សារព័ត៌មាន នគរវត្ត តែងតែនាំមុខគេជានិច្ច
ក្រុមហ៊ុន Ford Motor បាននិយាយកាលពីថ្ងៃសុក្រ (18 មេសា) ថា ខ្លួនបានបញ្ឈប់ការនាំចេញរថយន្ត SUV រថយន្តភីកអាប់ និងរថយន្តស្ព័ររបស់ខ្លួនទៅកាន់ប្រទេសចិន ដោយសារការចាប់ផ្តើមប្រឈមមុខនឹងកំដៅពន្ធនៃការសងសឹកដាក់គ្នារវាងប្រទេសមហាអំណាចសេដ្ឋកិច្ចពិភពលោកទាំងពីរធ្វើឱ្យយានយន្តប្រឈមនឹងពន្ធខ្ពស់រហូតដល់ 150 ភាគរយ។
ក្រុមហ៊ុន Ford បាននិយាយនៅក្នុងសេចក្តីថ្លែងការណ៍មួយថា “យើងបានកែសម្រួលការនាំចេញពីសហរដ្ឋអាមេរិកទៅកាន់ប្រទេសចិនដោយគិតពីពន្ធនាពេលបច្ចុប្បន្ន” ។
ក្រុមហ៊ុនផលិតរថយន្តFord នៅដើមសប្តាហ៍នេះ បានបញ្ឈប់ការនាំចេញរថយន្ត F-150 Raptors, Mustangs និងរថយន្ត SUVs Bronco ដែលផលិតដោយ Michigan ក៏ដូចជា Lincoln Navigators ផលិតនៅរដ្ឋ Kentucky ទៅកាន់ប្រទេសចិន។
ការនាំចេញម៉ាស៊ីន និងប្រអប់លេខរបស់ Ford ផលិតដោយសហរដ្ឋអាមេរិកទៅកាន់ប្រទេសចិន ត្រូវបានគេរំពឹងថានឹងបន្ត បើទោះបីជាមានការផ្អាកលើការនាំចេញរថយន្តដែលបានដំឡើងរួចក៏ដោយ។
ចំណែកម៉ូដែល Lincoln Nautilus របស់Fordដែលផលិតនៅក្នុងប្រទេសចិន ក៏ត្រូវបានគេរំពឹងថានឹងមានការនាំចេញជាបន្តបន្ទាប់ ទោះបីជាមានពន្ធគយធ្ងន់ក៏ដោយ។
នេះបើយោងទៅតាមអនុស្សរណៈផ្ទៃក្នុងដែលបានផ្ញើទៅកាន់អ្នកចែកចាយដែលត្រូវបានគេមើលឃើញដោយ Reuters ក្រុមហ៊ុនផលិតរថយន្តនេះត្រូវបានគេរំពឹងថានឹងដំឡើងតម្លៃរថយន្តថ្មីរបស់ខ្លួន ប្រសិនបើពន្ធបន្តកើនឡើង។
ការវិភាគមួយដោយមជ្ឈមណ្ឌលស្រាវជ្រាវរថយន្តដែលបានចេញផ្សាយនៅដើមខែនេះបាននិយាយថាពន្ធ 25 ភាគរយរបស់លោក Trump លើការនាំចូលរថយន្តនឹងធ្វើឱ្យថ្លៃដើមកើនឡើងដល់ក្រុមហ៊ុនផលិតរថយន្តទាំងអស់ប្រហែល 108 ពាន់លានដុល្លារក្នុងឆ្នាំ 2025 ។
ក្រុមហ៊ុន Ford បានលក់រថយន្តចំនួន 442,000 គ្រឿង ដែលផលិតនៅសហរដ្ឋអាមេរិក និងកន្លែងផ្សេងទៀតនៅក្នុងប្រទេសចិនក្នុងឆ្នាំ 2024 ដែលស្មើនឹង 1.6 ភាគរយនៃទីផ្សារ នេះបើយោងតាមរបាយការណ៍ប្រចាំឆ្នាំចុងក្រោយបំផុតរបស់ក្រុមហ៊ុនផលិតរថយន្តFord។
លោក John Lawler អនុប្រធានក្រុមហ៊ុនបាននិយាយនៅសប្តាហ៍នេះនៅក្នុងសន្និសីទហិរញ្ញវត្ថុមួយថាការបណ្តាក់ទុននៅចិនរបស់ Ford បានផ្តល់ផលចំណេញពីប្រតិបត្តិការឆ្នាំ 2024 ប្រហែល 900 លានដុល្លារ។
លោក Trump កាលពីដើមសប្តាហ៍នេះ បានបំផុសគំនិតដែលថាគាត់កំពុងពិចារណាលើការកែប្រែចំពោះពន្ធដែលទាក់ទងនឹងវិស័យយានយន្ត ដោយបង្ហាញថាគាត់អាចអនុញ្ញាតឱ្យមានការលើកលែងលើការយកពន្ធដែលមានស្រាប់៕
ដោយ៖ធីរីណា
