សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសជនជាតិវៀតណាមម្នាក់បានរងរបួសធ្ងន់ត្រង់ក្បាលដេរ២ថ្នេរ ដោយសារជនសង្ស័យម្នាក់ បានយកច្រវ៉ាក់ម៉ូតូវាយក្បាលខណៈជនរងគ្រោះកំពុងជិះម៉ូតូតាមដងផ្លូវទាំងមិនដឹងខ្លួន។
ហេតុការណ៍នេះកើតឡើង កាលពីវេលាម៉ោង៩និង៤៦នាទីយប់ ថ្ងៃទី៩ ខែមីនា ឆ្នាំ២០២០ ស្ថិតក្នុងភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្ដាល។
មន្ត្រីនគរបាលស្រុកកៀនស្វាយ បានឲ្យដឹងថាជនសង្ស័យឈ្មោះ មន វិសាល ភេទប្រុស អាយុ២៣ឆ្នាំ ជនជាតិខ្មែ មុខរបរមិនពិតប្រាកដ មានទីលំនៅភូមិជ្រោយដង ឃុំសំរោងធំ ស្រុកកៀនស្វាយ ខេត្តកណ្តាល។ ចំណែកជនរងគ្រោះឈ្មោះ ចឹង យ៉ាំងគៀក ភេទប្រុស អាយុ១៧ឆ្នាំ ជនជាតិវៀតណាម មុខរបរនេសាទត្រី បច្ចុប្បន្នស្នាក់នៅភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្ដាល។
ប្រភពដដែលបន្តថា នៅមុនពេលកើតហេតុ ជនរងគ្រោះបានជិះម៉ូតូមានគ្នា២នាក់ ក្នុងគោលបំណងទៅដេកចាំស្រះត្រី ស្ថិតក្នុងភូមិឃុំកើតហេតុខាងលើ។ លុះមកដល់ចំណុចមុខផ្ទះឈ្មោះ សុខ យៀង ភេទប្រុស អាយុ៦៧ឆ្នាំ ស្រាប់តែជនសង្ស័យបានជិះម៉ូតូដេញតាមពីក្រោយជនរងគ្រោះហើយ ពេលមកដល់ចំណុចកើតហេតុជនសង្ស័យបានយកច្រវ៉ាក់ម៉ូតូមកវាយជនរងគ្រោះដែលកំពុងបើកម៉ូតូ បណ្តាលឲ្យរបួសក្បាលខាងឆ្វេងដេរចំនួន២ថ្នេរ។ លុះដល់ម៉ោង១១និង០៥នាទីយប់ថ្ងៃដដែលទើបបានម្តាយជនរងគ្រោះមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសំរោងធំ។
ក្រោយពីបានទទួលពាក្យបណ្តឹងរួចមក កម្លាំងនគរបាលប៉ុស្តិ៍រដ្ឋបាលសំរោងធំបានចុះទៅដល់កន្លែងកើតហេតុហើយនាំជនសង្ស័យយកមកប៉ុស្តិ៍ដើម្បីធ្វើការសួនាំ។ នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានយកច្រវ៉ាក់ម៉ូតូជិះដេញវាយជនរងគ្រោះពិតប្រាកដមែនដោយសារមានគំនុំ។
ជាមួយនេះដែរមន្រ្តីនគរបាលប៉ុស្តិ៍រដ្ឋបាលសំរោងធំបានបញ្ជាក់ថា កន្លងមកជនសង្ស័យរូបនេះធ្លាប់ប្រព្រឹត្តបទល្មើសចាក់គេនិងកាំបិតម្តងហើយដែរ ដូច្នេះម្តងនេះច្បាស់ជាគេចរួចពីសំណាញ់ច្បាប់បានឡើយ ៕ សហការី
