បុគ្គលិកសុខភិបាល ស៊ីវិល និងយោធាដែលបានខិតខំអស់ពីកម្លាំងកាយចិត្តជួយដល់ពលរដ្ឋទប់ស្កាត់ ការឆ្លងរាលដាលវីរុសយ៉ាងមានប្រសិទ្ធភាពបំផុត។
នៅទូទាំងប្រទេសចិន មានករណីឆ្លង ទាំងអស់ ៨០៧៥៤នាក់ ស្លាប់៣១៣៦នាក់ និង៥៩៨៩៧ នាក់ជាសះស្បើយពីវីរុសដ៏កាចសហាវនេះ។
គិតដល់វេលាម៉ោង១១និង៣០នាទី នៅទូទាំងពិភពលោក មានអ្នកឆ្លងវីរុស ១១៤៤០០នាក់ និងស្លាប់៤០២៧នាក់។ជាមួយគ្នានោះអ្នកជាសះស្បើយមាន៦៤១០០នាក់។ អ៊ីតាលី អ៊ីរ៉ង់និងកូរ៉េខាងត្បូង ក្លាយជាទីតាំងឆ្លងរាលដាលខ្លាំងបំផុត៕ម៉ែវ សាធី
