សារព័ត៌មាន នគរវត្ត តែងតែនាំមុខគេជានិច្ច
កន្លងមក អង្គការសហប្រជាជាតិបានលុបទណ្ឌកម្ម ដល់កូរ៉េខាងជើង ដើម្បីឲ្យសហគមន៍អន្តរជាតិបញ្ជូនជំនួយ សុខាភិបាលជួយដល់ពលរដ្ឋកូរ៉េខាងជើង ឆ្លងផុតពីវិបត្តិ បង្កឡើងដោយវីរុសផ្លូវដង្ហើម។
នៅពេលនេះអ៊ីរ៉ង់ក៏បានស្នើដល់អាមេរិក លុបណ្ឌកម្ម ក្នុងវិស័យសុខាភិបាល។ ការឆ្លងរាលដាលនៃវីរុស មិនមែនជាបញ្ហានយោបាយឡើយ ជាបញ្ហាមនុស្សជាតិ នៅលើពិភពលោកទាំងមូល។
ប្រធានរដ្ឋសភាអ៊ីរ៉ង់ លោក Ali Larijani កាលពីថ្ងៃទី១០ខែមីនា បានអំពាវនាវដល់សហគមន៍អន្តរជាតិ ជួយអន្តរាគមន៍ឲ្យ អាមេរិក លុបទណ្ឌកម្មអ៊ីរ៉ង់ ដើម្បីឲ្យប្រទេសនេះមានសមត្ថភាពក្នុងការទប់ស្កាត់ឆ្លងរាលដាលនៃវីរុសផ្លូវដង្ហើម COVID-19 ។
សារព័ត៌មាន Tehran Times បានផ្សាយថា លោក Ali Larijani បានស្នើដល់ពិភពលោក ទាំងមូលរួមទាំង សភាអឺរ៉ុប អាស៊ី សហគមន៍អ៊ីស្លាម …ឲ្យជួយអន្តរគមន៍ ស្នើដល់អាមេរិក លើកលែងទណ្ឌកម្មជាបន្ទាន់ ដោយអ៊ីរ៉ង់ប្រឈមបញ្ហា កង្វះសម្ភារពេទ្យ ។
នៅក្នុងលិខិតដែលប្រធានរដ្ឋសភា អ៊ីរ៉ង់ ផ្ញើរទៅកាន់ប្រធានរដ្ឋសភាបណ្តាប្រទេសនៅលើពិភពលោកបានបញ្ជាក់ថា ការដាក់ទណ្ឌកម្មរបស់អាមេរិក បានរារាំងដល់ការខិតខំ ប្រយុទ្ធប្រឆាំងជំងឺឆ្លងបង្កឡើងដោយវីរុស COVID-19 ។ បច្ចុប្បន្នអ៊ីរ៉ង់ កំពុងតែប្រឈមកង្វះប្រភពផ្គត់ផ្គង់ក្នុងវិស័យសុខាភិបាល យ៉ាងខ្លាំង ។
អ៊ីរ៉ងមានករណីឆ្លងវីរុស COVID-19 ដំបូងគេបង្អស់គឺនៅថ្ងៃទី ១៩ ខែកុម្ភៈ ហើយមកដល់ថ្ងៃទី១០ ខែមីនានេះ អ៊ីរ៉ង់មានករណីឆ្លង COVID-19កើនឡើងដល់ទៅ៨០៤២នាក់ និងស្លាប់កើនឡើងដលើ២៩១នាក់ ៕ ម៉ែវសាធី
