រថយន្តស៊េរីទំនើបពីរគ្រឿងបុកគ្នាពេញទំហឹងបណ្តាលឱ្យរងការខូចខាតទាំងសងខាង

ភ្នំពេញ ៖ រថយន្តស៊េរីទំនើបម៉ាកTIVO LI  បានបុកគ្នាជាមួយរថយន្តស៊េរីទំនើបម៉ាកALPHARD  នៅត្រង់ចំណុចផ្លូវបំបែកជាបួនបណ្ដាលឱ្យរងការខូចខាតទាំងសងខាងយ៉ាងដំណំ តែសំណាងល្អមិនបង្កឱ្យមានអ្នករងរបួសឡើយ។

   ហេតុការណ៍នេះកើតឡើងកាលពីវេលាម៉ោង១០យប់ថ្ងៃទី១៣ ខែមីនា ឆ្នាំ ២០២២ នៅត្រង់ចំណុចផ្លូវបំបែកជាបួន ក្នុងបរិវេណបឹងកក់ តាមបណ្ដោយផ្លូវលេខ១១៣ កែងផ្លូវលេខ៦១៦ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

   តាមប្រភពព័ត៌មាននៅកន្លែងកើតហេតុបានឱ្យដឹងថា មុនកើតហេតុគេឃើញបុរសម្នាក់រួមដំណើរនឹងបុរសម្នាក់ទៀតបើករថយន្តស៊េរីទំនើបមួយគ្រឿងម៉ាកTIVOLI ពណ៌កណ្តុរល្មែះ ពាក់ស្លាកលេខភ្នំពេញ2BL-8724 ធ្វើដំណើរតាមបណ្ដោយផ្លូវលេខ៦១៦ពីកើតទៅលិច ក្នុងល្បឿនលឿន  លុះមកដល់ចំណុចផ្លូវបែកជាបួនត្រង់កន្លែងកើតហេតុខាងលើបានជ្រុលទៅបុកជាមួយរថយន្តស៊េរីទំនើបមួយគ្រឿងម៉ាកALPHARD ពណ៌ស ពាក់ស្លាកលេខកម្ពុជា ASDF GHJ បើកបរដោយបុរសម្នាក់រួមដំណើរជាមួយនឹងបុរសម្នាក់ទៀតធ្វើដំណើរតាមបណ្តោយផ្លូវលេខ១១៣ពីត្បូងទៅជើង ចំពីចំហៀងផ្នែកខាងមុខខាងស្តាំពេញទំហឹងបណ្តាលឱ្យរថយន្តទាំងពីរគ្រឿងរងការខូចខាតរៀងៗខ្លួនយ៉ាងដំណំ។

   ក្រោយកើតហេតុភាគីខាងរថយន្តស៊េរីទំនើបម៉ាកTIVOLI បាននាំគ្នាចេញពីកន្លែងកើតហេតុបាត់អស់បន្សល់ទុកតែរថយន្តទើបសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចុះមកវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំឱ្យម្ចាស់រថយន្តទាំងពីរគ្រឿងធ្វើការដោះស្រាយគ្នានៅពេលក្រោយ៕

ដោយ៖និនសុភ័ស្ត