សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ផឹកស្រាស្រវឹងបើកម៉ូតូទៅផ្ទះមិនរួចមកដេកសន្លប់នៅតាមផ្លូវត្រូវចោរលួចម៉ូតូទៅបាត់។ ហេតុការណ៍នេះបានកើតឡើងកាលពីម៉ោង១២និង២០នាទីរំលងអធ្រាត្រឈានចូលថ្ងៃទី២៦ ខែវិច្ឆិកា ឆ្នាំ២០២៤ ស្ថិតនៅតាមបណ្ដោយផ្លូវបេតុង ក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឱ្យដឹងថា មុនពេលកេីតហេតុគេឃើញបុរសម្នាក់ជិះម៉ូតូម៉ាកស៊ុយហ្ស៊ុយគីនិច ដោយមិនចាំស្លាកលេខនោះទេ ធ្វើដំណើរមកដល់ចំណុចកើតហេតុ ស្រាប់តែឈប់ម៉ូតូរួចប្រះខ្លួនដេកលង់លក់នៅលើខឿនមុខផ្ទះសំណាក់ យីហោ លាភហេង។ លុះក្រោយមកក៏មានជនសង្ស័យប្រុសស្រីពីរនាក់ដេីរមកដល់ឃើញឱកាសល្អបានយកទូរស័ព្ទនិងម៉ូតូជិះចេញទៅបាត់ពីកន្លែងកើតហេតុ។ បន្ទាប់មកប្រជាពលរដ្ឋឃើញក៏នាំគ្នារាយការណ៍ទៅសមត្ថកិច្ចមូលដ្ឋានភ្លាមៗ។
បន្ទាប់ពីកេីតហេតុ កម្លាំងសមត្ថកិច្ចមូលដ្ឋានបានចុះមកដល់ដាស់អ្នកប្រមឹកនោះសួរនាំ រួចហើយនាំយកទៅប៉ុស្តិ៍ដេីម្បីទាក់ទងទៅក្រុមគ្រួសារឱ្យមកទទួលយកទៅផ្ទះវិញ៕
ដោយ៖ ជ្រោយពេជ្រ
