ចិនគ្មានបំណងធ្វើសង្គ្រាមត្រជាក់ ឬក្តៅគគុកជាមួយប្រទេសណាឡើយ, នេះបើតាមការអះអាងពីលោក ស៊ី ជិនពីង

អន្តរជាតិ៖ ប្រធានាធិបតីចិនលោក ស៊ី ជិនពីង បានឆ្លើយតបនឹងការចោទប្រកាន់ ពីសំណាក់ប្រធានាធិបតីអាមេរិក លោក ដូណាល់ ត្រាំ មកលើប្រទេសចិន នៅចំពោះមុខមហាសន្និបាតអង្គការសហប្រជាជាតិ(UNGA) នៅថ្ងៃទី២២ ខែកញ្ញា (ពេលវេលានៅញូយ៉ក) វិញថា៖ប្រទេសចិនគ្មានចំណងធ្វើសង្គ្រាមត្រជាក់ ឬក្តៅគគុកជាមួយប្រទេសណាមួយឡើយ។

បើតាមការចេញផ្សាយដោយសារព័ត៌មាន CNA នាព្រឹកថ្ងៃពុធ ទី២៣ខែកញ្ញា ឆ្នាំ២០២០នេះថា លោក ស៊ី ជិនពីង បានអំពាវនាវឲ្យគ្រប់ប្រទេសទាំងអស់បង្កើនកិច្ចសហប្រតិបត្តិការជាមួយគ្នា ដើម្បីប្រយុទ្ធប្រឆាំងនឹងជំងឺរាតត្បាតសកល (COVID-19)។ ខណៈដែលលោក ដូណាល់ ត្រាំនៅចំពោះមុខវេទិកា UNGA បានទាមទារឲ្យប្រទេសចិន ទទួលខុសត្រូវចំពោះរីករាតត្បាតនៃជំងឺ COVID-19 ទៅកាន់ពិភពលោក ដោយលោកបានចោទចិនថា មិនបានគ្រប់គ្រងវីរុសនេះដោយត្រឹមត្រូវ។

ដោយឡែកទាក់ទិននឹងបញ្ហាខាងលើនេះ លោក ចាង ជុន (Zhang Jun) តំណាងជាន់ខ្ពស់ចិនប្រចាំនៅអង្គការសហប្រជាជាតិ ក៏បានប្រកាសច្រានចោលការចោទប្រកាន់របស់លោក ត្រាំ ចំពោះប្រទេសជាថ្មីនេះផងដែរដោយលោកបានចាត់ទុកថា «គ្មានមូលដ្ឋាន» និងជាពាក្យកហុក ដែលត្រូវបានលើកមកនិយាយ រាប់ពាន់ដងមកហើយ ប៉ុន្តែវានៅតែជាពាក្យកុហក។

បច្ចុប្បន្នទំនាក់ទំនងរវាងចិន និងសហរដ្ឋអាមេរិក បានធ្លាក់ចុះកាន់តែខ្លាំងឡើងៗ គិតចាប់តាំងពីការផ្ទុះសង្គ្រាមពាណិជ្ជកម្ម, បាតុកម្មនៅហុងកុង, ជំងឺរាតត្បាតសកល COVID-19 និងបញ្ហាកោះតៃវ៉ាន់ជាដើម។ ខណៈការបោះឆ្នោតអាមេរិក នឹងឈានចូលមកដល់ នៅថ្ងៃទី០៣ខែវិច្ឆិកាខាងមុខនេះ លោក ដូណាល់ ត្រាំ ត្រូវបានគេមើលឃើញថា បាននិងកំពុងយកវេទនាឃោសនា ស្ទើរគ្រប់កន្លែងរបស់លោកវាយប្រហារទៅលើប្រទេសចិន៕

ដោយ៖ស តារា