សារព័ត៌មាន នគរវត្ត តែងតែនាំមុខគេជានិច្ច
Daniel Dubois បានបញ្ជាក់ពីឋានៈរបស់ខ្លួនជាកីឡាករប្រដាល់ទម្ងន់ធ្ងន់ឈានមុខគេរបស់ចក្រភពអង់គ្លេស តាមរយៈការផ្តួល Fabio Wardley ឱ្យបោះបង់ការប្រកួតនៅទឹកទី២ ដើម្បីការពារខ្សែក្រវាត់ជើងឯក WBO របស់ខ្លួន ក្នុងទីក្រុងឡុងដ៍។
កីឡាករវ័យ ២៩ ឆ្នាំរូបនេះ បានវាយឱ្យ Wardley ដួលលើសង្វៀនដោយកណ្តាប់ដៃស្តាំត្រង់ ក្នុងរយៈពេលមិនដល់ ២០ វិនាទីដំបូងនៃការប្រកួតសងសឹកដ៏កក្រើក ដែលធ្វើឡើងនៅសង្វៀន O2 Arena។ បន្ទាប់មក Dubois បានបន្តវាយសម្រុកយ៉ាងខ្លាំងក្លា ដោយមិនបន្ធូរដៃឡើយ។
Wardley បានរួចផុតពីការប្រកួតទឹកទី១ ប៉ុន្តែត្រូវបាន Dubois វាយសម្រុកជាបន្តបន្ទាប់យ៉ាងខ្លាំងនៅទឹកទី២ រហូតដល់ក្រុមគ្រូបង្វឹករបស់គេបោះកន្សែងចូលសង្វៀន ដើម្បីស្នើឱ្យបញ្ឈប់ការប្រកួត។
នេះជាជ័យជម្នះដោយបញ្ឈប់គូប្រកួតជាលើកទី២ ជាប់គ្នារបស់ Dubois លើ Wardley ក្នុងរយៈពេលត្រឹមតែ ៥ ខែ បន្ទាប់ពីគេបានក្រោកឡើងវិញពីការដួលលើសង្វៀនចំនួនពីរលើក ដើម្បីដណ្តើមខ្សែក្រវាត់ពីគូប្រជែងរួមជាតិរូបនេះ ក្នុងការប្រកួតដ៏ជក់ចិត្តចំនួន ១១ ទឹក នៅទីក្រុង Manchester។
លើកនេះ មិនមានការប្រកួតដ៏តានតឹងដូចលើកមុនឡើយ ខណៈម្ចាស់ខ្សែក្រវាត់ Dubois បានគ្រប់គ្រងការប្រកួតតាំងពីសំឡេងជួងចាប់ផ្តើម។ ជ័យជម្នះនេះបានធ្វើឱ្យកំណត់ត្រាប្រកួតអាជីពរបស់គេកើនដល់ ២៤ ជ័យជម្នះ ក្នុងនោះ ២៣ លើកបានឈ្នះដោយផ្តួលគូប្រកួតឱ្យសន្លប់ ឬបញ្ឈប់ការប្រកួត និងចាញ់ ៣ លើក។
Dubois បាននិយាយថា៖ «Fabio គឺជាកីឡាករដ៏ល្អម្នាក់ ហើយគេបានមកប្រកួតជាមួយខ្ញុំជាលើកទី២ ប៉ុន្តែពេលវេលា និងសម័យកាលនេះជារបស់ខ្ញុំ។ ខ្ញុំបានត្រៀមចិត្តយ៉ាងមុតមាំ និងមានបំណងវាយប្រហារយ៉ាងខ្លាំងតាំងពីដើមការប្រកួត»។
គេបន្ថែមថា៖ «លើកមុន ខ្ញុំស្ថិតក្នុងស្ថានភាពដែលគ្មានជម្រើសច្រើនទេ។ ប៉ុន្តែលើកនេះ យើងគ្រាន់តែត្រូវចេញទៅបង្ហាញថា យើងពិតជាមកដើម្បីធ្វើការងារនេះឱ្យបានសម្រេច ហើយយើងបានធ្វើវាបានយ៉ាងល្អនៅយប់នេះ»។
ចំណែក Wardley វ័យ ៣១ ឆ្នាំ បានរងបរាជ័យជាលើកទី២ ក្នុងអាជីពប្រដាល់អាជីពរបស់ខ្លួន ដែលមានការប្រកួតសរុប ២៣ លើក។
Wardley បាននិយាយថា៖ «ខ្ញុំតែងតែប្រកួតជាមួយកីឡាករល្អបំផុតដែលមាននៅទីនោះ ជាមួយអ្នកប្រកួតឆ្នើមៗក្នុងវិស័យនេះ កីឡាករដែលមានទំហំខ្លួនធំ ខ្លាំង និងស្វិតស្វាញបំផុត។ ដូច្នេះ ការចាញ់មិនមែនជារឿងគួរឱ្យខ្មាសអៀនទេ នៅពេលដែលអ្នកកំពុងសាកល្បងសមត្ថភាពរបស់ខ្លួនជាមួយកីឡាករល្អបំផុត»៕
ដោយ៖ ភារៈ
