កូរ៉េខាងជើងសាកល្បងមីស៊ីលលើនាវាចម្បាំងដែលធ្លាប់ផ្អៀង

មេដឹកនាំ គីម ជុងអ៊ុន បានត្រួតពិនិត្យការសាកល្បងមីស៊ីលបញ្ជាទិស ប្រព័ន្ធសង្គ្រាមប្រឆាំងនាវាមុជទឹក ប្រព័ន្ធប្រឆាំងនាវា និងប្រព័ន្ធការពារដែនអាកាសលើនាវាចម្បាំង Kang Kon។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ថា ការធ្វើតេស្តទាំងនេះ ដែលធ្វើឡើងនៅថ្ងៃទី 3 ខែកក្កដា មានគោលបំណងវាយតម្លៃប្រព័ន្ធប្រយុទ្ធរបស់នាវាចម្បាំងថ្មី។ ការធ្វើតេស្តទាំងនេះផ្តោតលើ “សមត្ថភាពរកឃើញគោលដៅ និងដំណើរការព័ត៌មាន ប្រព័ន្ធបាញ់ប្រហាររួមបញ្ចូលគ្នា កាំភ្លើងធំស្វ័យប្រវត្តិ និងឧបករណ៍សង្គ្រាមអេឡិចត្រូនិក”។

មេដឹកនាំកូរ៉េខាងជើង គីម ជុងអ៊ុន បានទទួលការណែនាំអំពីផែនការសាកល្បងអាវុធរបស់នាវា មុនពេលមើលនាវា Kang Kon បាញ់អាវុធមួយចំនួន រួមទាំង “មីស៊ីលបញ្ជាទិសយុទ្ធសាស្ត្រ”។ ទីក្រុងព្យុងយ៉ាងតែងតែប្រើពាក្យ “យុទ្ធសាស្ត្រ” ដើម្បីសំដៅទៅលើអាវុធដែលមានសមត្ថភាពផ្ទុកក្បាលគ្រាប់នុយក្លេអ៊ែរ។

យោងតាម KCNA មេដឹកនាំកូរ៉េខាងជើងបានសរសើរការរីកចម្រើនថ្មីៗក្នុងការអភិវឌ្ឍអាវុធ ដោយជំរុញឱ្យមន្ត្រីខិតខំប្រឹងប្រែងបន្ថែមទៀត ដើម្បីពង្រីកសមត្ថភាពទប់ស្កាត់ជាយុទ្ធសាស្ត្ររបស់ប្រទេស និងការត្រៀមខ្លួនប្រយុទ្ធ។ លោកក៏បានទាមទារឱ្យបញ្ចប់ការធ្វើតេស្តនាវា Kang Kon និងការដាក់ឱ្យដំណើរការនាវានេះទៅក្នុងកងទ័ពជើងទឹកកូរ៉េខាងជើងក្នុងរយៈពេលពីរខែ។

រូបភាពដែលចេញផ្សាយដោយ KCNA បង្ហាញថាលោកគីមពាក់មួកធំទូលាយ ឈរនៅលើចំណុចខ្ពស់មួយដើម្បីសង្កេតមើលការសាកល្បង។ រូបថតមួយទៀតបង្ហាញពីនាវា Kang Kon បាញ់មីស៊ីលយុទ្ធសាស្ត្រជាបន្តបន្ទាប់។

នាវា Kang Kon គឺជានាវាទីពីរនៃថ្នាក់ Choe Hyon ដែលជានាវាចម្បាំងដ៏ធំ និងទំនើបបំផុតនៅក្នុងប្រវត្តិសាស្ត្រកូរ៉េខាងជើង។ នាវានេះបានជួបប្រទះនឹងឧប្បត្តិហេតុធ្ងន់ធ្ងរមួយក្នុងអំឡុងពេលពិធីដាក់នាវាចុះទឹកនៅឯកន្លែងផលិតនាវាមួយក្នុងទីក្រុង Chongjin ក្នុងខែឧសភា ឆ្នាំ 2025។ រូបភាពផ្កាយរណបបង្ហាញថាវាផ្អៀង និងស្ថិតក្នុងទីតាំងមិនស្ថិតស្ថេរ ពាក់កណ្តាលនៅលើដី និងពាក់កណ្តាលនៅក្នុងទឹក។ ស្ថានភាពនេះបង្ហាញពីបញ្ហាប្រឈមដ៏លំបាកបំផុតមួយសម្រាប់ប្រតិបត្តិការជួយសង្គ្រោះ៕