សារព័ត៌មាន នគរវត្ត តែងតែនាំមុខគេជានិច្ច
ចិននិងរុស្ស៊ីទើបតែបានបញ្ចប់សមយុទ្ធជើងទឹករួមគ្នាដែលរួមមានសមយុទ្ធប្រឆាំងនាវាមុជទឹក និងការវាយប្រហារតាមនាវា។
យោងតាមសារព័ត៌មាន Global Times កាលពីថ្ងៃទី ២៨ ខែធ្នូ កងទ័ពជើងទឹកចិននិងរុស្ស៊ីបានបញ្ចប់សមយុទ្ធរួមគ្នា “អន្តរកម្មដែនសមុទ្រឆ្នាំ ២០២២” ដែលប្រព្រឹត្តទៅចាប់ពីថ្ងៃទី ២១-២៧ ខែធ្នូ នៅក្នុងដែនទឹកនៃខេត្ត Zhejiang ។ សមយុទ្ធនេះរួមមានសមយុទ្ធប្រឆាំងនាវាមុជទឹកជាមួយនឹងការទម្លាក់គ្រាប់បែកក្រោមទឹកនិងការវាយប្រហារនាវាចម្បាំង។
“នាវាចម្បាំងនៃកងនាវាចរប៉ាស៊ីហ្វិករុស្ស៊ី និងកងទ័ពជើងទឹកចិនបានបញ្ចប់ភារកិច្ចជាក់ស្តែងក្នុងក្របខ័ណ្ឌនៃសមយុទ្ធកងទ័ពជើងទឹកទ្វេភាគី។ សមយុទ្ធនេះពាក់ព័ន្ធនឹងកងវរជន និងសព្វាវុធទំនើប វាគឺជាឱកាសសម្រាប់កងទ័ពជើងទឹកទាំងពីរដើម្បីស្វែងយល់ពីគ្នាទៅវិញទៅមក” នេះបើតាមតំណាងកងទ័ពជើងទឹកចិនបានប្រាប់ឱ្យដឹង។
នៅក្នុងវីដេអូដែលចេញផ្សាយនៅពេលក្រោយដោយក្រសួងការពារជាតិរុស្ស៊ី ក្រុមនាវាចម្បាំងរុស្ស៊ីនិងចិនបានផ្លាស់ប្តូរ និងធ្វើសមយុទ្ធប្រយុទ្ធ។ វីដេអូនេះក៏បង្ហាញពីនាវាចម្បាំងរុស្ស៊ីបាញ់មីស៊ីល និងអាវុធប្រឆាំងនាវាមុជទឹកផងដែរ។
ប្រព័ន្ធផ្សព្វផ្សាយចិនបានផ្សាយថា កងទ័ពជើងទឹកបាននាំយកទៅធ្វើសមយុទ្ធ នាវាពិឃាត Type 052C Jinan នាវាពិឃាត Type 054A ចំនួនពីរគ្រឿង Xinzhou និង Yancheng នាវាមុជទឹកជាច្រើន យន្តហោះព្រមានទុកជាមុន និងឧទ្ធម្ភាគចក្រប្រឆាំងនាវាមុជទឹក។ ទន្ទឹមនឹងនេះដែរ អ្នកចូលរួមនៃសមយុទ្ធកងទ័ពជើងទឹករុស្ស៊ីរួមមាន នាវាចម្បាំង Varyag, នាវាចម្បាំង Shaposhnikov, corvettes ពីរ Tsydenzhapov និង Sovershennyy ។
សមយុទ្ធឆ្នាំ២០២២ ក៏ជាព្រឹត្តិការណ៍សំខាន់រយៈពេល 10 ឆ្នាំនៃសមយុទ្ធរួម “អន្តរកម្មដែនសមុទ្រ” ដែលត្រូវបានផ្តួចផ្តើមនៅក្នុងឆ្នាំ 2012 ៕ ដោយ៖ ធីរីណា
រូបថត ៖ laodong.vn
