សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ត្រីម្នាក់ជិះម៉ូតូទៅរកទិញម្ហូបស្រាប់តែមានជនសង្ស័យ៣នាក់ជិះម៉ូតូ២គ្រឿងធ្វេីសកម្មភាពឆក់យកខ្សែកជនរងគ្រោះក្រសោបបានខ្សែមកវិញបាត់បន្តោងស្រែកឆោឡោត្រូវបានប្រជាពលរដ្ឋនៅក្បែរជួយស្ទាក់ចាប់បានម្នាក់ កាលពីវេលា១២និង៤០នាទីរសៀលថ្ងៃទី៣០ ខែវិច្ឆិកា ឆ្នាំ២០២២នៅផ្លូវបេតុង ភូមិព្រៃសិលា សង្កាត់កាកាបទី២ ខណ្ឌពោធិ៍សែនជ័យ។
ជនសង្ស័យឈ្មោះ ប៉ុក រតនា ហៅវាសនា ភេទប្រុសអាយុ១៧ឆ្នាំ មុខរបមិនពិតប្រាកដ ស្នាក់នៅសង្កាត់ភ្នំពេញថ្មី ខណ្ឌសែនសុខ។
ជនរងគ្រោះឈ្មោះ អៀន ផល្លី អាយុ៤០ឆ្នាំ ស្នាក់នៅភូមិព្រៃសិលា សង្កាត់កាកាបទី២ ខណ្ឌពោធិ៍សែនជ័យ។
តាមប្រភពព័ត៌មានបានឲ្យដឹងថា មុនពេលកេីតហេតុជនរងគ្រោះជិះម៉ូតូចេញពីផ្ទះបំណងទៅផ្សាររកទិញម្ហូបខណៈជិះចេញបានបន្តិចស្រាប់តែជនសង្ស័យមានគ្នា៣នាក់ជិះម៉ូូតូ២គ្រឿង ដោយមួយគ្រឿងម៉ាកហុងដាឌ្រីម និងមួយគ្រឿងទៀតម៉ាកស្គូពីពណ៌ស ពាក់ស្លាកលេខភ្នំពេញ1JJ 0540 ធ្វេីដំណេីរបញ្ច្រាសទិសគ្នា។
ប្រភពដដែលបានបន្តថា ខណៈជិះទល់មុខគ្នាជនសង្ស័យឃេីញជនរងគ្រោះពាក់ខ្សែកដាក់ខាងក្រៅអាវទំនងក៏ជិះហួសហេីយទេីបត្រឡប់មកវិញធ្វេីសកម្មភាពឆក់យកខ្សែកតែជនរងគ្រោះដឹងខ្លួនមុនទេីបក្រសោបបានខ្សែមកវិញបាត់បន្តោងត្រូវជនសង្ស័យយកទៅបាត់។ ភ្លាមនោះជនរងគ្រោះស្រែកថាចោរៗទេីបបង្កការភ្ញាក់ផ្អេីលដល់ប្រជាពលរដ្ឋដែលនៅខាងមុខនាំគ្នាស្ទាក់ចាប់បានម្នាក់ដែលបិទគូទជិះម៉ូតូស្គូពីចំណែក២នាក់ទៀតគេចខ្លួនបាត់។
ក្រោយកេីតហេតុជនសង្ស័យត្រូវបានប្រជាពលរដ្ឋនាំប្រគល់ជូនសមត្ថកិច្ចដេីម្បីចាត់ការតាមច្បាប់៕
ដោយ៖សុខាសែនជ័យ
