សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ កាំភ្លើងអាកាមួយដើម ត្រូវបានប្រជាពលរដ្ឋប្រទះឃើញនៅចិញ្ចើមផ្លូវលំមួយកន្លែង ខណៈដែលពួកគាត់ធ្វើដំណើរត្រឡប់មកពីផ្សារលក់អីវ៉ាន់វិញ ។ ហេតុការណ៍នេះត្រូវបានគេប្រទះឃើញកាលពីវេលាម៉ោង៨ និង៣០នាទីយប់ ថ្ងៃទី៧ ខែកុម្ភៈ ឆ្នាំ២០២៤ នៅភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ។
សមត្ថកិច្ចបានឱ្យដឹងថា ប្រជាពលរដ្ឋ ដែលប្រទះឃើញកាំភ្លើងនេះមានឈ្មោះ ង្វៀង យ៉ាងទៀក ភេទប្រុស អាយុ៤៤ឆ្នាំ ជនជាតិវៀតណាម រស់នៅភូមិទី៧ សង្កាត់ខ្សាម មានមុខរបរលក់ផាក់ឡូវនិង ពោះគោ ។ កាំភ្លើងដែលប្រទះឃើញម៉ាកអាកាស្វាយបត់ មានបង់មួយនិងគ្រាប់កាំភ្លើងនៅក្នុងបង់នេះចំនួន៩គ្រាប់ ។
សមត្ថកិច្ចបានឱ្យដឹងថា កាលពីវេលាម៉ោង៨និង៣០នាទីយប់ថ្ងៃទី៧ ខែកុម្ភៈ ឈ្មោះង្វៀង យ៉ាងទៀក ជាជនជាតិវៀតណាម បានត្រឡប់មកពីលក់សាច់ផាក់ឡូវនៅផ្សារ ពេលមកដល់ចំណុចខាងលើគាត់ឃើញមានចំណាំងនឹងភ្លើងពិល ដែលកាំភ្លើងនេះនៅក្នុងដើមកូនឈើតូចៗ ពេលទៅមើលក៏ឃើញកាំភ្លើងនៅទីនោះ តែភ្លាមៗនោះគាត់អត់បានលើកនោះទេ ក៏ជិះម៉ូតូចូលទៅផ្ទះ។ លុះព្រឹកឡើងវេលាម៉ោង១០និង៣០នាទីព្រឹកថ្ងៃទី៨ កុម្ភៈ គាត់បានរាយការណ៍ទៅនគរបាលប៉ុស្តិ៍សង្កាត់ខ្សាម ដើម្បីចុះពិនិត្យ និងយកមករក្សាទុក ។
សមត្ថកិច្ចនគរបាលប៉ុស្ថិ៍បានឱ្យដឹងថា តាមការពិនិត្យនិងធ្វើកោសល្យវិច័យរបស់នគរបាលបច្ចេកទេសក្រុង កាំភ្លើងនេះនៅមានគុណភាពប្រហែល ៥០% មានស្នាមប្រឡាក់ភក់នៅចុងកាណុងផងដែរ។បច្ចុប្បន្នកាំភ្លើងនេះត្រូវបានយកមករក្សាទុកនៅជំនាញបច្ចេកទេសនគរបាលក្រុងកំពង់ឆ្នាំងដើម្បីស្រាវជ្រាវបន្តទៅតាមនីតិវិធី ៕
ដោយ៖ ចន្ថា
