សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ មានភ្លៀង ស្រិចៗលាយ ផ្គររន្ទះ បានបាញ់សត្វគោ៣ក្បាល របស់អ្នកភូមិកំពុងស៊ីស្មៅ បណ្ដាលឱ្យងាប់នឹងកន្លែង បង្កការភ្ញាក់ផ្អើលដល់ម្ចាស់ សំណាងមិនមានមនុស្សរងគ្រោះថ្នាក់ នៅស្រុកស្វាយជ្រំ។
ហេតុការណ៍នេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី០៨ ខែកក្កដា ឆ្នាំ២០២៤នេះ ស្ថិតនៅភូមិបន្លាស្អិត ឃុំក្រោលគោ ស្រុកស្វាយជ្រំ ខេត្តស្វាយរៀង ។
បើតាម អាជ្ញាធរឃុំក្រោលគោ បានឲ្យដឹងថា មុនពេលកើតហេតុ ម្ចាស់សត្វគោត្រូវបានស្គាល់ឈ្មោះ គ្រូពេទ្យធី បានចងគោ មេកូនរបស់ខ្លួនចំនួន០៣ក្បាល ឲ្យស៊ីចំបើងនៅខាងមុខផ្ទះ ខណៈនោះ ក៏មានផ្ទៃមេឃ មានពពកពណ៌ខ្មៅ មានភ្លៀងរលឹមស្រិចៗ ហើយមានផ្គររន្ទះយ៉ាងខ្លាំង ស្រាប់តែរន្ទះបាញ់លាន់គ្រាំង រន្ទះខ្យល់ បាញ់ចំសត្វគោចំនួន០៣ក្បាល មេកូន ងាប់ភ្លាមៗ នៅក្នុងចំណង តែម្តងបង្កឲ្យមានការភ្ញាក់ផ្អើលយ៉ាងខ្លាំងនាំគ្នាមកមើល ។
ប្រភពបន្តថា ប៉ុន្មានថ្ងៃនេះមានភ្លៀងធ្លាក់រាល់ថ្ងៃ លាយឡំផ្គររន្ទះ និងខ្យល់កន្ត្រាក់ គួរឲ្យព្រួយបារម្ភ ហើយនៅល្ងាចកើតហេតុមានភ្លៀង១មេ មានផ្គររន្ទះគ្រហឹមគួរឲ្យខ្លាច ស្រាប់តែឃើញផ្លេកបន្ទោល ឆ្វាប់ ឮសូរ រន្ទះបាញ់យ៉ាងខ្លាំង មើលទៅសត្វគោ ដែលកំពុងឈរស៊ីចំបើងបានដួលទៅលើដី លុះដល់ពេលរាំងភ្លៀង និងស្ងប់ខ្យល់ ម្ចាស់គោចេញមកមើលគោ ឃើញគោមេ២ក្បាល និងកូនគោ១ក្បាល ងាប់អស់ទៅហើយ ទើបភ្ញាក់ផ្អើលដល់ប្រជាពលរដ្ឋនាំគ្នាមកមើល និងរាយការណ៍ជូនសមត្ថកិច្ចតែម្តង ។
អាជ្ញាធរស្រុក បានធ្វើការដាស់តឿនដល់ប្រជាពលរដ្ឋឲ្យមានការប្រុងប្រយ័ត្នខ្ពស់នារដូវវស្សាចូលមកដល់និងសូមអោយប្រជាពលរដ្ឋនៅពេលមានភ្លៀងត្រូវមានការប្រុងប្រយ័ត្នដោយ បិទទូរស័ព្ទ ទូរទស្សន៍ វិទ្យុ ពេលមានភ្លៀងខ្យល់ខ្លាំងៗត្រូវរកទីទួលសុវត្ថិភាព ត្រូវចេះណែនាំកូនចៅកុំឲ្យលេងទីវាលពេលមេឃភ្លៀងព្រោះអាចគ្រោះថ្នាក់ដោយប្រការណាមួយពីគ្រោះធម្មជាតិ ខ្យល់កន្ត្រាក់ ផ្គររន្ទះ ជាដើម ៕ ដោយ៖ សុថាន
