សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្តយ៉ាងលឿននិងងោកមួយភាំងបានរេចង្កូតទៅបុករបាំងថ្មពុះចែកទ្រូងផ្លូវយ៉ាងពេញទំហឹង បណ្តាលឱ្យរថយន្តខ្ទេចមួយកំណាត់មុខ និងអ្នកបើករងរបួសជេីងម្ខាង។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២និង ៣០នាទីយប់ឈានចូលថ្ងៃអង្គារ ទី២៣ ខែឧសភា ឆ្នាំ២០២៣នៅត្រង់ចំណុចមុខសាលារៀនជម្ពូវ័ន តាមបណ្ដោយផ្លូវជាតិលេខ៤ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមការរៀបរាប់របស់អ្នកបើករថយន្តបង្កម៉ាកHYUNDAI PORTER ពណ៌ស ស៊េរីឆ្នាំ២០០២ ពាក់ផ្លាកលេខ កំពង់ស្ពឺ2A-5016 បានប្រាប់ឱ្យដឹងថា ដំបូងឡើយគាត់បើករថយន្តដឹកបន្លែចេញពីខេត្តកំពង់ស្ពឺយកទៅបោះឱ្យម៉ូយនៅផ្សារដើមគ ហើយពេលដាក់បន្លែរួចរាល់ហើយគាត់ក៏ត្រឡប់ទៅខេត្តកំពង់ស្ពឺវិញ ខណៈមកដល់ចំណុចកើតហេតុខាងលើក៏ងោកមួយភាំងរេចង្កូតមកខាងឆ្វេងដៃជ្រុលទៅបុករបាំងថ្មពុះចែកទ្រូងផ្លូវបណ្ដាលឱ្យខ្ទេចរថយន្តមួយកំណាត់មុខនិងរងរបួសត្រូវជើងគាត់ជាអ្នកបើករថយន្តផងដែរ ចំណែកឯរបាំងថ្មបាក់បែកបន្តិចបន្តួច។
ក្រោយពីកើតហេតុ សមត្ថកិច្ចជំនាញបានចុះធ្វេីការស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
