សារព័ត៌មាន នគរវត្ត តែងតែនាំមុខគេជានិច្ច
សារព័ត៌មាន AFP នៅថ្ងៃអង្គារ ទី៨ ខែសីហា ឆ្នាំ២០២៣ តំបន់ជាច្រើនរបស់ជប៉ុនក្នុងនោះរួមមានទាំងតំបន់ភាគកណ្ដាលផងដែរ កំពុងត្រៀមខ្លួនរួចជាស្រេចរង់ចាំការមកដល់នៃព្យុះទីហ្វុង Khanun ដែលនឹងបក់បោកទៅក្បែរតំបន់ភាគនិរតីនៃប្រទេសនៅថ្ងៃអង្គារនេះ ខណៈដែលមន្ត្រីឧតុនិយមព្រមានពីការខូចខាតបង្កឡើងដោយសារខ្យល់បក់និងភ្លៀងធ្លាក់ខ្លាំង។
ព្យុះទីហ្វុង Khanun កំពុងស្ថិតនៅចម្ងាយ១៦០គីឡូម៉ែត្រពីភាគឦសាននៃទីក្រុងអាម៉ាមិ (Amami) ស្ថិតនៅភាគនិរតីប្រទេសជប៉ុន និងកំពុងធ្វើដំណើរសន្សឹមៗឆ្ពោះទៅកាន់ភាគខាងជើង។ ទីភ្នាក់ងារឧតុនិយមជប៉ុនបានឱ្យដឹងទៀតថា បន្ទាប់ពីបានវាយប្រហារលើខេត្ត Nagasaki ភាគខាងលិចនៃប្រទេសជប៉ុន ព្យុះទីហ្វុង Khanun ត្រូវបានគេព្យាករថានឹងបក់បោកទៅកាន់តំបន់ឆ្នេរភាគខាងជើង ក្នុងដំណើរផ្លូវឆ្ពោះទៅកាន់កូរ៉េខាងត្បូង។ ព្យុះទីហ្វុង Khanun កំពុងថមថយចុះឥទ្ធិពលបន្តិចម្ដងៗ ប៉ុន្តែនៅតែមានកម្លាំងខ្យល់ក្នុងល្បឿន១០៨គីឡូម៉ែត្រក្នុងមួយម៉ោង ឬអាចកើនដល់ ១៤៤គីឡូម៉ែត្រក្នុងមួយម៉ោង។
បើតាមការព្យាករ ព្យុះទីហ្វុង Khanun អាចនឹងនាំមកជាមួយនូវទឹកភ្លៀងកម្រិតចន្លោះពី ៣០០មិល្លីម៉ែត្រដល់៤០០មិលី្លម៉ែត្រ នៅថ្ងៃអង្គារនិងថ្ងៃពុធសប្ដាហ៍នេះ នៅក្នុងតំបន់ ស៊ីកុគូ (Shikoku) និងគ្យូស៊ុ (Kyushu) ព្រមទាំងកម្រិតទឹកភ្លៀងពី ២០០មិល្លីម៉ែត្រ ដល់៣០០មិលី្លម៉ែត្រ នៅក្នុងទីក្រុង អាម៉ាមិ (Amami) រួមទាំងតំបន់
គីនគិ (Kinki) នៃភាគខាងលិចប្រទេសជប៉ុន និងតំបន់តូកៃ (Tokai) នៃតំបន់ភាគកណ្ដាល៕ ដោយ៖ ធីរីណា
រូបថត៖ KYODO
