សារព័ត៌មាន នគរវត្ត តែងតែនាំមុខគេជានិច្ច
រុស្ស៊ី និងអ៊ុយក្រែន បានឈានដល់កិច្ចព្រមព្រៀងជាគោលការណ៍ ដើម្បីធ្វើការដោះដូរអ្នកទោសទ្រង់ទ្រាយធំ បន្ទាប់ពីការចរចារយៈពេលពីរថ្ងៃនៅទីក្រុងអាប៊ូដាប៊ី។ ទោះជាយ៉ាងណាក៏ដោយ ការខ្វែងគំនិតគ្នាជាមូលដ្ឋាន ជាពិសេសលើបញ្ហាទឹកដី និងការធានាសន្តិសុខ នៅតែមិនទាន់ដោះស្រាយបាន។
ការចរចាដោយគ្មានការទម្លាយភាពទាល់ច្រក
នេះគឺជាការចរចាដោយផ្ទាល់លើកដំបូងរវាងរុស្ស៊ី និងអ៊ុយក្រែនក្នុងរយៈពេលប្រាំបួនខែ។ នៅពេលបញ្ចប់កិច្ចប្រជុំនៅថ្ងៃទី១១ ខែវិច្ឆិកា ភាគីទាំងពីរបានយល់ព្រមជាគោលការណ៍ក្នុងការដោះដូរអ្នកទោសសង្គ្រាម ហើយនឹងកំណត់ចំនួនជាក់លាក់នៅថ្ងៃទី១២ ខែវិច្ឆិកា។
លោក Jared Kushner បេសកជនសហរដ្ឋអាមេរិក បាននិយាយថា ការដោះដូរនាពេលខាងមុខអាចជាការដោះលែងអ្នកទោសមនុស្សធម៌ដ៏ធំបំផុតចាប់តាំងពីជម្លោះបានចាប់ផ្តើម។ ប្រធានាធិបតីអ៊ុយក្រែន Volodymyr Zelensky ក៏បានវាយតម្លៃទំហំនៃការផ្លាស់ប្តូរថាមានសារៈសំខាន់ផងដែរ។
ទាំងរុស្ស៊ី និងអ៊ុយក្រែន បានទទួលស្គាល់វឌ្ឍនភាពនៅក្នុងកិច្ចចរចានៅទីក្រុងអាប៊ូដាប៊ី ប្រទេសអារ៉ាប់រួម (UAE) ហើយបានបង្ហាញថា ការចរចានឹងបន្ត។ ទោះជាយ៉ាងណាក៏ដោយ ក្រៅពីបញ្ហាដោះដូរអ្នកទោស គ្មានការទម្លាយភាពទាល់ច្រកជាក់ស្តែងណាមួយត្រូវបានប្រកាសនោះទេ។
លោក Jared Kushner កូនប្រសាររបស់ប្រធានាធិបតីអាមេរិក លោក Donald Trump បាននិយាយថា អ្នកសម្របសម្រួលអាមេរិកកំពុងស្វែងរកការលើកទឹកចិត្តភាគីទាំងពីរឱ្យទទួលស្គាល់អត្ថប្រយោជន៍នៃការបញ្ចប់ជម្លោះដ៏ធំបំផុតនៅអឺរ៉ុបចាប់តាំងពីសង្គ្រាមលោកលើកទី 2។
ក្នុងចំណោមការចរចាទឹកដីដែលជាប់គាំង អ្នកសម្របសម្រួលអាមេរិកកំពុងព្យាយាមផ្លាស់ប្តូរការផ្តោតអារម្មណ៍ទៅបញ្ហាដូចជាការធានាសន្តិសុខ និងការកសាងឡើងវិញក្រោយសង្គ្រាមនៅអ៊ុយក្រែន៕
ដោយ៖ ធីរីណា
