សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ២នាក់ បានជិះម៉ូតូមួយគ្រឿងឌុបគ្នាធ្វេីសកម្មភាពឆក់កាបូបលុយពីម្ដាយកូនពីរនាក់កំពុងធ្វេីដំណេីរតាមដងផ្លូវបានសម្រេច ហេីយជិះទៅជាប់អន្ទាក់សមត្ថកិច្ចចរាចរណ៍ដែលប្រចាំការនៅគោលដៅស្ពានដែកចំការដូង កាលពីវេលាម៉ោង ១ និង២០នាទីរសៀលថ្ងៃទី ៣១ខែកក្កដាឆ្នាំ ២០២៣ម្សិលមិញ ស្ថិតនៅត្រង់ចំណុចស្តុបស្ពានដែកចំការដូង ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
ជនរងគ្រោះមានឈ្មោះ អឿង សៀងហា ភេទប្រុស អាយុ១៧ឆ្នាំ ស្នាក់នៅម្ដុំកន្លែងកេីតហេតុ ។ ចំណែកជនសង្ស័យទាំង២នាក់ដែលឃាត់ខ្លួនរួមមាន ៖ ទី១ឈ្មោះកែវ វណ្ណា ភេទប្រុស អាយុ៣៨ឆ្នាំមុខរបររត់រកង់បី ស្នាក់នៅសង្កាត់បឹងទំពុន ខណ្ឌមានជ័យ ។ និងទី២ ឈ្មោះ គៀន រស្មី ភេទប្រុស អាយុ៣៨ឆ្នាំមុខរបររេីសអេតចាយ ស្នាក់នៅមិនពិតប្រាកដ ។
តាមសម្ដីយុវជនរងគ្រោះបានឱ្យដឹងថា នៅពេលកេីតហេតុ រូបគាត់និងម្ដាយ បានជិះម៉ូតូមកពីទិញធ្យូងនៅតាមផ្លូវ៣៧១ ក្នុងសង្កាត់បឹងទំពុនទី២ ខណ្ឌមានជ័យ រួចបានត្រឡប់មកផ្ទះវិញដោយដាក់កាបូបលុយនៅឃ្លប់ម៉ូតូខាងមុខ ។ ខណៈជិះតាមមកដល់ផ្លូវ៣៧១ ទិសដៅពីកេីតទៅលិច ស្រាប់តែមានជនសង្ស័យពីរនាក់ជិះម៉ូតូម៉ាក វេវ ពណ៌ខ្មៅ ពាក់ផ្លាកលេខ ភ្នំពេញ 1HH-1756 មកពីក្រោយ ធ្វើសកម្មភាពឆក់កាបូបពីជនរងគ្រោះបានសម្រេច ហើយក៏ជិះគេចខ្លួនតាមផ្លូវ៣៧១ មកទិសខាងលិច តែត្រូវជនរងគ្រោះដេញតាមស្រែកថាចោរៗ និងមានអ្នកធ្វេីដំណេីរតាមក្រោយជួយដេញរហូតមកដល់ចំណុចស្តុបស្ពានដែកចំការដូងក៏ជួបកម្លាំងសមត្ថកិច្ចចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ធ្វើការឃាត់ខ្លួនជនសង្ស័យទាំងពីរនាក់ខាងលេីនេះភ្លាមៗ ដោយសមត្ថកិច្ចបានឆែកនៅក្នុងខ្លួនជនសង្ស័យបានឃើញកាបូបលុយនិងទូរស័ព្ទរបស់នារីរងគ្រោះ រួមកាំបិតតាំងតោរបស់ជនសង្ស័យចំនួន១ផងដែរ ។
បន្ទាប់មកសមត្ថកិច្ចចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ធ្វេីការទាក់ទងសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលបឹងទំពុនទី២ ឱ្យមកយកជនសង្ស័យខាងលេីទៅសួរនាំដើម្បីចាត់ការបន្តតាមនីតិវិធី ៕
ដោយ ៖ ភារ៉ា ដង្កោ
