មេដឹកនាំកូរ៉េខាងជើងនិយាយថា ដល់ពេលត្រូវត្រៀមខ្លួនសម្រាប់សង្គ្រាម

ចែករំលែក៖

មេដឹកនាំ គីម ជុងអ៊ុន បាននិយាយថា ស្ថានភាពភូមិសាស្ត្រនយោបាយមិនស្ថិតស្ថេរជុំវិញប្រទេសកូរ៉េខាងជើង បង្ហាញថា ឥឡូវនេះគឺជាពេលដែលត្រូវរៀបចំខ្លួនយ៉ាងប្រុងប្រយ័ត្នសម្រាប់សង្រ្គាមជាងពេលណាៗទាំងអស់។
កាលពីថ្ងៃទី 10 ខែមេសា លោក Kim បានទៅធ្វើការសិក្សានៅសាកលវិទ្យាល័យ Kim Jong Il Military and Political University ដែលជាសាលាដាក់ឈ្មោះតាមឪពុករបស់គាត់ដែលបានទទួលមរណភាពក្នុងឆ្នាំ 2011។ KCNA បានផ្សាយថា នេះគឺជាកន្លែងអប់រំយោធាខ្ពស់បំផុតរបស់ប្រទេស។
ប្រទេសកូរ៉េខាងជើងបាននិងកំពុងបង្កើនការអភិវឌ្ឍន៍អាវុធរបស់ខ្លួនក្នុងប៉ុន្មានឆ្នាំថ្មីៗនេះ ខណៈពេលដែលការកសាងទំនាក់ទំនងយោធា និងនយោបាយកាន់តែជិតស្និទ្ធជាមួយរុស្ស៊ី។ អាមេរិក និងកូរ៉េខាងត្បូងជឿថា កូរ៉េខាងជើងកំពុងផ្តល់សព្វាវុធដល់រុស្ស៊ីសម្រាប់ប្រើប្រាស់ក្នុងសមរភូមិអ៊ុយក្រែន ជាថ្នូរនឹងការជួយរបស់ក្រុងម៉ូស្គូសម្រាប់គម្រោងយោធាជាយុទ្ធសាស្ត្ររបស់ក្រុងព្យុងយ៉ាង។
KCNA បានដកស្រង់សម្តីមេដឹកនាំកូរ៉េខាងជើង បញ្ជាក់ថា ប្រសិនបើសត្រូវជ្រើសរើសការប្រឈមមុខដាក់គ្នាខាងយោធាជាមួយកូរ៉េខាងជើង នោះកូរ៉េខាងជើងនឹង “វាយលុកយ៉ាងធ្ងន់ធ្ងរដល់សត្រូវដោយមិនស្ទាក់ស្ទើរ ដោយប្រមូលគ្រប់មធ្យោបាយតាមលទ្ធភាពរបស់យើង”។ លោក គីម ថ្លែងប្រាប់សាស្ត្រាចារ្យ និងសិស្សានុសិស្សរបស់សាលា។
KCNA បានសរសេរថា “ការបញ្ជាក់ពីស្ថានភាពអន្តរជាតិដ៏ស្មុគស្មាញ ក៏ដូចជាស្ថានភាពយោធា និងនយោបាយដែលមិនស្ថិតស្ថេរជុំវិញប្រទេសកូរ៉េខាងជើង គាត់បាននិយាយថា ឥឡូវនេះគឺជាពេលវេលាដើម្បីរៀបចំឱ្យបានហ្មត់ចត់ជាងមុនសម្រាប់សង្រ្គាមជាងពេលណាទាំងអស់” ។
កាលពីដើមខែនេះ លោក គីម បានត្រួតពិនិត្យការបាញ់សាកល្បងមីស៊ីលផ្លោងរយៈចម្ងាយមធ្យម supersonic ដែលប្រើឥន្ធនៈរឹង ជាអាវុធដែលអ្នកវិភាគនិយាយថា នឹងជួយឱ្យទីក្រុងព្យុងយ៉ាងដាក់ពង្រាយកាំជ្រួចកាន់តែលឿន និងមានប្រសិទ្ធភាពជាងពេលមុន ជាមួយនឹងរ៉ុក្កែតដោយប្រើឥន្ធនៈរាវ។
ប្រទេសកូរ៉េខាងជើងបានចោទប្រកាន់សហរដ្ឋអាមេរិក និងកូរ៉េខាងត្បូងថាបានញុះញង់ឱ្យមានភាពតានតឹងផ្នែកយោធាជាមួយនឹងសមយុទ្ធយោធាដែលមានកម្រិតនិងទំហំកាន់តែខ្លាំងនៅក្នុងប៉ុន្មានខែថ្មីៗនេះ៕ ដោយ៖ ធីរីណា