សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិស្វីសម្នាក់បានធ្លាក់ពីលើអគារកម្ពស់២៤ជាន់មកក្រោមបណ្តាលឱ្យបែកសាច់ជាបំណែកស្លាប់នៅនឹងកន្លែងកើតហេតុ បង្កឱ្យមានការភ្ញាក់ផ្អើលកាលពីវេលាម៉ោង ៤និង៣០នាទីទៀបភ្លឺថ្ងៃទី២៤ខែសីហា ឆ្នាំ២០២៣ ស្ថិតនៅចំណុចអគារខុនដូយីហោ” PENINSULA “តាមបណ្តោយផ្លូវជាតិលេខ៦ ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។
តាមការបញ្ជាក់ពីមន្រ្តីនគរបាលខណ្ឌជ្រោយចង្វាបានឱ្យដឹងនៅរសៀលថ្ងៃទី២៤ ខែសីហានេះថា ករណីនេះគឺជាករណីធ្វើអត្តឃាតលោតពីលើអគារខុនដូសម្លាប់ខ្លួនឯង។ ជនរងគ្រោះមានឈ្មោះ Kalt Christian Philipp ភេទប្រុស ជនជាតិស្វីស អាយុ៤១ឆ្នាំ កាន់លិខិតឆ្លងដែនលេខ X5164733 ។
តាមប្រភពព័ត៌មានពីប្រជាពលរដ្ឋនៅក្បែរកន្លែងកេីតហេតុបានឱ្យដឹងថា មុនពេលកើតហេតុរូបគាត់បានឈរលេងនៅមុខការាសសាំង TOTAL ជាប់នឹងកន្លែងកើតហេតុ លុះមួយសន្ទុះក្រោយមករូបគាត់បានឮសូរសំឡេងធ្លាក់មកពីលើអគារកើតហេតុលាន់យ៉ាងខ្លាំង ហើយរូបគាត់ស្មានតែមានគេទម្លាក់អីវ៉ាន់មកពីលើអគារខុនដូនោះ។ ក្រោយមកក៏មានសន្តិសុខប្រចាំការនៅទីនោះរត់មកប្រាប់ថាមានមនុស្សធ្លាក់ពីលើអគារ រួចក៏នាំគ្នាទៅមើលស្រាប់តែឃើញជនរងគ្រោះដេកផ្កាប់មុខ ពេលនោះដែរពួកគាត់ក៏នាំគ្នាប្រញាប់រាយការណ៍ទៅសមត្ថកិច្ចមូលដ្ឋានសង្កាត់ជ្រោយចង្វាឱ្យចុះមកទីតាំងកើតហេតុភ្លាមៗផងដែរ។
ក្រោយបានទទួលព័ត៌មានពីមជ្ឈមណ្ឌលប្រចាំបញ្ហា Hotline117 នៃអគ្គស្នងការដ្ឋាននគរបាលជាតិ ភ្លាមៗកម្លាំងជំនាញមូលដ្ឋានបានចុះដល់កន្លែងកើតហេតុ។ ឆ្លងតាមការពិនិត្យរបស់កម្លាំងបច្ចេកទេស កោសលវិច័យរាជធានីភ្នំពេញ និងការពិនិត្យរបស់លោកឧកញ៉ាវេជ្ជបណ្តិត នង សុវណ្ណរ័ត្ន គ្រូពេទ្យកោសលវិច័យសាលាដំបូងរាជធានីភ្នំពេញ បានបញ្ជាក់ថា សពពិតជាបានធ្វើអត្តឃាតលោតពីលើអគារខុនដូសម្លាប់ខ្លួនពិតប្រាកដមែន ។
គួរបញ្ជាក់ថា ករណីនេះមជ្ឈមណ្ឌលប្រចាំបញ្ហា បានទទួលរបាយការណ៍ឆ្លើយតបពីប្រចាំបញ្ជានៃអធិការដ្ឋាននគរបាលខណ្ឌជ្រោយចង្វានៅវេលាម៉ោង១១:៣១ នាទី ថ្ងៃ-ខែ-ឆ្នាំដដែល៕
ដោយ៖សហការី
