សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីគ្រោះថ្នាក់ចរាចរណ៍មួយបានកើតឡើងនៅវេលាម៉ោង៤និង២៥នាទីរសៀល ថ្ងៃទី២៨ ខែ ឧសភា ឆ្នាំ២០២៣ នៅតាមបណ្ដោយផ្លូវស្វាយជួរ ស្ថិតនៅខាងក្រោយសាលាសង្កាត់ព្រែកលៀប ភូមិស្វាយជួរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ ។
តាមការឱ្យដឹងពីប្រភពនៅនឹងកន្លែងកើតហេតុបានអោយដឹងថា ដំបូងគេបានឃើញយុវជនចំនួន៥នាក់ជិះម៉ូតូ៣ គ្រឿងពីទិសខាងត្បូងទៅទិសខាងជើង រីឯជនរងគ្រោះជិះម៉ូតូ១គ្រឿងម្នាក់ឯង។ លុះមកដល់ចំណុចកើតហេតុត្រង់ផ្លូវកោងខ្លាំង ហើយមានភ្លៀងខ្លាំងផងនោះក៏បានជ្រុលទៅបុកជាមួយនឹងរថយន្តហ្វដដែលបើកបញ្ច្រាសទិសគ្នាពេញទំហឹង បណ្ដាលអោយជនម្នាក់ស្លាប់នៅនឹងកន្លែងកើតហេតុភ្លាមៗ។
សពជនរងគ្រោះមានឈ្មោះ ផល សំណាង ភេទប្រុស អាយុ១៩ឆ្នាំ ជាសិស្សថ្នាក់ទី១២ រៀននៅវិទ្យាល័យទួលអំពិលចំការដូង មានអាសយដ្ឋានបច្ចុប្បន្ន រស់នៅភូមិថ្មី សង្កាត់ដង្កោ ខណ្ឌដង្កោរាជធានីភ្នំពេញ ក្នុងបុរីពិភពថ្មីចំការដូង។
ជនរងគ្រោះជិះម៉ូតូម៉ាកហុងដាឌ្រីមពណ៌ក្រហម ពាក់ស្លាកលេខ ភ្នំពេញ 1HF- 6654 រីឯរម្ចាស់រថយន្តហ្វដពណ៌ទឹកប្រាក់ដឹកអ្នកដំណើរ។ ក្រោយពេលកើតហេតុ តៃកុងរថយន្តបានរត់គេចខ្លួនបាត់ស្រមោលបន្សល់ទុកតែរថយន្តហ្វដពាក់ស្លាកលេខ ភ្នំពេញ 2AX -1392 ។
បច្ចុប្បន្នរថយន្តនិងម៉ូតូត្រូវបានកម្លាំងជំនាញចរាចរណ៍យកទៅរក្សាទុករង់ចាំដោះស្រាយគ្នានៅពេលក្រោយ។
ចំណែកសពជនរងគ្រោះក្រោយពីធ្វើកំណត់ហេតុចប់សព្វគ្រប់សមត្ថកិច្ចបានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ សហការី
