សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ យោងតាមប្រភពព័ត៌មានពីរដ្ឋបាលខេត្តព្រះសីហនុ នៅថ្ងៃពុធទី១៩ ខែមេសា ឆ្នាំ២០២៣នេះ បានឱ្យដឹងថា រដ្ឋបាលខេត្ត បានចេញសេចក្តីជូនដំណឹង ស្តីពីសេចក្តីប្រកាសកំណត់តំបន់ធ្វើការវិនិច្ឆ័យ(ការចុះបញ្ជីដីធ្លី មានលក្ខណៈជាប្រព័ន្ធ)។
នៅក្នុងសេចក្តីជូនដំណឹងរបស់រដ្ឋបាលខេត្តព្រះសីហនុ បានបញ្ជាក់ថា រដ្ឋបាលខេត្ត មានកិត្តិយស សូមជម្រាបជូនដំណឹងដល់សាធារណៈជន ព្រមទាំងគ្រប់មន្ទីរ អង្គភាព និងគ្រប់ស្ថាប័នឬ ភ្នាក់ងារហិរញ្ញវត្ថុ ដែលមានពាក់ព័ន្ធនឹងក្បាលដីស្ថិតនៅក្នុងតំបន់វិនិច្ឆ័យ ភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ជ្រាបថា ៖ ដើម្បីអនុវត្តតាមខ្លឹមសារនៃអនុក្រឹត្យ និងយោងខាងលើ គណៈកម្មការរដ្ឋបាលនឹងប្រកាសកំណត់តំបន់ធ្វើការវិនិច្ឆ័យ ភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ដែលបានកំណត់ជាតំបន់ធ្វើការវិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធ ចាប់ពីថ្ងៃទី២០ ខែមេសា ឆ្នាំ២០២៣។
សេចក្តីដូចបានជម្រាបជូនខាងលើ សូមសាធារណៈជន ព្រមទាំងគ្រប់មន្ទីរ អង្គភាព និងស្ថាប័នដែលមាន ការពាក់ព័ន្ធនឹងក្បាលដី ស្ថិតនៅក្នុងតំបន់វិនិច្ឆ័យខាងលើនេះ មេត្តាចូលរួមចុះបញ្ជីដីក្នុងតំបន់ធ្វើការវិនិច្ឆ័យអោយ បានគ្រប់ៗគ្នា។ គណៈកម្មការរដ្ឋបាលនឹងធ្វើការពន្យល់ណែនាំ ស្ដីពីនីតិវិធីនៃការចុះបញ្ជីដីធ្លីមានលក្ខណៈជាប្រព័ន្ធ ច្បាប់ភូមិបាល និងឆ្លើយរាល់សំណួរទាក់ទងនឹងដំណើរការចុះបញ្ជីដីធ្លី។
ទទួលបានសេចក្ដីជូនដំណឹងនេះ រដ្ឋបាលខេត្តព្រះសីហនុ សង្ឃឹមយ៉ាងមុតមាំថា សាធារណៈជនដែលជា អ្នកកាន់កាប់ដីជាក់ស្ដែង ព្រមទាំងគ្រប់មន្ទីរ អង្គភាព គ្រប់ស្ថាប័ន ដែលពាក់ព័ន្ធនឹងក្បាលដីស្ថិតនៅក្នុងតំបន់វិនិច្ឆ័យ ខាងលើ នឹងចូលរួមបំពេញកាតព្វកិច្ចរបស់ខ្លួនពាក់ព័ន្ធការចុះបញ្ជីដីធ្លីមានលក្ខណៈជាប្រព័ន្ធយ៉ាងផុលផុសមិនខាន៕
ខាងក្រោមនេះមានសេចក្ដីជូនដំណឹងលម្អិតរបស់រដ្ឋបាលខេត្តព្រះសីហនុ៖
ដោយ៖សហការី
