សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ខណៈដែលយោធាមីយ៉ាន់ម៉ា នៅតែបន្តបង្កើនការបង្រ្កាបលើក្រុមបាតុករប្រឆាំងរដ្ឋប្រហាររបបសឹក លោក ចាង ជុន (Zhang Jun) អគ្គរដ្ឋទូតចិនប្រចាំអង្គការសហប្រជាជាតិ (UN) នៅថ្ងៃពុធទី១០ ខែមីនា ឆ្នាំ២០២១(ពេលវេលានៅញូយ៉ក) បានអំពាវនាវឱ្យមានការបន្ធូរបន្ថយជម្លោះ នៅក្នុងប្រទេសមីយ៉ាន់ម៉ា។
លោក ចាង ជុន បានធ្វេីការអំពាវនាវខាងលើនេះ បន្ទាប់ពី សមាជិកក្រុមប្រឹក្សាសន្តិសុខ នៃអង្គការសហប្រជាជាតិ (UNSC) ទាំង ១៥ប្រទេស ក្នុងនោះរួមមានទាំងចិនផងដែរ បានឯកភាពគ្នាថ្កោលទោសសកម្មភាពបង្រ្កាបរបស់ យោធាមីយ៉ាន់ម៉ាជាលើកដំបូង ចាប់តាំងរដ្ឋាភិបាលស៊ីវិលជាប់ឆ្នោតរបស់ លោកស្រី អោង សាន ស៊ូ ជី ត្រូវបានទម្លាក់អំណាចកាលពីខែកុម្ភៈមក។ នេះបើតាមការចេញផ្សាយ ដោយសារព័ត៌មាន CNA នៅថ្ងៃព្រហស្បតិ៍ ទី១១ ខែមីនា ឆ្នាំ២០២១។
ជាក់ស្ដែងនៅក្នុងសេចក្ដីថ្លែងការណ៍មួយរបស់លោកអគ្គរដ្ឋទូតចិនប្រចាំអង្គការសហប្រជាជាតិរូបនេះ បានគូសបញ្ជាក់យ៉ាងដូច្នេះថា៖ «បច្ចុប្បន្ន គឺជាពេលត្រូវបន្ធូរបន្ថយជម្លោះ, ជាពេលសម្រាប់ការទូត, ជាពេលសម្រាប់កិច្ចសន្ទនា។ ចិនបានចូលរួមក្នុងការចេញសេចក្តីថ្លែងការណ៍ ប្រកបដោយលក្ខណៈស្ថាបនា។ វាពិសេសជាសំខាន់ណាស់សម្រាប់សមាជិក ក្រុមប្រឹក្សា (UNSC) ក្នុងការបញ្ចេញសំឡេងតែមួយ។ យើងសង្ឃឹមថា សាររបស់ក្រុមប្រឹក្សានេះនឹងមានអំណោយផល ដល់ការបន្ធូរបន្ថយស្ថានការណ៍តានតឹង នៅក្នុងប្រទេសមីយ៉ាន់ម៉ា»។
លេីសពីនេះទៅទៀត លោក ចាង ជុន បានសង្កត់ធ្ងន់ថា សហគមន៍អន្តរជាតិគួរតែបង្កើត បរិយាកាសងាយស្រួលមួយ សម្រាប់ភាគីពាក់ព័ន្ធទាំងអស់ នៅក្នុងប្រទេសមីយ៉ាន់ម៉ា ដើម្បីអាចឱ្យពួកគេដោះស្រាយការខ្វែងគំនិតគ្នា នៅក្រោមរដ្ឋធម្មនុញ្ញ និងក្របខណ្ឌច្បាប់៕ដោយ៖ស តារា
លោក ចាង ជុន (Zhang Jun) អគ្គរដ្ឋទូតចិនប្រចាំអង្គការសហប្រជាជាតិ (UN)
រូបថត៖VCG
រូបភាព៖យោធាមីយ៉ាន់ម៉ា ធ្វើការបង្រ្កាបលេីក្រុមបាតុករនាពេលកន្លងមក
