សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ÷ក្រសួងមុខងារសាធារណៈ បើកកិច្ចប្រជុំពិនិត្យវឌ្ឍនភាពការងារលើការអនុវត្តការពិនិត្យឡើងវិញ ការ វិភាគមុខងារ និងរចនាសម្ព័ន្ធក្រសួង ស្ថាប័ន និងការធ្វើបច្ចុប្បន្នភាពទិន្នន័យមន្រ្តីរាជការស៊ីវិល ដឹកនាំដោយឯកឧត្តមឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ នៅគណៈកម្មាធិការកែទម្រង់រដ្ឋបាលសាធារណៈ។ កិច្ចប្រជុំ ព្រឹកនេះបានបែងចែកជា៣ របៀបវារៈសម្រាប់ជាមូលដ្ឋានរាយការណ៍រួមមាន (១)ការធ្វើវឌ្ឍនភាព លើរបាយការណ៍វិភាគមុខងារ (២) វឌ្ឍនភាពលើការធ្វើបច្ចុប្បន្នភាពទិន្នន័យមន្រ្តីរាជការស៊ីវិលក្រសួង ស្ថាប័ន និង(៣) វឌ្ឍនភាពលើការធ្វើបច្ចុប្បន្នភាពទិន្នន័យមន្រ្តីរាជការស៊ីវិលថ្នាក់ក្រោមជាតិ ក្នុងវិស័យអប់រំ និងសុខាភិបាល។
មានប្រសាសន៍ក្នុងអង្គប្រជុំឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានថ្លែងថា គោលបំណងនៃកិច្ចប្រជុំនេះ គឺដើម្បីតាមដានវឌ្ឍនភាពការងារផង ដកស្រង់បទពិសោធ និងស្វែងរកដំណោះ ស្រាយលើបញ្ហាប្រឈមនានា ព្រមទាំង និងដាក់ចេញទិសដៅរួមគ្នាដើម្បីប្រសិទ្ធភាព និងគុណភាពការងារ ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង ស្ថាប័ន។
បន្ទាប់ពីទទួលជ្រាបរបាយការណ៍វឌ្ឍនភាពលើការងារនីមួយៗ អង្គប្រជុំបានពិភាក្សាផ្តល់ធាតុចូល ក្នុងគោល ដៅចូលរួមដោះស្រាយបញ្ហាប្រឈមនានាដែលបានជួប ប្រទះ ហើយដាក់ទិសដៅបន្ត ទៅលើការងារចំពោះមុខ។ ក្នុងនោះស្មារតីអង្គប្រជុំបានលើកឡើងពីការបន្តអនុវត្តការងារដែលនៅសេសសល់ដូចជា ការបន្តកិច្ចសហការជាមួយក្រសួង,ស្ថាប័នដែលចាំបាច់,ការបន្តធ្វើបច្ចុប្បន្ន ភាពបញ្ចូលទិន្នន័យមន្ត្រីរាជការស៊ីវិលក្នុងប្រព័ន្ធ (HRMIS), ការរៀបចំយន្តការគាំទ្រ និងលើកទឹកចិត្តមន្ត្រីអនុវត្តការងារ, ការបន្តពង្រឹងសមត្ថភាពមន្រ្តីបច្ចេកទេសដែលចុះអនុវត្តការងារ និងការពិនិត្យ វាយតម្លៃ ហើយវេចខ្ចប់របាយការណ៍ រាយការណ៍បន្តជូនថ្នាក់ដឹកនាំ និងសម្រាប់ជាមូលដ្ឋានក្នុងការរៀបចំការងារជាបន្តបន្ទាប់។
លោកឧបនាយករដ្ឋមន្រ្តី បានថ្លែងបន្តថា “យើង (មន្ត្រីក្រសួងមុខងារសាធារណៈ) ត្រូវបន្តភាពជាគំរូជាប្រចាំ ព្រោះនេះជាឧត្តមភាពនៃមន្ត្រីរាជការដែលយើងមាន ស្រាប់ហើយ ខណៈការងារកែទម្រង់រដ្ឋបាលសាធារណៈ បានបាញ់ឆ្ពោះមកកាន់ក្រសួងមុខងារសាធារណៈ ដែលអង្គភាពដឹកនាំអនុវត្តផង។ .. “មន្ត្រីយើងពិតជាបានឆ្លង កាត់ការលំបាក មានការខិតខំប្រឹងប្រែង និងមានភាពអំណត់ ព្រោះការងារទាំងអស់ដែលយើងលើកយកមកពិភាក្សាទាំងអស់នេះ ជាកិច្ចការលំបាក ត្រូវការពេល វេលា ទាមទារការសហការទាំងក្នុង និងក្រៅ ហើយត្រូវ ការអនុវត្តជាជំហ៊ានៗ។” ឧបនាយករដ្ឋមន្រ្តីបន្តថា ទាំងអស់នេះហើយ ជាការអនុវត្តតាមគោលការណ៍ «រៀបចំផ្ទះរបស់យើងឱ្យបានស្អាត និងមានរបៀប រៀបរយ»។
សូមជម្រាបថា កិច្ចប្រជុំនេះ បានប្រព្រឹត្តទៅនាព្រឹកថ្ងៃទី៨ ខែកក្កដា ឆ្នាំ២០២៤ នៅសាលប្រជុំនៃសាលាភូមិន្ទរដ្ឋបាល ដោយមានការចូលរួមពី រដ្ឋលេខាធិការប្រចាំការលោក លោកស្រី ដែលជាប្រធាន អនុប្រធាន សមាជិក នៃគណៈកម្មការប្រតិបត្តិនៃ គ.វ.រ. និងក្រុម ការងារបច្ចេកទេសទាំងអស់ មានចំនួនសរុប ៦៧រូប៕
