សារព័ត៌មាន នគរវត្ត តែងតែនាំមុខគេជានិច្ច
ក្នុងតំបន់មួយចំនួននៅប្រទេសឥណ្ឌានៅតែប្រកាន់វណ្ណៈ ហើយទស្សនៈចាត់ទុកស្ត្រីជា«បាតសង្គម»នៅតែកើតមានក្នុងប្រទេសនេះ។
ជាក់ស្តែង ស្ត្រីទើបតែពេញវ័យអាយុ១៩ឆ្នាំត្រូវថ្នាក់លើរបស់នាង៤នាក់ចាប់រំលោភហើយរឹត.ករហូតដល់ស្លាប់។
ហេតុការណ៍ខាងលើកើតឡើងនៅក្នុងសហគមន៍ Dalit ភាគខាងជើងប្រទេសឥណ្ឌាកាលពីពាក់កណ្តាលខែកញ្ញា ហើយបានស្លាប់នៅថ្ងៃទី២៩ ខែកញ្ញា ដោយសាររបួសធ្ងន់។
មន្ត្រីប៉ូលិសតំបន់ Hathras លោក Vikrant Vir បានបញ្ជាក់នៅលើបណ្តាញសង្គមរបស់លោកថា ការចាប់រំលោភកើតឡើងតាំងពីថ្ងៃទី១៤ ខែកញ្ញា ឆ្នាំ២០២០ ។ជនរងគ្រោះបានបញ្ជូនទៅកាន់មន្ទីរពេទ្យក្នុងរដ្ឋ Uttar Pradesh ក្រោយមកក៏បានបញ្ជូនទៅកាន់ទីក្រុងញូវដេលីដោយសារតែរបួសធ្ងន់បង្កឡើងពីក្រុម«បិសាចតណ្ហា»។
មនុស្សប្រុស៤នាក់ត្រូវបានចាប់ខ្លួនពីបទចាប់រំលោភផ្លូវភេទនិងមនុស្សឃាត។ នៅពេលនេះកម្លាំងប៉ូលិសកំពុងតែបើកការស្រាវជ្រាវករណីខាងលើ។
នៅក្នុងសង្គមប្រទេសឥណ្ឌា មានបន្សល់ទុកនូវទំនៀមទម្លាប់ហួសសម័យ ខ្វះការពិចារណា ពិសេសគឺការប្រកាន់ រើសអើងវណ្ណៈ។ សូមបញ្ជាក់ផងដែរថា កាលពីឆ្នាំ១៩៥០ ឥណ្ឌាបានលុបច្បាប់វណ្ណៈសង្គម ដែលមានអាយុកាលជាង២៥០០ឆ្នាំកន្លងមក គឺមុនពេលព្រះពុទ្ធប្រសូត្រមកម៉្លេះ។
កាលពីខែសីហាកន្លងមកក្មេងស្រីអាយុ១៣ឆ្នាំម្នាក់នៅតំបន់Dalitនោះផងដែរ ក៏ទទួលរងនូវការរំលោភផ្លូវភេទហើយសម្លាប់ ផងដែរ។
តាមរបាយការណ៍ស្តីពីបទល្មើសផ្លូវភេទនៅឥណ្ឌា ចាប់តាំងពីឆ្នាំ២០១៨ មកទល់ពេលនេះមានករណីចាប់រំលោភដល់ទៅ៣៣ ០០០នាក់ មានន័យថា ក្នុង១ថ្ងៃមានស្ត្រី៩១នាក់រងការរំលោភបំពានផ្លូវភេទទូទាំងប្រទេសឥណ្ឌា៕ដោយ៖ធី រីណា
