ក្រោមស្មារតីសាមគ្គីភាពនិងការយកចិត្តទុកដាក់ខ្ពស់ចំពោះថ្នាក់ដឹកនាំ លោក ភឺន ផល្លា អញ្ជើញដឹកនាំក្រុមការងារចុះសួរសុខទុក្ខលោក កែវ ថៃ ដែលកំពុងសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត (រុស្ស៊ី)

ភ្នំពេញ៖ ក្រោមស្មារតីសាមគ្គីភាព និងការយកចិត្តទុកដាក់ខ្ពស់ចំពោះថ្នាក់ដឹកនាំនិងសមាជិកក្រុមការងារចលនាកសាងសមាជិកគណបក្ស លោក ភឺន ផល្លា អនុប្រធានក្រុមការងារចលនាកសាងសមាជិកគណបក្សនៅមូលដ្ឋានរាជធានី~ខេត្ត នៅថ្ងៃទី២២ ខែមិថុនា ឆ្នាំ២០២៦ បានអញ្ជើញដឹកនាំក្រុមការងារចុះសួរសុខទុក្ខលោក កែវ ថៃ សមាជិកក្រុមប្រឹក្សាខេត្ត និងជាអនុប្រធានក្រុមការងារចលនាកសាងសមាជិកគណបក្សនៅមូលដ្ឋានខេត្តកំពង់ឆ្នាំង ដែលកំពុងសម្រាកព្យាបាលជម្ងឺនៅមន្ទីរពេទ្យមិត្តភាពខ្មែរ-សូវៀត (រុស្ស៊ី)។

ក្នុងឱកាសនោះ លោក ភឺន ផល្លា បានពាំនាំនូវការផ្តាំផ្ញើសាកសួរសុខទុក្ខ ក្តីនឹករលឹក និងការលើកទឹកចិត្តពីថ្នាក់ដឹកនាំគណបក្ស ជូនចំពោះលោក កែវ ថៃ ដោយបានជូនពរឱ្យលោកមានសុខភាពរឹងមាំ ឆាប់ជាសះស្បើយពីជំងឺ និងវិលត្រឡប់មកបំពេញការងារជូនគណបក្ស និងសង្គមជាតិវិញនាពេលឆាប់ៗខាងមុខ។

ជាមួយគ្នានេះ ក្រុមការងារក៏បានសម្តែងនូវការយកចិត្តទុកដាក់ និងការគាំទ្រយ៉ាងពេញទំហឹងចំពោះលោក កែវ ថៃ ដែលជាថ្នាក់ដឹកនាំមានបទពិសោធន៍ និងបានចូលរួមចំណែកយ៉ាងសកម្មក្នុងការពង្រឹង និងពង្រីកចលនាកសាងសមាជិកគណបក្សនៅមូលដ្ឋានខេត្តកំពង់ឆ្នាំងកន្លងមក។

ការអញ្ជើញចុះសួរសុខទុក្ខនេះ បានឆ្លុះបញ្ចាំងពីវប្បធម៌សាមគ្គីភាព មនុស្សធម៌ និងការយកចិត្តទុកដាក់គ្នាទៅវិញទៅមកក្នុងជួរគណបក្ស ដែលជាកម្លាំងចលករដ៏សំខាន់ក្នុងការពង្រឹងភាពរឹងមាំ និងឯកភាពផ្ទៃក្នុង សំដៅបន្តបម្រើប្រជាពលរដ្ឋ និងការអភិវឌ្ឍសង្គមជាតិឱ្យកាន់តែរីកចម្រើន៕

ដោយ៖តារា