សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ បើយោងតាមរបាយការណ៍របស់សមត្ថកិច្ចនគរបាលជំនាញខេត្តកំពត បានឱ្យដឹងថា អ្នកស្លាប់ដែល សង្ស័យបណ្តាលមកពីពុលស្រា នៅស្រុកឈូក បានកើនដល់ចំនួន ៧ នាក់ហើយ គិតត្រឹមព្រឹកថ្ងៃទី២៩ ខែកក្កដា ឆ្នាំ២០២១នេះ។
របាយការណ៍ដដែល បានបន្ថែមទៀតថា កាលពីយប់ថ្ងៃទី២៨ ខែកក្កដា ឆ្នាំ២០២១វេលាម៉ោង ២០និង ៣០នាទី មានករណីបុរសវ័យ ៣៥ឆ្នាំម្នាក់ មានទីលំនៅភូមិដូនយ៉យ ឃុំដូនយ៉យ ស្រុកឈូក បានស្លាប់ក្នុង មន្ទីរពេទ្យបង្អែក ខេត្តកំពត សង្ស័យបណ្តាលមកពីពុលស្រា ហើយនេះជាជនរងគ្រោះទី៧ ក្នុងចំណោមអ្នកស្លាប់។
គួររម្លឹកផងដែរថា ចាប់ពីម៉ោង ៦ ល្ងាចថ្ងៃទី២៦ ដល់ម៉ោង ១០ ព្រឹកថ្ងៃទី២៨ ខែកក្កដា ឆ្នាំ២០២១ អ្នកភូមិដូនយ៉យ និងភូមិក្រសាំងមានជ័យ ៦ នាក់ អាយុចាប់ពី ៣៦ ឆ្នាំ ដល់ ៦១ ឆ្នាំ បានស្លាប់ជាបន្តបន្ទាប់ដោយសង្ស័យបណ្តាលមកពីពុលស្រា។ ក្រៅពីអ្នកទាំង ៦ នៅមានបុរស ២នាក់ ស្ថិតក្នុងស្ថានភាពសង្គ្រោះបន្ទាន់។
ដោយឡែកពាក់ព័ន្ធករណីខាងលេីនេះ ក្រោយពីទទួលបាននូវព័ត៌មានស្ដីពីហេតុករណីពុលស្រា ដែលបណ្ដាលឱ្យប្រជាពលរដ្ឋស្លាប់បាត់បង់ជីវិតបន្តបន្ទាប់រហូតដល់០៤នាក់ នៅរសៀលថ្ងៃទី២៧ ខែកក្កដា ឆ្នាំ២០២១ មន្ត្រីជំនាញសាខា ក.ប.ប. ខេត្តកំពត សហការជាមួយស្ថាប័នពាក់ព័ន្ធចុះដល់ទីកន្លែងកើតហេតុ ដែលមានទីតាំងស្ថិតនៅភូមិដូនយ៉យ ឃុំដូនយ៉យ ស្រុកឈូក ខេត្តកំពត ដើម្បីពិនិត្យ និងស្វែងរកសំណាកដែលនៅសេសសល់មកវិភាគរកមូលហេតុដែលបណ្ដាលឱ្យពុល។
ជាក់ស្ដែងក្នុងការពិនិត្យនោះ ត្រូវបានធ្វើឡើងដោយមានការចូលរួមសម្របសម្រួលឡើងដោយព្រះរាជអាជ្ញាអមសាលាដំបូងខេត្តកំពត និងមានការចូលរួមពីមន្រ្តីជំនាញពាក់ព័ន្ធផងដែរ។
ជាមួយគ្នានោះ មន្រ្តីជំនាញ ក.ប.ប. បានដកយកសំណាកស្រាសចំនួន១២គំរូ និងស្រាថ្នាំចំនួន១០គំរូ សរុប២២គំរូ ដើម្បធ្វើការវិភាគនៅមន្ទីរពិសោធន៍អគ្គនាយកដ្ឋាន ក.ប.ប.ផងដែរ៕ដោយ៖សហការី
