សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា អាកាសយានដ្ឋានអន្តរជាតិសៀមរាបអង្គរដែលត្រូវបានសម្ពោធដាក់ឲ្យប្រើប្រាស់ជាផ្លូវនៅថ្ងៃទី ១៦ វិច្ឆិកា ២០២៣ នេះ គឺកើតចេញពីផ្លែផ្កានៃសុខសន្តិភាព និងជាសមិទ្ធផលថ្មីលេចធ្លោបន្ថែមទៀតនៃចំណងមិត្តភាពដែកថែបកម្ពុជា-ចិន បន្ទាប់ពីគម្រោងសាងសង់ផ្លូវល្បឿនលឿនភ្នំពេញ-ព្រះសីហនុ ដែលជាផ្លូវល្បឿនលឿនដំបូងគេនៅកម្ពុជា និងដែលត្រូវបានដាក់ឲ្យប្រើប្រាស់កាលពីចុងឆ្នាំ២០២២ កន្លងទៅ។
សម្តេចធិបតី ហ៊ុន ម៉ាណែត នាយករដ្ឋមន្ត្រី បានមានប្រសាសន៍បែបនេះ នាព្រឹកថ្ងៃទី១៦ ខែវិច្ឆិកា ឆ្នាំ២០២៣ ក្នុងឱកាសអញ្ជើញជាអធិបតី សម្ពោធដាក់ឲ្យប្រើប្រាស់ជាផ្លូវការអាកាសយានដ្ឋានអន្តរជាតិសៀមរាបអង្គរ ខេត្តសៀមរាប។
សម្តេចធិបតី ហ៊ុន ម៉ាណែត បានមានប្រសាសន៍ឲ្យដឹងថា ទំនាក់ទំនងជាប្រពៃណីកម្ពុជា-ចិន បានចាប់បដិសន្ធិតាមរយៈចំណងមិត្តភាព ជាពិសេសរវាងសម្តេចព្រះបរមរតនកោដ្ឋ នរោត្តម សីហនុ និងឯកឧត្តម ជូ អេនឡាយ អតីតនាយករដ្ឋមន្ត្រីចិន ហើយត្រូវបានពូនជ្រុំយ៉ាងសកម្មដោយសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងថ្នាក់ដឹកនាំចិនជាច្រើនជំនាន់ រហូតក្លាយជាទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ២០១០។
សម្តេចធិបតីនាយករដ្ឋមន្ត្រី បានបញ្ជាក់ថា ឆ្នាំ២០២៣ នេះ គឺជាខួប ៦៥ឆ្នាំ នៃទំនាក់ទំនងការទូតកម្ពុជា-ចិន និងជាឆ្នាំមិត្តភាពកម្ពុជា-ចិន។ ប្រទេសកម្ពុជា-ចិន បានរៀបចំកម្មវិធីសំខាន់ៗជាច្រើន ដើម្បីអបអរសាទរព្រឹត្តិការណ៍ដ៏មានអត្ថន័យនេះ ហើយថ្ងៃនេះយើងមានការសម្ពោធហេដ្ឋារចនាសម្ព័ន្ធដ៏វិសេសវិសាលមួយទៀត ដែលជាសក្ខីភាពចំណងការទូតដ៏រឹងមាំនិងកិច្ចសហប្រតិបត្តិការដ័ស៊ីជម្រៅរវាងប្រទេសទាំងពីរ។
នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានជំរុញឲ្យមានការគ្រប់គ្រងព្រលានយន្តហោះអន្តរជាតិសៀមរាបអង្គរថ្មី ធ្វើយ៉ាងណាឲ្យក្លាយទៅជាកន្លែងទទួលបដិសណ្ឋារកិច្ចដ៏ល្អមួយ។
សម្ដេចថ្លែង ៖ នេះថា ការសម្រេចបាននូវសមិទ្ធផលព្រលានយន្តហោះគឺជារឿងមួយហើយ តែបច្ចុប្បន្នព្រលានយន្តហោះបៅជុំវិញពិភពលោកគឺបានក្លាយទៅជាទីតាំងមួយដែលរៀបចំទទួលបដិសណ្ឋារកិច្ចទៅដល់ភ្ញៀវទេសចរណ៍ដែលធ្វើឲ្យពួកគេទទួលបានអនុស្សាវរីយ៍ដ៏ល្អជាដំបូង។
អាស្រ័យដូចនេះហើយទើបសម្ដេចជំរុញឲ្យមានការរៀបចំធ្វើយ៉ាងណាឲ្យមានការគ្រប់គ្រងធ្វើបដិសណ្ឋារកិច្ចឲ្យបានល្អសម្រាប់ភ្ញៀវទេសចរណ៍ពេលដែលឈានចូលមកដល់ព្រលានយន្តហោះអន្តរជាតិថ្មីនេះ៕
ដោយ ៖ សិលា
