សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ដើម្បីធានាបាននូវប្រសិទ្ធភាព និងប្រសិទ្ធផលក្នុងការប្រឡងប្រជែង អង្គភាពប្រឆាំងអំពើពុករលួយ (អ.ប.ព.) បន្តចូលរួមសង្កេតការណ៍ដំណើរការប្រឡងប្រជែងជ្រើសរើសគ្រូបង្រៀននៅអនុវិទ្យាល័យ ដំណាក់កាលទី២ ។
សូមបញ្ជាក់ថា ៖ នៅថ្ងៃទី១៨ ខែឧសភា ឆ្នាំ២០២៤ ក្រុមការងារអង្គភាពប្រឆាំងអំពើពុករលួយ ចំនួន ៥៤រូប បន្តចូលរួមសង្កេតការណ៍ក្នុងដំណាក់កាលលើកទី២ នៃការប្រឡងប្រជែងជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យ ឱ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា។
ដំណើរការប្រឡងប្រជែងនេះ ត្រូវអនុវត្តស្របតាមនិយាមនីតិវិធីប្រតិបត្តិសម្រាប់ការប្រឡង ដោយឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ ការប្រឡងប្រព្រឹត្តទៅនៅសាកលវិទ្យាល័យភូមិន្ទភ្នំពេញ ដោយវិញ្ញាសាបែងចែងជា ៖
១-ប្រព័ន្ធបណ្តុះបណ្តាល បរិញ្ញាបត្រ + ១ (កម្រិតបរិញ្ញាបត្រ)៖
– ឯកទេសគណិតវិទ្យា ឬ រូបវិទ្យា រយៈពេល ២ម៉ោង (១២:៣០នាទី-១៤:៣០នាទី) មេគុណ៣
– ភាសាអង់គ្លេស ឬ ភាសាបារាំង រយៈពេល ២ម៉ោង (១៥:០០នាទី-១៧:០០នាទី) មេគុណ១
២-ប្រព័ន្ធបណ្តុះបណ្តាល ១២ + ៤ (កម្រិតថ្នាក់ទី១២)៖
– ឯកទេសគីមីវិទ្យា ឬ ជីវវិទ្យា រយៈពេល ២ម៉ោង (១២:៣០នាទី-១៤:៣០នាទី) មេគុណ៣
– ភាសាអង់គ្លេស ឬ ភាសាបារាំង រយៈពេល ២ម៉ោង (១៥:០០នាទី-១៧:០០នាទី) មេគុណ១
៣-ប្រព័ន្ធបណ្តុះបណ្តាល ១២ + ២ (កម្រិតថ្នាក់ទី១២)៖
– មុខវិជ្ជាឯកទេសទី១ រយៈពេល ២ម៉ោង (១២:៣០នាទី-១៤:៣០នាទី)មេគុណ៣
– មុខវិជ្ជាឯកទេសទី២ រយៈពេល ២ម៉ោង (១៥:០០នាទី-១៧:០០នាទី) មេគុណ២
សូមជម្រាបជូនថា អង្គភាពប្រឆាំងអំពើពុករលួយ ចូលរួមក្នុងនាមជាអង្គភាពសង្កេតការណ៍នៅក្នុងដំណើរការនៃការប្រឡងប្រជែង ចាប់តាំងពីដំណាក់កាលដំបូង រហូតដល់ការប្រកាសលទ្ធផលស្ថាពរ៕
ដោយ ៖ សិលា
