សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា (អគរ) បានបញ្ជាក់ថា នៅក្នុងត្រីមាសទី១ ឆ្នាំ២០២៣ អគ្គនាយកដ្ឋានគយ ប្រមូលចំណូលបានចំនួន ២ ៣០២,៩ ប៊ីលានរៀល (ស្មើនឹងប្រមាណ ៥៦៤,១ លានដុល្លារអាមេរិក) ថយចុះប្រមាណ ៥,២% ធៀបនឹងចំណូលប្រមូលបានក្នុងត្រីមាសទី១ ឆ្នាំ២០២២។ លទ្ធផលនេះសម្រេចបាន ២០,៥% នៃផែនការដែលកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។
របាយការណ៍ដដែលបន្តថា បើពិនិត្យចំណូលតាមប្រភេទពន្ធនិងអាករ និងតាមក្រុមទំនិញ គឺមានលទ្ធផលដូចតទៅ៖ តាមប្រភេទពន្ធនិងអាករ មានដូចជា៖ អាករលើតម្លៃបន្ថែមមានចំនួន ៩៤៩,៨ ប៊ីលានរៀល ត្រូវជា ៤១,២% នៃចំណូលសរុប, អាករពិសេសមានចំនួន ៧៥២,២ ប៊ីលានរៀល ត្រូវជា ៣២,៧% នៃចំណូលសរុប, ពន្ធគយមានចំនួន ៤៥៩,៥ ប៊ីលានរៀល ត្រូវជា ២០,០% នៃចំណូលសរុប, អាករបន្ថែមលើផលិតផលប្រេងមានចំនួន ៨៧,៦ ប៊ីលានរៀល ត្រូវជា ៣,៨% នៃចំណូលសរុប, និង អាករនាំចេញនិងកម្រៃផ្សេងៗមានចំនួន ៥៣,៨ ប៊ីលានរៀល ត្រូវជា ២,៣% នៃចំណូលសរុប
ចំណែកចំណូលតាមក្រុមទំនិញមានដូចជា យានយន្តនិងគ្រឿងចក្រមានចំនួន ៨៣៥,៦ ប៊ីលានរៀល ត្រូវជា ៣៦,៣% នៃចំណូលសរុប, ទំនិញចម្រុះមានចំនួន ៧៥៧,២ ប៊ីលានរៀល ត្រូវជា ៣២,៩% នៃចំណូលសរុប, ផលិតផលតេលសិលាមានចំនួន ៥៥៣,៥ ប៊ីលានរៀល ត្រូវជា ២៤,០% នៃចំណូលសរុប, និង គ្រឿងសំណង់និងកម្រៃផ្សេងៗមានចំនួន ១៥៦,៦ ប៊ីលានរៀល ត្រូវជា ៦,៨% នៃចំណូលសរុប។ នេះបើតាមរបាយការណ៍។
ទន្ទឹមនេះ ទំហំនៃការនាំចេញក្នុងត្រីមាសទី១ ឆ្នាំ២០២៣ ធៀបនឹងរយៈពេលដូចគ្នាក្នុងឆ្នាំ២០២២ រួមមាន៖ ការនាំចេញផលិតផលកាត់ដេរមានចំនួន ២ ៤៤៩,៤ លានដុល្លារអាមេរិក ថយចុះប្រមាណ ៧០៥,៦ លានដុល្លារអាមេរិក ត្រូវជា ២២,៤%, ការនាំចេញផលិតផលវិនិយោគមិនមែនកាត់ដេរ (ដូចជា គ្រឿងបំណែកអេឡិចត្រូនិក បង្គុំខ្សែភ្លើង កង់ ផលិតផលពីឈើ ឈើកែច្នៃ ផលិតផលពីប្លាស្ទិក គ្រឿងបន្លាស់រថយន្ត កុងផ្លាកេ អំពូលលម្អ ស្បែកសត្វកែច្នៃ និងផលិតផលផ្សេងៗទៀត) មានចំនួន ១ ៤៤២,៦ លានដុល្លារអាមេរិក កើនឡើងប្រមាណ ២២៩,៨ លានដុល្លារអាមេរិក ត្រូវជា ១៨,៩%, និងការនាំចេញកសិផលមានចំនួន ១ ២៥៩,១ លានដុល្លារអាមេរិក កើនឡើងប្រមាណ ១៣៥,៦ លានដុល្លារអាមេរិក ត្រូវជា ១០,៨% ដែលក្នុងនោះ ស្រូវនាំចេញមានតម្លៃ ៤១១,៧ លានដុល្លារអាមេរិក កើនឡើងប្រមាណ ១១២,៨ លានដុល្លារអាមេរិក (៣៧,៧%), ការនាំចេញអង្ករមានតម្លៃ ១២៦ លានដុល្លារអាមេរិក កើនឡើងប្រមាណ ២០,៩ លានដុល្លារអាមេរិក (១៩,៩%), កៅស៊ូនាំចេញមានតម្លៃ ៩៣,១ លានដុល្លារអាមេរិក ថយចុះប្រមាណ ១០,១ លានដុល្លារអាមេរិក (៩,៨%), និងកសិផលផ្សេងទៀតមានតម្លៃ ៦២៨,៤ លានដុល្លារអាមេរិក កើនឡើង ១២ លានដុល្លារអាមេរិក (២,០%)។ នេះបើតាមរបាយការណ៍៕
ដោយ៖សហការី
