សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងនៅថ្ងៃសៅរ៍ទី០៣ ខែកញ្ញា ឆ្នាំ២០២២នេះថា៖ ទេសរដ្ឋមន្រ្តី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំកិច្ចប្រជុំបូកសរុបលទ្ធផលការងារគ្រប់គ្រងគ្រោះមហន្តរាយក្នុងខែសីហា ឆ្នាំ២០២២ និងលើកទិសដៅបន្តនៅខែកញ្ញា ឆ្នាំ២០២២ របស់គណៈកម្មាធិការជាតិគ្រប់គ្រងគ្រោះមហន្តរាយកាលពីរសៀលថ្ងៃទី២ ខែកញ្ញាម្សិលមិញនេះ។
គូសបញ្ជាក់ថា នៅក្នុងខែសីហានេះ ស្ថានភាពអាកាសធាតុសាកលបានបង្ហាញនូវគ្រោះមហន្តរាយ ដោយធម្មជាតិ ផ្សេងៗ ដែលជាផលវិបាកនៃការប្រែប្រួលអាកាសធាតុបានកើតមាននៅក្នុងពិភពលោក ក៏ដូចជានៅក្នុង តំបន់ដូចជា៖ ការរាំងស្ងួត កម្រិតក្តៅខ្លាំង ភ្លើងឆេះព្រៃ ជំនន់រហ័ស និងខ្យល់ព្យុះ ដែលកើតឡើងមិនធម្មតា និងខុសប្លែកជាំងឆ្នាំកន្លងទៅ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានបង្ហាញថា ក្នុងខែសីហា ឆ្នាំ២០២២ មនុស្សរងគ្រោះស្លាប់ដោយសារទឹកជំនន់មាន ៩នាក់ ប្រជាពលរដ្ឋរងគ្រោះមានចំនួនជាង ២ម៉ឺនគ្រួសារ គិតជាចំនួនពលរដ្ឋមានជាង ៨ម៉ឺននាក់ លំនៅឋានលិចទឹកមានជាង ៣ពាន់ខ្នង និងបង្កផលប៉ះពាល់ដល់ដំណាំផ្សេងៗទៀតជាដើម។
មានប្រសាសន៍ក្នុងកិច្ចប្រជុំកាលពីរសៀលថ្ងៃទី២ ខែកញ្ញាម្សិលមិញនេះ លោកទេសរដ្ឋមន្រ្តី គន់ គីម បានឱ្យដឹងថា កម្ពុជាក៏ដូចជាបណ្តាប្រទេសក្នុងតំបន់ ដែលទទួលរងគ្រោះក្នុងផ្នែកមួយនៃការប្រែប្រួលអាកាសធាតុ ដែលបណ្តាលមកពី ការទទួលរងនូវបរិមាណទឹកភ្លៀងច្រើនខុសពីធម្មតា ក្នុងក្របខណ្ឌទូទាំងប្រទេស ទាំង ក្នុងរដូវប្រាំង និងក្នុងរដូវវស្សា ហើយក៏បានបង្កផលប៉ះពាល់ និងខូចខាតច្រើនលើគ្រប់វិស័យ។ លោកទេសរដ្ឋមន្រ្តីបន្តទៀតថា ដងទន្លេមេគង្គ និងបឹងទន្លេសាប ដោយមានកម្ពស់ទឹកបានឡើងលើសកម្រិតប្រុងប្រយ័ត្នដូចជា ទន្លេស្រែពក ខេត្តរតនគិរី ស្ទឹងក្រឡាញ់ ខេត្តសៀមរាប និងស្ទឹងសែន ក្នុងខេត្តព្រះវិហារ និងកំពង់ធំជាដើម។ មូលដ្ឋានខេត្តចំនួន ១៩ បានទទួលរងការប៉ះពាល់ក្នុងកម្រិតស្រាល និងមធ្យមលើកលែងខេត្តកណ្តាល តាកែវ ស្វាយរៀង ព្រៃវែង និងរាជធានីភ្នំពេញ ។
លោកទេសរដ្ឋមន្រ្តីអនុប្រធានទី១ មានប្រសាសន៏បន្តថាបច្ចុប្បន្នភាពនេះ៖ ប្រជាពលរដ្ឋរងគ្រោះ ២០៩៦៤គ្រួសារ ប្រមាណ ៨៣៨៥៦នាក់ ប្រជាពលរដ្ឋជម្លៀសទៅទីទួលសុវត្ថិភាព ៣០៧គ្រួសារ ប្រមាណ ១២២៨នាក់លំនៅដ្ឋានលិចទឹក ៣២៧៤ខ្នង និងខូចខាត ០៤ខ្នង , សាលារៀនលិចទឹក ១៤កន្លែង វត្តអារាម ៧កន្លែង មន្ទីរពេទ្យ ២កន្លែង និងស្នាក់ការកង កម្លាំងឈរជើងតាមព្រំដែន ៦កន្លែង (ខេត្តបន្ទាយមាជ័យ) , ការរងគ្រោះស្លាប់ ០៩នាក់ (ស្រី ៣, ក្មេង ៦)ក្នុងឆ្នាំ២០២២នេះ។
គណៈកម្មាធិការជាតិគ្រប់គ្រងគ្រោះមហន្តរាយបានសហការ និងចូលរួមជាមួយក្រសួងពាក់ព័ន្ធ និងរដ្ឋបាលថ្នាក់ក្រោមជាតិក្នុងការត្រៀម និងការ អន្តរាគមន៍សង្គ្រោះ និងឆ្លើយតបគ្រប់ហេតុការណ៍គ្រោះមហន្តរាយដែលអាចនឹងកើតមានក្នុងរដូវវស្សាជាពិសេសជំនន់ទឹកភ្លៀងនិងជំនន់ទន្លេមេគង្គ។ លោកទេសរដ្ឋមន្រ្តីបានលើកឡើងផងដែលថា រាជរដ្ឋាភិបាលបានឆ្លើយតបទាន់ពេលវេលា និងស្តារឡើងវិញនូវរាល់ការខូចខាតដែលបង្កឡើងដោយជំនន់ទឹកភ្លៀង ជាពិសេសគឺហេដ្ឋា រចនាសម្ព័ន្ធជនបទ និងវិស័យកសិកម្ម។
បន្ថែមពីនេះ លោកទេសរដ្ឋមន្រ្តី គន់ គីម ក៏បានស្នើរទៅដល់ក្រុមការងារគ្រោះមហន្តរាយថ្នាក់ក្រោមជាតិ បន្តតាមដានចុះពិនិត្យជាប្រចាំនូវពេលមានគ្រោះមហន្តរាយកើតដោយធម្មជាតិ និងមនុស្សបង្កឡើងដោយយថាហេតុ៕
ដោយ៖ស តារា
