បារាំងបានបដិសេធការចោទប្រកាន់របស់រុស្ស៊ីថាទាហានបារាំងមានជាប់ពាក់ព័ន្ធដោយផ្ទាល់នៅក្នុងជម្លោះនៅអ៊ុយក្រែន។
រដ្ឋមន្ត្រីការបរទេសបារាំង លោក Jean-Noel Barrot បាននិយាយនៅថ្ងៃទី 17 ខែវិច្ឆិកាថា បារាំងមិនពាក់ព័ន្ធដោយផ្ទាល់នៅក្នុងប្រតិបត្តិការយោធាណាមួយនៅអ៊ុយក្រែនទេ ប៉ុន្តែគ្រាន់តែធ្វើ “ការងារបណ្តុះបណ្តាល និងថែទាំឆ្ងាយពីខ្សែជួរមុខ ក្នុងទំហំមានកំណត់ និងដោយគ្មានការចូលរួមក្នុងប្រតិបត្តិការប្រយុទ្ធ”។ លោកបានបន្ថែមថា ការបណ្តុះបណ្តាលភាគច្រើនធ្វើឡើងនៅប្រទេសប៉ូឡូញ។
លោកបានប្រកាសថា “យើងគាំទ្រកងទ័ពអ៊ុយក្រែន និងកងកម្លាំងអ៊ុយក្រែន។ នេះជារឿងតិចតួចបំផុតដែលយើងអាចធ្វើបានសម្រាប់ប្រទេសមួយដែលស្ថិតនៅមាត់ទ្វារអឺរ៉ុប”។
សេចក្តីថ្លែងការណ៍នេះបានកើតឡើងបន្ទាប់ពីរដ្ឋមន្ត្រីការបរទេសរុស្ស៊ី លោក Sergey Lavrov បានប្រាប់អ្នកយកព័ត៌មានថា បុគ្គលិកយោធាបរទេសមានវត្តមាននៅអ៊ុយក្រែន “អស់រយៈពេលជាងប្រាំមួយខែមកហើយ មិនមែនគ្រាន់តែបុគ្គលិកយោធាបារាំងនោះទេ”។
លោក Lavrov បាននិយាយថា រុស្ស៊ីបានបញ្ជូនសារទៅកាន់ប្រទេសពាក់ព័ន្ធថា សកម្មភាពនេះស្មើនឹង “ការចូលរួមដោយផ្ទាល់នៅក្នុងសង្គ្រាម រួមទាំងការផ្តល់ការកំណត់គោលដៅ ទិន្នន័យផ្កាយរណប និងទម្រង់នៃការគាំទ្រផ្សេងទៀត”។
លោក Lavrov បាននិយាយថា “យើងបានសម្តែងការព្រួយបារម្ភរបស់យើង។ នេះមិនមែនគ្រាន់តែជាការគាំទ្រសម្រាប់អ៊ុយក្រែនទៀតទេ ប៉ុន្តែជាការចូលរួមប្រយុទ្ធដោយផ្ទាល់”។
មុននេះ យោងតាមរបាយការណ៍ប្រព័ន្ធផ្សព្វផ្សាយ កងទ័ពបរទេសត្រូវបានដាក់ពង្រាយនៅក្នុងប្រទេសអ៊ុយក្រែនអស់រយៈពេលជាច្រើនខែក្នុងបេសកកម្មបណ្តុះបណ្តាលសម្ងាត់មួយ ដើម្បីបណ្តុះបណ្តាលបុគ្គលិក និងជួយក្នុងការថែទាំឧបករណ៍។
ប្រភពទាំងនេះក៏បានអះអាងផងដែរថា កងទ័ពទាំងនេះមិនបានចូលរួមក្នុងប្រតិបត្តិការប្រយុទ្ធដោយផ្ទាល់នោះទេ។ AFP ដោយដកស្រង់ប្រភពដែលមានចំណេះដឹងមួយ បានរាយការណ៍ថា “ការប្តូរវេនគ្រូបង្វឹកដើម្បីគាំទ្រអ៊ុយក្រែនកើតឡើងនៅប្រទេសបារាំង ប៉ូឡូញ ឬពេលខ្លះនៅអ៊ុយក្រែន។ ប៉ុន្តែនេះមិនមែនជាប្រតិបត្តិការយោធាទេ”៕

សារព័ត៌មាន នគរវត្ត តែងតែនាំមុខគេជានិច្ច