សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង នៅព្រឹកថ្ងៃទី១៣ ខែមិថុនា ឆ្នាំ២០២៣នេះ បានឱ្យដឹងថា កម្លាំងសមត្ថកិច្ចចម្រុះ បានបន្តចុះបង្ក្រាបបទល្មើសនេសាទខុសច្បាប់ក្នុងភូមិសាស្ត្រស្រុកឯកភ្នំ និងដកហូតវត្ថុតាងជាក់ស្ដែងយកមកដុតបំផ្លាញចោលនឹងកន្លែង។
ក្នុងប្រតិបត្តិការខាងលេីនេះ បានកេីតឡេីងកាលពីថ្ងៃទី១២ ខែមិថុនា ឆ្នាំ២០២៣ម្សិលមិញនេះ ដោយកម្លាំងអធិការដ្ឋាននគរបាលស្រុកឯកភ្នំ រួមនឹងកម្លាំងប៉ុស្តិ៍នគរបាលរដ្ឋបាលកោះជីវាំង ដឹកនាំដោយលោកវរសេនីយ៍ឯក ឡុង យោធាវីរៈ ជាអធិការនគរបាលស្រុក សហការដឹកនាំជាមួយឯកឧត្តម ខុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានចុះបង្រ្កាបបទល្មើសជលផលនៅលំហរបឹងទន្លេសាប (ខាងកើតអតីតឡូលេខ១, ២ និង៣) ០១លើក នៅចំណុចភូមិព្រែកទាល់ និងភូមិក្បាលតោល ឃុំកោះជីវាំង ស្រុកឯកភ្នំ ខេត្តបាត់ដំបង ចូលរួមកម្លាំងចំរុះសរុបចំនួន ៦៤នាក់ ។
ជាក់ស្ដែងសមត្ថកិច្ចបានប្រើប្រាស់សម្ភារៈក្នុងកិច្ចប្រតិបត្តិការនេះរួមមាន កាណូតចំនួន ១៦គ្រឿង ជាលទ្ធផលសមត្ថកិច្ចបង្ក្រាបបាន ៖
-សាច់មងប្រវែង ៤,៧០០ម៉ែត្រ
-ឡុកសម្រាប់ត្រីចំនួន ១៦គ្រឿង
-បង្គោលចំនួន ១,៤៥០ដើម
-ប្រលែងត្រីចំរុះចំនួន ១៥០គីឡូក្រាម ។
គួរបញ្ជាក់ថាចំពោះករណីនេះ រាល់វត្ថុតាងដែលបង្ក្រាបបានសមត្ថកិច្ចកាប់បំផ្លាញ និងដុតកម្ទេចចោលនៅនឹងកន្លែង ដោយឡែកជនល្មើសបានរត់គេចខ្លួនមុនពេលសមត្ថកិច្ចចុះអន្តរាគមន៍ ៕
ដោយ ៖ អរុណរះ
