🔥Update ៖ គ្រោះអគ្គិភ័យឆាបឆេះឃ្លាំងសិប្បកម្ម និងរថយន្តមួយគ្រឿងនៅខណ្ឌច្បារអំពៅ

ចែករំលែក៖

ភ្នំពេញ ៖ គ្រោះអគ្គិភ័យបានឆាបឆេះឃ្លាំងសិប្បកម្មដេរពូកសាឡុង និងរថយន្តPajaro មួយគ្រឿងរបស់ប្រជាពលរដ្ឋ និងសម្ភារៈមួយចំនួនយ៉ាងសន្ធោសន្ធៅ ដោយបង្កការភ្ញាក់ផ្អេីលនៅវេលាម៉ោង ១៦និង៥០នាទីល្ងាច ថ្ងៃព្រហស្បតិ៍ ១១រោចខែបឋមាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៣ ខែកក្កដា ឆ្នាំ២០២៣ នៅចំណុចសិប្បកម្មដេរពូកសាឡុង ស្ថិតនៅ ភូមិតាង៉ូវក្រោម សង្កាត់និរោធ ខណ្ឌច្បារអំពៅ រាជធានីភ្នំពេញ។

សមត្ថកិច្ចមូលដ្ឋានបានឱ្យដឹងថា ម្ចាស់ទីតាំងខាងលេីមានឈ្មោះ សុខ ចន្ទី ភេទប្រុស អាយុ ៣៩ឆ្នាំ ជនជាតិវៀតណាម មុខរបរ: ម្ចាស់សិប្បកម្ម ។ រីឯឃ្លាំងសិប្បកម្មខាងលេីនេះជាប្រភេទសំណង់: ទំហំ ១៥ម៉ែត្រគុណ ២០ម៉ែត្រ ដោយការឆាបឆេះនេះបានធ្វេីឱ្យខូចខាតសម្ភារៈក្នុងឃ្លាំងសិប្បកម្មមានដូចជា ៖ ម៉ាស៊ីនដេរនិងភុងចំនួន ០៥គ្រឿង, រថយន្ត PAJAROចំនួន ០១គ្រឿង, ម៉ូតូ Honda AirBlack ចំនួន ០១គ្រឿង នឹងឆេះរាលដាលដល់ផ្ទះឈើប្រក់ស័ង្កសីចំនួន ០១ខ្នងអស់ទាំងស្រុង នឹងផ្ទះថ្មចំនួន ០១ខ្នង (ខូចខាតប្រហែល១០%)។

ប្រភពដដែលបានឱ្យដឹងថា ក្នុងករណីគ្រោះអគ្គិភ័យនេះគឺគ្មានមនុស្សរងរបួស ឬស្លាប់ឡេីយ ដោយកម្លាំងជំនាញរបស់រថយន្តការិយាល័យអគ្គិភ័យ ចំនួន ១៥គ្រឿង បានប្រេីប្រាស់ទឹកអស់ចំនួន ៣០ឡាន ស្មើរនឹង ១២០ម៉ែត្រគូប ។ ក្នុងនោះមានរថយន្តជំនួយពីអង្គភាពផ្សែងបានប្រេីប្រាស់ទឹកអស់ចំនួន១៦ឡានផងដែរ ទេីបបានធ្វេីការបាញ់ទឹកពន្លត់ចប់នៅម៉ោង ១៨និង៥០នាទី នាថ្ងៃខែ ឆ្នាំដដែល ។ ចំពោះមូលហេតុ នៃការឆាបឆេះ សមត្ថកិច្ចកំពុងស្រាវជ្រាវបន្ត ៕